Levithikusi 17 - Siswati 1996 Bible

Bungcwele bengati

¹ Simakadze wakhuluma kuMosi watsi:

² “Khuluma ku-Aroni nakumadvodzana akhe nakuwo onkhe ema-Israyeli, utsi: ‘Naku-ke Simakadze layale kutsi kwentiwe:

³ Wonkhe um-Israyeli lobulala inkhomo nome lizinyane lemvu nome imbuti, akubulalele ngekhatsi nome ngaphandle kwenkambu,

⁴ angakakuletsi ekungeneni kwelithende lekuhlangana kutsi atewukunikela kuSimakadze ethendeni lekukhontela embikwaSimakadze, lowo muntfu unelicala lekucitsa ingati. Kufanele ancunywe esiveni sakubo, ngobe sewucitse ingati.

⁵ Loku lokucondvwe ngulomtsetfo kutsi sive sema-Israyeli siletse kuSimakadze leto tilwane besitibulala esigangeni. Manje sesitawutiletsa kumphristi, ekungeneni kwelithende lekuhlangana tinikelwe kuSimakadze njengemhlatjelo wekuthula.

⁶ Umphristi utawufafata ingati elatini laSimakadze ekungeneni kwelithende lekuhlangana, ashise lamanoni, kube liphunga lelinuka lusi lolumnandzi kuSimakadze.

⁷ Kufanele bangasakuphindzi kunikela imihlatjelo yabo kuletithico letisatimbuti, labaphinga nato. Loku kutawuba ngumtsetfo wetitukulwane ngetitukulwane.’

⁸ “Khuluma kubo utsi: ‘Wonkhe um-Israyeli nome wetive lohlala nani lonikela ngemnikelo wekushiswa nome ngemhlatjelo,

⁹ kodvwa angawuletsi ekungeneni kwelithende lekuhlangana kutewunikela ngawo kuSimakadze, lowo muntfu kufanele ancunywe esiveni sakubo.

¹⁰ “ ‘Wonkhe umIsrayeli nome wetive lohlala nani lodla ingati, ngiyawumelana naye ngimncume esiveni sakubo.

¹¹ Phela kuphila kwemtimba kusengatini; mine ngininike ingati kutsi ifeze inkonzo yekuhlenga timphilo tenu etikwelilati. Ngobe yingati lefeza inkonzo yekubuyisana nekuhlenga imphilo.

¹² Ngako-ke nine ma-Israyeli, ngitsi kini: Ningacali niyidle ingati, kanjalo nabo futsi betive lebahlala emkhatsini wenu bangacali bayidle ingati.

¹³ “ ‘Wonkhe um-Israyeli nome wetive lohlala nani lotingela inyamatane nome inyoni ledliwako, kufanele aphomphise yonkhe lengati yayo, bese uyigcibedzela ngemhlaba,

¹⁴ ngobe phela kuphila kwenyama nome yasiphi silwane kusengatini yaso. Ngiko nje ngitsite kuma-Israyeli kufanele angayidli ingati nome yasiphi silwane, ngobe kuphila kwesilwane, nome ngusiphi, kusengatini yaso. Lowo loyidlako kufanele ancunywe.

¹⁵ “ ‘Wonkhe um-Israyeli nome wetive lohlala nani, lodla lokutfolakale kutifele nome kudzatjulwe tilwane tesiganga, kufanele ageze timphahla takhe nemtimba wakhe ngemanti, abe ngulongcolile kuze kuhlwe; utawube sewuyahlambuluka.

¹⁶ Kodvwa nangabe akatigezi timphahla takhe nemtimba wakhe ngemanti utawuba nelicala.’ ”