KumaHebheru 8 - Siswati 1996 Bible

Jesu umPhristi Lomkhulu wesivumelwane lesincono

¹ Umnyombo waloku lesesikushito ngunankhu: Tsine-ke sinalonjalo umPhristi Lomkhulu, losewahlala ngesekudla saLomkhulu losesihlalweni sebukhosi ezulwini.

² Nguye losikhonti endzaweni lengcwele, ethendeni lekuhlangana, lelingilo sibili lelakhiwa yiNkhosi, hhayi ngumuntfu.

³ Wonkhe umPhristi Lomkhulu ukhetselwa kunikela kuNkulunkulu ngetipho nangemihlatjelo, ngako-ke nalomPhristi Lomkhulu kudzingekile kutsi abe nako latakunikela.

⁴ Kube abesemhlabeni abengeke abe ngumphristi nakancane nje, ngobe phela lapha emhlabeni bakhona baphristi labanikela ngetipho ngekwemtsetfo.

⁵ Bona bakhontela kuloko lokungumfanekiso nesitfunti saloko lokunguko sibili kwasezulwini, ngobe ngesikhatsi Mosi asatakwakha lithende lekuhlangana, Nkulunkulu wamyala watsi: “Ucaphele kutsi konkhe ukwente ngaleyo ndlela lowakhonjiswa yona entsabeni.”

⁶ Kodvwa Khristu sewunikwe inkonzo lephakeme nalenkhulu kuneyabo, njengobe nalesivumelwane, languMlamuli waso emkhatsini waNkulunkulu nebantfu, singulesincono, ngobe sisekelwe tetsembiso letincono.

⁷ Kube sivumelwane sekucala besite sici, besingeke sidzingeke sivumelwane sesibili.

⁸ Kodvwa Nkulunkulu sive sakhe usikhandza sinesici nakatsi: “Tiyeta tikhatsi,” kusho iNkhosi, “lapho ngiyakwenta sivumelwane lesisha nesive saka-Israyeli, kanye nemndeni wakaJuda.

⁹ Lesivumelwane asiyiwufanana naleso lengasenta naboyise, ngesikhatsi ngibabamba ngesandla ngibakhipha eveni laseGibhithe. Abasigcinanga leso sivumelwane sami, ngako-ke nami angibange ngisabanaka,” isho iNkhosi.

¹⁰ “Ngulesi-ke sivumelwane lengiyawusenta nendlu yaka-Israyeli ngetikhatsi letitako,” isho iNkhosi, itsi: “Ngiyawufaka imisetfo yami etingcondvweni tabo, ngiyibhale etinhlitiyweni tabo, ngibe nguNkulunkulu wabo, bona babe sive sami.

¹¹ Kuyawubate sidzingo sekutsi makhelwane afundzise makhelwane, nome-ke lomunye afundzise umnakabo, atsi: ‘Yati iNkhosi,’ ngobe bonkhe bayawungati kusukela kulomncane kuze kube ngukulomdzala.

¹² Ngobe ngiyawuba nemusa ekoneni kwabo, ngingeke ngiphindze ngitikhumbule tono tabo.”

¹³ Nakakhuluma ngesivumelwane “lesisha”, Nkulunkulu usho kutsi lesi sekucala sesidzala. Loko lese kukudzala kusuke sekugugile, sekutawunyamalala masinyane.