Levithikusi 19 - Siswati 1996 Bible

Imitsetfo yekukhonta neyebungcwele

¹ Simakadze wakhuluma kuMosi, watsi:

² “Khuluma kulo lonkhe libandla lema-Israyeli, utsi: ‘Banini ngcwele, ngobe mine Simakadze, Nkulunkulu wenu, ngingcwele.

³ Nguloyo naloyo kufanele ahloniphe unina neyise, agcine emaSabatha ami. NginguSimakadze, Nkulunkulu wenu.

⁴ “ ‘Ningagucuki bese nikhonta tithico nome nitentele bonkulunkulu lababunjwe ngensimbi. NginguSimakadze, Nkulunkulu wenu.

⁵ “ ‘Naninikela umhlatjelo wekuthula kuSimakadze, wunikeleleni kutsi nemukeleke.

⁶ Kufanele udliwe ngalona lelo langa lonikelwe ngalo nome ngakusasa kwalo; loko lokusele kwaze kwaba lilanga lesitsatfu kuyawushiswa ngemlilo.

⁷ Nase kudliwa ngelilanga lesitsatfu, sekusinengiso, ngeke kwemukeleke.

⁸ Wonkhe lokudlako uyawuba nelicala, ngobe uhlambalate lokungcwele lokukwaSimakadze. Lowo muntfu kufanele ancunywe esiveni sakubo.

⁹ “ ‘Nanivuna sivuno selive lenu, aniyiwuvuna eminyeleni yemasimi enu, ningakhwimiti ngisho nekukhwimita emvakwekuvuna kwenu.

¹⁰ Aniyiwubuyela ensimini yenu yemagelebisi kuyawukhwimita, ningawabutsi nemagelebisi lawele phansi nakuvunwako, niwashiyele labamphofu nemihambima. NginguSimakadze, Nkulunkulu wenu.

¹¹ “ ‘Ningebi, ningakhohlisani. Ningacalelani emanga.

¹² Ningalifungeli lite libito lami, ningalihlambalati libito laNkulunkulu wenu. NginguSimakadze.

¹³ “ ‘Ungamebeli makhelwane wakho; ungawubambi umholo wesisebenti kuze kube ngakusasa.

¹⁴ Ungasicalekisi sihhulu, futsi ungayetsiyi imphumphutse, kodvwa uyakwesaba Nkulunkulu wakho. NginguSimakadze.

¹⁵ “ ‘Ungehluleli ngekukhetsa, ngekulahla lomphofu ngelicala uvune lomkhulu, kodvwa mehlulele ngekulunga makhelwane wakho.

¹⁶ Ungahambi unyundzela bantfu bakini; ungamelani nekuphila kwamakhelwane wakho, nginguSimakadze.

¹⁷ “ ‘Ungamtondzi umnakenu enhlitiyweni yakho; yekhuta makhelwane wakho ungamgegi, funa wetfwale licala kanye naye.

¹⁸ Ungatibuyiseleli nome ube nemagcubu nebantfwana bebantfu bakini, kodvwa uyawutsandza makhelwane wakho njengobe utitsandza wena. NginguSimakadze.

¹⁹ “ ‘Uyawugcina imiyalo yami. Awuyiwuvuma kutsi tinkhomati takho tekhwelwe tinkunzi talolunye luhlobo. Awuyiwuhlanyela ensimini yakho tinhlobo letimbili letehlukene. Ungembatsi lutfo lolwentiwe ngetinhlobo letimbili temtiya.

²⁰ “ ‘Nangabe indvodza ilala nengcuce yesigcili, isengakahlengwa futsi isengakakhululeki, kuyawuba licala, bayawujeziswa. Noko abayiwubulawa, ngobe lentfombatana beyisengakakhululeki.

²¹ Lendvodza kufanele iletse sihhanca kuSimakadze ekungeneni kwelithende lekuhlangana, sibe ngumnikelo wayo welicala kuSimakadze.

²² Umphristi uyawumentela inhlawulo yekubuyisana kuSimakadze ngalesihhanca semnikelo welicala embikwaSimakadze, leso sono sakhe siyawutsetselelwa.

²³ Naningena eveni bese nihlanyela nome nguluphi luhlobo lwesihlahla lesitselako, caphelani ningasidli sitselo saso, kuze kuphele iminyaka lemitsatfu, ngobe asikavumeleki leso sihlahla.

²⁴ Ngemnyaka wesine tonkhe titselo taso tiyawube setingcwele, setingumnikelo wekudvumisa kuSimakadze.

²⁵ Kodvwa ngemnyaka wesihlanu ningatidla titselo taso. Ngaleyo ndlela sivuno senu siyawukwandza. NginguSimakadze, Nkulunkulu wenu.

²⁶ “ ‘Ningayidli inyama lesenengati kuyo, ningabi tangoma nome labenta imilingo.

²⁷ Ningatihhuli tinwele tenu etinhlafunweni tenu nasetilevini tenu nikhombise kutsi nizilile.

²⁸ Ningatigati imitimba yenu nentele labafile nome nitibeke timphawu ngekutisika imitimba yenu; nginguSimakadze.

²⁹ “ ‘Ungahlazisi indvodzakati yakho ngekuyenta ingwadla, funa live lonkhe ligcwale bugwadla nako konkhe kungcola.

³⁰ Nibogcina liSabatha lami, nihloniphe indzawo yami lengcwele; nginguSimakadze.

³¹ “ ‘Ningayi kuyawukhendla kulabanemadloti nome kuyawuphengula etangomeni; ngobe nanenta loko, niyawuba ngulabangcolile. NginguSimakadze, Nkulunkulu wenu.

³² “ ‘Niyawutitfoba embikwalasebakhulile, nibahloniphe, nidvumise Nkulunkulu wenu. NginguSimakadze.

³³ “ ‘Ungamhluphi umuntfu longumchamuki lohleti nawe eveni lakini.

³⁴ Umchamuki lohlala eveni lakini ubomphatsa njengemuntfu wakini. Umtsandze njengobe utitsandza wena, ngobe nani nake naba tihambi eveni laseGibhithe. NginguSimakadze.

³⁵ “ ‘Ningenti bucili nanilinganisa budze nome sisindvo nome bunyenti.

³⁶ Nibosebentisa tilinganiso tebudze, netesisindvo kanye netebunyenti letisemtsetfweni. NginguSimakadze, Nkulunkulu wenu, lowanikhipha eGibhithe.

³⁷ Nibogcina yonkhe imiyalo yami nemitsetfo yami niyilandzele. NginguSimakadze.’ ”