Lukha 10 - Siswati 1996 Bible

Jesu utfuma labangema-72

¹ Ngemuva kwaloko iNkhosi yakhetsa labanye labangema-72, leyabatfuma ngababili kutsi bahambe ngembili kwayo bangene kuwo onkhe emadolobha netindzawo, lapho yayitawuhamba khona.

² Yase itsi kubo: “Kuvuna kukhulu, kodvwa tisebenti tincane. Thandazani kumnikati wekuvuna kutsi atfumele letinye tisebenti tekuvuna.

³ Hambani-ke, nginitfumela njengetimvu emkhatsini wetimphisi.

⁴ “Ningasiphatsi sipatji nome sikhwama salabacelako, nome ticatfulo; ningalitjatiswa ngisho nakubingelela bantfu endleleni.

⁵ Nome ngukuyiphi indlu leningena kuyo nibotsi: ‘Kuthula akube kulendlu!’

⁶ Nangabe lapho kuhlala umuntfu wekuthula, kumbingelela kwenu kutawuhlala kuye; nangabe akunjalo, loko kuthula kwenu kutawubuyela kini.

⁷ Hlalani kulendlu, nidle ninatse loko labataninika kona; ngobe sisebenti kufanele sitfole liholo laso. Ningahambi ningena tindlu ngetindlu.

⁸ Njalo nje naningena edolobheni banemukela, nibodla labaniphakela kona,

⁹ nibaphilise labagulako kulelo dolobha, bese nibatjela nitsi: ‘Umbuso waNkulunkulu sewusondzele kini.’

¹⁰ Kodvwa nabanganemukeli kulelo dolobha, phumelani ngephandle etindleleni, bese nitsi:

¹¹ ‘Nelutfuli lwelidolobha lenu lolunamatsele etinyaweni tetfu silutsintsitsela kini, kodvwa khumbulani kutsi umbuso waNkulunkulu sewusondzele kini!’

¹² Nginitjela kutsi: Ngelilanga lekwehlulela labakulelo dolobha Nkulunkulu uyawubajezisa kamatima kunebaseSodoma.”

Emadolobha langakholwa

¹³ “Maye kuwe Khorazini! Maye nakuwe Bhethsayida! Ngobe kube letimangaliso letentiwe kuwe betentiwe eThire naseSidoni, bantfu balapho ngabe kadze baphendvuka; bebayawuhlala phansi, bembatse emasaka, batitsele ngemlotsa bentele kubonakalisa kutsi batishiyile tono tabo.

¹⁴ “Ngelilanga lekwehlulela niyawujeziswa kamatima kunebaseThire nebaseSidoni.

¹⁵ Wena-ke Khaphanawume, ucabanga kutsi uyawuphakanyiselwa ezulwini yini? Cha! Uyakwehliselwa esihogweni.”

¹⁶ Wase utsi kubafundzi bakhe: “Lonilalelako, ulalela mine; longanemukeli, akemukeli mine; nalowo longangemukeli, akamemukeli nalowo longitfumile.”

Kubuya kwalabangema-72

¹⁷ Labangema-72 babuya bajabule kakhulu. Befika batsi: “Nkhosi, ngisho nemadimoni ayasilalela nasiwekhuta ngelibito lakho.”

¹⁸ Jesu wabaphendvula watsi: “Ngabona Sathane awa ezulwini ehla njengembane.

¹⁹ Bukani la! Ngininike emandla ekunyatsela tinyoka, nabofecela, nemandla ekuncoba sitsa; kute lokuyawunilimata.

²⁰ Ningajabuli ngobe imimoya lemibi initfobela; kodvwa jabulani kutsi emabito enu abhaliwe ezulwini.”

Jesu uyajabula

²¹ Ngaso leso sikhatsi Jesu wajabula kuMoya Longcwele, watsi: “Yebo, Babe, Nkhosi yelizulu nemhlaba, konkhe loku utifihlele tati netihlakaniphi, kodvwa wakwembula kubantfwana. Yebo, Babe, loko kwaba yintsandvo yakho.

