Lukha 22 - Siswati 1996 Bible

Licebo lekubulala Jesu

¹ Sikhatsi seMkhosi Wesinkhwa Lesingenambiliso, lokutsiwa liPhasika, sasesimadvutane.

² Baphristi labakhulu netati temtsetfo betama kwenta lisu lekubulala Jesu; noko babesaba bantfu.

Judasi ulungiselela kutsengisa Jesu

³ Sathane wase ungena kuJudasi Skariyothe, labengulomunye webafundzi lababeli-12.

⁴ Ngako wahamba wayawukhuluma nebaphristi labakhulu netindvuna tebalindzi belithempeli kutsi angabatsengisela kanjani loJesu.

⁵ Bajabula bavumelana kutsi batambhadala imali.

⁶ Judasi wakuvuma loko, wase wetama kutfola litfuba lelikahle lekutsengisa Jesu kubo, sicumbi singekho.

Jesu ulungiselela kudla Sidlo seliPhasika

⁷ Lefika lilanga leMkhosi Wesinkhwa Lesingenambiliso lekusikhatsi sekuhlatjwa kwemazinyane eSidlo seliPhasika.

⁸ Jesu watfuma boPhetro naJohane watsi: “Hambani niyewulungisela liPhasika sitewudla.”

⁹ Bambuta batsi: “Ufuna siyekulungisa kuphi?”

¹⁰ Wase utsi kubo: “Lalelani-ke, naningena edolobheni nitawuhlangana nemuntfu etfwele imbita yemanti. Mlandzeleni aze angene endlini,

¹¹ bese nitsi kulomnikati wendlu: ‘Umfundzisi utsi kuwe: Iphi indlu lapho ngitawudlela khona liPhasika nebafundzi bami?’

¹² Utanikhombisa indlu lenkhulu lesetulu lenako konkhe kwekuhlala, lapho nitawulungisa khona.”

¹³ Bahamba bakhandza konkhe kunjengobe abebatjelile, bafike basilungisa Sidlo seliPhasika.

Kusungulwa kweSidlo seNkhosi

¹⁴ Satsi nasishaya sikhatsi, Jesu wahlala endzaweni yakhe ekudleni kanye nebaphostoli.

¹⁵ Wase utsi kubo: “Bengifisa kakhulu kudla nani leliPhasika kucala ngingakahlupheki;

¹⁶ ngobe nginitjela kutsi: Ngingeke ngiphindze ngilidle futsi, lize ligcwaliseke embusweni waNkulunkulu.”

¹⁷ Jesu wemukela indzebe, wabonga kuNkulunkulu wase utsi: “Tsatsani loku nenetisane;

¹⁸ ngobe nginitjela kutsi ngingeke ngiphindze ngilinatse leliwayini kusukela manje, kuze kufike umbuso waNkulunkulu.”

¹⁹ Wase utsatsa sinkhwa, wabonga kuNkulunkulu, wasihlephula, wabanika watsi kubo: “Loku ngumtimba wami [lonikelwe esikhundleni senu. Yentani loku kuze kube sikhumbuto ngami.”

²⁰ Wenta njalo futsi ngekubanika indzebe emvakwekudla, atsi: “Lendzebe sivumelwane lesisha sengati yami lecitselwe nine.]

²¹ “Kodvwa bukani la, lona longitsengisako ukhona la etafuleni kanye nami;

²² vele, iNdvodzana yeMuntfu itawufa, njengobe kwamiswa, kodvwa maye kulowo muntfu loyitsengisako!”

²³ Bacala babutana bodvwana kutsi ngubani emkhatsini wabo labetakwenta loko.

Kuphikisana ngebukhulu

²⁴ Kwase kuba nembango emkhatsini webafundzi ngekutsi ngubani lotaba mkhulu kunabo bonkhe.

²⁵ Jesu watsi kubo: “Emakhosi alomhlaba anemandla etikwebantfu bawo, nebabusi babitwa ngekutsi: ‘Benti balokuhle’.

