Levithikusi 20 - Siswati 1996 Bible

Tijeziso tekungalaleli

¹ Simakadze wakhuluma kuMosi watsi:

² “Khuluma esiveni sema-Israyeli utsi: ‘Wonkhe um-Israyeli nome wetive lohlala nani lonikela ngemntfwana wakhe akhonte Moloki, kufanele abulawe. Sive sonkhe siyawumbulala ngekumgcoba ngematje.

³ Buso bami ngiyawubufulatselisa kulowo muntfu ngimncume esiveni sakubo, ngobe phela ngekunikela ngebantfwabakhe kuMoloki ungcolise indlu yami lengcwele, wahlambalata libito lami lelingcwele.

⁴ Nangabe sive sivala emehlo aso singabuki ngesikhatsi lomuntfu anikela ngemntfwanakhe kuMoloki, sehluleke nekumbulala,

⁵ ngiyawubufulatselisa buso bami kulowo muntfu kanye nasemndenini wakhe kanye nakulabo labamlandzelako ngekugwadla nekuphinga kwakhe naMoloki, angihlubuka.

⁶ “ ‘Ngiyawubufulatselisa buso bami kulowo muntfu locela lusito kulabaphansi agwadle nabo ngekubalandzela; yebo, lowo muntfu ngiyawumncuma esiveni sakubo.

⁷ Tigcineni nibe ngcwele, ngobe mine nginguSimakadze, Nkulunkulu wenu.

⁸ Gcinani imitsetfo yami, niyilandzele, ngobe ngimi loningcwelisako.

⁹ “ ‘Umuntfu localekisa uyise nome unina, kufanele abulawe, ngobe sewucalekise uyise nome unina; ingati yakhe iyawubasetikwakhe.

¹⁰ “ ‘Nangabe indvodza iphinga nemfati walenye indvodza, nome yamakhelwane wayo, bobabili, lesiphingi nalesiphingikati, kufanele babulawe.

¹¹ Nangabe indvodza ilala nemkayise, seyimhlazisile uyise. Bobabili, lendvodza nalomfati, kufanele babulawe; ingati yabo iyawubasetikwabo.

¹² Nangabe indvodza ilala namalokatana wayo, bobabili kufanele babulawe. Loku labakwentile kuphambene nemvelo; ingati yabo iyawubasetikwabo.

¹³ Nangabe indvodza ilala nendvodza njengobe yenta nayilele nalomsikati, bobabili bente intfo lesinengiso. Kufanele babulawe, ingati yabo iyawubasetikwabo.

¹⁴ Nangabe indvodza ishada nendvodzakati kanye nenina walendvodzakati, loko kubi. Lendvodza kanye nabo kufanele bashiswe ngemlilo, khona kungetikuba khona lokusinengiso emkhatsini wenu.

¹⁵ Nangabe indvodza ilala nesilwane, kufanele ibulawe, nalesilwane sibulawe.

¹⁶ Nangabe lomsikati etama kulala nesilwane, bulalani lomsikati kanye nalesilwane. Kufanele babulawe; ingati yabo iyawubasetikwabo.

¹⁷ “ ‘Nangabe indvodza ishada nadzadzewabo, ngeyise nome ngenina, balalane, loko kulihlazo. Kufanele bancunywe emehlweni ebantfu bakubo. Seyihlazise dzadzewabo, ngako iyawuba nelicala laloko.

¹⁸ Nangabe indvodza ilala nalomsikati asesesikhatsini, lendvodza seyembule kopha kwalona lomsikati, kantsi-ke vele naye sewukugwabulile loko kopha kwakhe. Bobabili kufanele bancunywe esiveni sakubo.

¹⁹ “ ‘Ungalali nadzadzewabonyoko nome dzadzewaboyihlo, ngobe loko kungahlazisa sihlobo sakho sengati; nobabili niyawuba nelicala.

²⁰ Nangabe indvodza ilala nadzadzewaboyise, seyihlazise umkhwenyewabo. Bayawuba nelicala, bafe bangenamntfwana.

²¹ Nangabe indvodza ishada nemkamnakabo umnakabo asaphila, leso sento sekungcola, ihlazise umnakabo. Bangeke bamtfole umntfwana.

²² “ ‘Gcinani yonkhe imitsetfo yami niyilandzele, khona lelive lapho nginimikisa khona kutsi niyewuhlala kulo lingeke linihlante.

²³ Ningacali nente lawo masiko aleto tive lengitatikhipha nisengakangeni. Tingicunulile ngalawo masiko ato.

²⁴ Kodvwa nine nganetsembisa kutsi lelo live labo, leligcwele lubisi neluju lwetinyosi liyawuba lenu, ngiyakunipha lona libe lifa lenu. NginguSimakadze, Nkulunkulu wenu, lonehlukise kuletinye tive.

²⁵ Ngako-ke kufanele niwente umehluko emkhatsini wetilwane letihlantekile naletingcolile ngekwemtsetfo, nasemkhatsini wetinyoni letihlantekile naletingcolile ngekwemtsetfo. Ningatingcolisi nome ngangusiphi silwane nome yinyoni nome ngayini lehamba emhlabatsini, leto lenginehlukanisele tona kutsi tingcolile kini.

²⁶ Kufanele nibe ngcwele kimi, ngobe mine, Simakadze, ngingcwele, ngitehlukanisele nine emkhatsini wetive tonkhe kutsi nibe sive sami.

²⁷ “ ‘Indvodza nome lomsikati losangoma nome longumtsakatsi nibombulala. Labo nibobagcoba ngematje baze bafe; ingati yabo iyawubasetikwabo.’ ”