²² “Konkhe nginikwe nguBabe. Kute lowatiko kutsi iNdvodzana ingubani ngaphandle kweYise, kantsi kute lowatiko kutsi uYise ngubani ngaphandle kweNdvodzana nalabo iNdvodzana lefuna kumbonakalisa kubo.”

²³ Jesu wase ugucukela kubafundzi bakhe emasitseleni utsi: “Maye, abusisiwe emehlo labona lenikubonako!

²⁴ Ngiyanitjela ngitsi: Baphrofethi nemakhosi lamanyenti abefisa kukubona loku lenikubonako, kodvwa abakubonanga, bebafuna nekuva loku lenikuvako, kodvwa abazange bakuve.”

Umfanekiso ngemSamariya lolungile

²⁵ Lesinye sati semtsetfo seta satawulinga Jesu sicondze kumetsiya. Sabuta satsi: “Mfundzisi, kufanele ngenteni kuze ngitewutfola kuphila lokuphakadze?”

²⁶ Jesu wasiphendvula watsi: “Umtsetfo utsini? Uwufundza njani?”

²⁷ Lendvodza yamphendvula yatsi: “Kufanele utsandze Nkulunkulu, iNkhosi yakho, ngenhlitiyo yakho yonkhe, nangemphefumulo wakho wonkhe, nangemandla akho onkhe, nangengcondvo yakho yonkhe; bese utsandza makhelwane wakho njengobe utitsandza wena.”

²⁸ Jesu watsi kuye: “Imphendvulo yakho ilungile; yenta loko uyawuphila.”

²⁹ Kepha sati semtsetfo sifuna kutitsetselela, sabuta satsi: “Ngubani makhelwane wami?”

³⁰ Jesu waphendvula ngekutsi: “Umuntfu lotsite abephuma eJerusalema aya eJerikho. Wahlaselwa tigebengu, tadzabula tingubo takhe, tamshaya, tamshiya asatawufa.

³¹ Kwenteka kwendlula umphristi ehla ngaleyo ndlela; watsi kube ambone lomuntfu, wamgega.

³² Kanjalo nemLevi wefika lapho, waya wambuka lomuntfu, naye washaya ngale kwakhe.

³³ Kepha umSamariya lotsite labehamba ngaleyo ndlela wamkhandza; watsi kube ambone lomuntfu, wamhawukela.

³⁴ Waya kuye, wamtsela ngeliwayini amgcobisa nangemafutsa emancebeni, wawabopha ngendvwangu, wase umgibelisa embongolweni yakhe, wamyisa endlini yetihambi lapho amongela khona.

³⁵ Ngakusasa lomSamariya wakhipha imali lengemasiliva lamabili, wayinika umnikati walendlu yetihambi. Watsi kuye: ‘Ngongele nangu umuntfu wami, nase ngibuya ngitakukhokhela tonkhe tindleko takhe.’ ”

³⁶ Jesu wephetsa ngekutsi: “Ngumuphi-ke walabantfu labatsatfu longatsi waba ngumakhelwane kulomuntfu lowahlaselwa tigebengu?”

³⁷ Sati semtsetfo saphendvula satsi: “Ngulona lowaba nesihawu kuye.” Jesu waphendvula ngekutsi: “Hamba, nawe wente njalo!”

Jesu uvakashela Mata naMariya

³⁸ Kwatsi asahamba Jesu nebafundzi bakhe, wase yena uphambukela emtini lotsite lapho emukelwa nguMata endlini yakhe.

³⁹ Abenadzadzewabo labenguMariya lowafike wahlala phansi ngasetinyaweni teNkhosi alalela kufundzisa kwayo.

⁴⁰ Mata waze wacansulwa kudlangelwa ngumsebenti labewenta; ngako wefika watsi: “Nkhosi, awusangiboneleli dzadzewetfu angibukelela ngemsebenti longaka? Mtjele kutsi atengisita.”

⁴¹ INkhosi yamphendvula yatsi: “Mata, ye Mata! Utikhatsata ngetintfo letinyenti,

⁴² kodvwa yinye kuphela ledzingekile. Mariya ukhetse intfo lengiyo sibili, kunjalo nje angeke ayemukwe ngumuntfu leyo ntfo.”