²⁶ Kodvwa kini akunjalo; lokungenani lomkhulu kakhulu emkhatsini wenu kufanele afanane nalomncane kakhulu, nemholi kufanele afane nesisebenti.

²⁷ Ngubani lomkhulu, ngulohlalako angene ngekudla yini, nome ngulona lolungisela lomunye kudla? Vele, ngulona lohlalako angene ngekudla. Kodvwa mine ngisemkhatsini wenu njengemuntfu lonilungiselako.

²⁸ “Nine senibeketele kanye nami kuko konkhe kulingwa kwami;

²⁹ njengobe Babe anginikile ligunya lekubusa, nami-ke ngitaninika lona.

³⁰ Niyawudla ninatse etafuleni embusweni wami, niyawuhlala etihlalweni nehlulele tive tema-Israyeli letili-12.”

Jesu uphrofetha kuphikwa nguPhetro

³¹ “Simoni! Simoni! Lalela! Sathane sewucele imvume kuNkulunkulu yekunilinga, njengemfati ela emabele awehlukanisa nemakhoba.

³² Noko sengikukhulekele, Simoni, kuze kungehluleki kukholwa kwakho. Nase uphendvukile wabuya kimi, kufanele ucinise nalabanakenu.”

³³ Waphendvula watsi: “Nkhosi, ngitimisele kukulandzela ngisho nasekuboshweni nasekufeni.”

³⁴ Jesu waphendvula watsi: “Phetro, ngikutjela kutsi: Lamuhla lichudze litawukhala sewungiphike katsatfu utsi awungati.”

Sipatji, nesikhwama, nenkemba

³⁵ Wase utsi Jesu kubo: “Mhlazana nginitfuma ngitsi ningaphatsi sipatji, nesikhwama, neticatfulo, nake neswelani?” Baphendvula batsi: “Kute lesakweswela.”

³⁶ Jesu watsi: “Kodvwa lowo lonesipatji nalonesikhwama, akasitsatse; nalowo longenankemba, akatsengise lijazi lakhe atsenge inkemba.

³⁷ Ase nginitjele naku: UmBhalo lotsi: ‘Wabalwa kanye netigelekece,’ kufanele ugcwaliseke ngami. Phela lokwabhalwa ngami sekuyagcwaliseka.”

³⁸ Bafundzi batsi: “Buka! Nati tinkemba letimbili, Nkhosi!” Waphendvula watsi: “Sekwenele!”

Jesu uthandaza eNtsabeni Yemincumo

³⁹ Jesu wesuka wahamba, waya eNtsabeni Yemincumo njengobe abevamile; nebafundzi bakhe bahamba naye.

⁴⁰ Watsi kube efike kuleyo ndzawo, watsi kubo: “Thandazani, kuze ningangeni ekulingweni.”

⁴¹ Kodvwa yena wesuka kubo, wachubeka libanga lelingaba ngangemjikijelo, waguca phansi wathandaza.

⁴² Watsi: “Babe, nawutsandza, susa kimi lendzebe yelusizi. Noko kungabi ngentsandvo yami, kodvwa akwenteke intsandvo yakho.”

⁴³ Ingilosi leyayiphuma ezulwini yefika kuye yamcinisa.

⁴⁴ Inhlitiyo yakhe yayilusizi; wathandaza ngekuciniseka lokukhulu, titfukutfuku takhe taze taba njengematfonsi engati, atfontsela phansi.

⁴⁵ Wesuka ekuthandazeni, wabuyela kubafundzi bakhe wabakhandza sebalele, ngobe bebakhatsateke kakhulu etinhlitiyweni tabo.

⁴⁶ Watsi kubo: “Nilaleleni? Vukani nithandaze kuze ningangeni ekulingweni.”

Kuboshwa kwaJesu

⁴⁷ Watsi asakhuluma, kwase kufika sicumbi sebantfu; Judasi, labengulomunye webafundzi labali-12 labesihola embili, weta kuJesu wafike wamanga.

