Levithikusi 24 - Siswati 1996 Bible

Kunakekelwa kwetibane

¹ Simakadze wakhuluma kuMosi, watsi:

² “Tjela ema-Israyeli kutsi akakuletsele emafutsa lacengekile ekukhanyisa tibane laphehlwe etitselweni temncumo. Letibane kufanele tihlale tikhanya njalo tingacimi.

³ Njalo nje entsambama Aroni utabotikhanyisa tihlale tikhanya embikwaSimakadze kuze kuse, ethendeni lekuhlangana ngaphandle kwendvwangu lesembikwelibhokisi lesivumelwane. Lomtsetfo uyawugcinwa wentiwe titukulwane ngetitukulwane.

⁴ Aroni uyawuhlela kahle letibane, atimise etikwelutsi lwegolide lecengekile atikhanyise onkhe emalanga embikwaSimakadze.”

Tinkhwa letinikelwe kuNkulunkulu

⁵ “Uyawupheka tinkhwa letili-12 tafulaha; sinkhwa sisinye siyakwentiwa ngemalitha langaba mane nencenye.

⁶ Uyawutimisa tinhlu letimbili, luhlu lulunye lube netinkhwa letisitfupha etikwelitafula legolide lecengekile embikwaSimakadze.

⁷ Etikwalolo nalolo luhlu lwato uyawubeka imphepho lengakabhicwa nalutfo, ibe sikhumbuto lesiyawumela sinkhwa lesingumnikelo lowentiwa ngemlilo kuSimakadze.

⁸ Onkhe emaSabatha Aroni uyawubeka lesinkhwa embikwaSimakadze, emelele sive sonkhe sema-Israyeli, kube sivumelwane saphakadze.

⁹ Siyawuba sa-Aroni nesemadvodzana akhe. Bayawusidlela endzaweni lengcwele, ngobe ngusona sabelo sabo lesingcwelengcwele eminikelweni leyentiwa ngemlilo kuSimakadze, kube simiso saphakadze naphakadze.”

Sibonelo sesijeziso lesikahle nalesingakhetsi

¹⁰ Indvodzana yemfati longum-Israyeli labendze endvodzeni lengumGibhithe yesuka yangena emkhatsini wesive saka-Israyeli yacabana nem-Israyeli enkambu.

¹¹ Lendvodzana yemfati longum-Israyeli yahlambalata libito laSimakadze ngekulicalekisa; bayitsatsa bayiletsa kuMosi. Unina bekunguShelomithi, indvodzakati yaDibri wesive sakaDani.

¹² Lendvodzana bayibopha, base balindzela kutsi intsandvo yaNkulunkulu itawutsini kubo ngayo.

¹³ Simakadze wakhuluma kuMosi watsi:

¹⁴ “Mkhipheleni ngaphandle kwenkambu lomhlambalati, bese kutsi bonkhe laba labamvile babeke tandla etikwenhloko yakhe, sive sonkhe simtselekele simgcobe ngematje.

¹⁵ Shano kuma-Israyeli utsi: ‘Nome ngubani loyakwetfuka Nkulunkulu wakhe, uyakwetfwala licala lesono sakhe.

¹⁶ Lowo lohlambalata libito laSimakadze uyawubulawa. Sive sonkhe siyawumgcoba ngematje. Yebo, nome lomuntfu wetive nome angum-Israyeli wengati, kodvwa nahlambalata libito laSimakadze, uyawubulawa.

¹⁷ “ ‘Lowo lobulala lomunye umuntfu, naye uyawubulawa.

¹⁸ Lowo lobulala sifuyo salomunye umuntfu kufanele asenane. Umtsetfo utsi imphilo ihlawulwa ngemphilo.

¹⁹ “ ‘Nangabe umuntfu alimate makhelwane wakhe, naye kufanele entiwe njalo:

²⁰ nangabe amephule litsambo, nelakhe liyakwephulwa, liso ngeliso, litinyo ngelitinyo. Njengobe naye alimatile, kufanele naye alinyatwe.

²¹ Lowo lobulala sifuyo kufanele asihlawule, kodvwa lowo lobulala umuntfu naye kufanele abulawe.

²² Niyawuba nemtsetfo munye nonkhe, umuntfu wetive nome wekutalwa. NginguSimakadze, Nkulunkulu wenu.’ ”

²³ Mosi wakhuluma esiveni sema-Israyeli, bamkhiphela ngaphandle kwenkambu lomhlambalati, bamtselekela bamgcoba ngematje. Ngako-ke ema-Israyeli enta njengobe Simakadze abeyale Mosi.