⁴⁸ Kodvwa Jesu watsi: “Judasi, nembala iNdvodzana yeMuntfu uyitsengisa ngekuyanga?”

⁴⁹ Bafundzi lababenaJesu babona lokwakutakwenteka, base batsi: “Nkhosi! Sigadle yini ngaletinkemba tetfu?”

⁵⁰ Lomunye wabo wagadla sigcili semPhristi Lomkhulu wasihhumbula indlebe yangasekudla.

⁵¹ Kodvwa Jesu waphendvula watsi: “Manini! Sekwenele!” Watsintsa lendlebe yaleyo ndvodza wayiphilisa.

⁵² Jesu watsi kubaphristi labakhulu kanye netiphatsimandla tebalindzi belithempeli netibondza letatite kutembamba: “Niteleni la netinkemba netagila, kube sengatsi ngisigebengu?

⁵³ Nganginani onkhe emalanga ethempelini, anizange netame kungibopha. Kodvwa lesikhatsi senu nesemandla ebumnyama.”

Phetro uphika Jesu

⁵⁴ Base bayambopha Jesu bamtsatsa bamfaka endlini yemPhristi Lomkhulu; Phetro abelandzela khashane ngemuva.

⁵⁵ Kwakubaswe umlilo ekhatsi nendzawo yelibala lenkantolo, naPhetro weta wahlala wotsa nabo umlilo.

⁵⁶ Kwatsi kube intfombatana, leyayisisebenti, imbona otsa umlilo, yambukisisa yatsi: “Nalendvodza beyihamba naye!”

⁵⁷ Kodvwa Phetro waphika watsi: “Ntfombatana! Angimati nekumati!”

⁵⁸ Emvakwesikhashana, indvodza lenye yamfanisa yatsi: “Ungulomunye wabo nawe.” Kodvwa Phetro waphendvula watsi: “Ndvodza-ndzini, angisiye!”

⁵⁹ Ngemvakwesikhatsi lesidzanyana lesingaba li-awa lenye indvodza yambelesela ngemandla yatsi: “Akukho nalokuncane nje kungabata kutsi lendvodza yayinaye, ngobe ingumGalile!”

⁶⁰ Kodvwa Phetro waphendvula watsi: “Ndvodza, angiyati lentfo lokhuluma ngayo!” Ngekushesha, asakhuluma, lichudze lakhala.

⁶¹ INkhosi yagucuka yabuka Phetro, naPhetro wase uyawakhumbula emavi eNkhosi nayitsi: “Lamuhla lichudze lingakakhali, utabe sewushito katsatfu kutsi awungati.”

⁶² Phetro waphumela ngephandle wafike wakhala kabuhlungu kakhulu.

Jesu uyaphukutwa, uyashaywa

⁶³ Lamadvodza abegadze Jesu amenta inhlekisa amshaya;

⁶⁴ abemvala emehlo bese ayambuta atsi: “Combelela kutsi ngubani lokushayile?”

⁶⁵ Akhuluma ametfuka ngetinhlamba letinyenti.

Jesu ume embikweLiqoqo letibondza

⁶⁶ Ekuseni Liqoqo letibondza temaJuda, nebaphristi labakhulu, netati temtsetfo tahlangana ndzawonye, naJesu waletfwa kuleLiqoqo labo.

⁶⁷ Batsi kuye: “Sitjele, unguye yini loKhristu?” Waphendvula watsi: “Nanginitjela, ningeke nikholwe,

⁶⁸ kani futsi nanginganibuta umbuzo, ningeke ningiphendvule.

⁶⁹ Kodvwa kusukela manje iNdvodzana yeMuntfu itawuhlaliswa ngasesandleni sekudla saNkulunkulu, Somandla.”

⁷⁰ Bonkhe batsi: “Pho, ungiyo yini iNdvodzana yaNkulunkulu?” Wabaphendvula watsi: “Niyasho kutsi ngingiyo.”

⁷¹ Base batsi kuye: “Asisadzingi labanye bofakazi! Tsine matfupha sesitivele inkhulumo yakhe!”