KumaHebheru 7 - Siswati 1996 Bible

Melkhisedeki umphristi

¹ LoMelkhisedeki kwakuyinkhosi yaseSalema, angumphristi waNkulunkulu Losetikwako Konkhe. Ngesikhatsi Abrahama aphuma emphini lapho ancoba khona emakhosi lamane, Melkhisedeki wamhlangabeta, wambusisa.

² Abrahama wamnika kwelishumi kwako konkhe labekutfumbile. Lelibito lakhe lelitsi Melkhisedeki lisho kutsi: “INkhosi Yekulunga”; kantsi leli lelitsi iNkhosi yaseSalema lisho kutsi: “INkhosi Yekuthula”.

³ LoMelkhisedeki kute umlandvo lowatiwako ngeyise nome ngenina nome ngabokhokho bakhe, kute lokwatiwako ngekutalwa nangekufa kwakhe; kodvwa ufanana neNdvodzana yaNkulunkulu ngekutsi ungumphristi loyawuhlala akhona phakadze naphakadze.

⁴ Ase nibuke nje kutsi abemkhulu kanganani! Abrahama, khokho wetfu, wamnika kwelishumi kwako konkhe labekutfumbile.

⁵ Titukulwane taLevi letemukela buphristi tinemiyalo emtsetfweni kutsi titsatse kwelishumi kubo bonkhe bantfu. Phela bakutsatsa kubantfu besive sakubo lesaphuma ku-Abrahama.

⁶ Kodvwa lomuntfu abengesiye wesitukulwane saLevi, watsatsa kwelishumi ku-Abrahama, wase ubusisa lowo abenetetsembiso.

⁷ Akuphikeki kutsi lomncane ubusiswa ngulomkhulu.

⁸ Kwelishumi kwemukelwa baphristi lababuye bafe; kodvwa ngaMelkhisedeki kwelishumi kwemukelwa ngulophilako, njengobe umBhalo usho.

⁹ Kungashiwo nekutsi naLevi matfupha, lowemukela kwelishumi, abekukhipha nga-Abrahama,

¹⁰ ngobe phela Levi abeselukhalweni lwakhokho wakhe Abrahama ngesikhatsi ahlangana naMelkhisedeki.

¹¹ Baka-Israyeli bemukela umtsetfo ngaphansi kwebaphristi. Nangabe kuphelela kwemukeleka ngebuphristi bakaLevi, sasiyawuba khona yini lesinye sidzingo semphristi ngekuma kwaMelkhisedeki, kunalowo lowemiswa ngekuma kwa-Aroni?

¹² Ngobe nakunengucuko ebuphristini, nakanjani kufanele kube nengucuko nasemtsetfweni.

¹³ Ngobe lona lekukhulunywa ngaye letintfo abewalesinye sive, lekungazange sekube khona namunye kuso lowake waba ngumphristi, wakhonta elatini.

¹⁴ Ngobe kuyakhanya kutsi iNkhosi yetfu yatalwa esiveni sakaJuda, kunjalo nje naMosi akazange akhulume ngebaphristi bakuleso sive.

Lomunye umphristi lonjengaMelkhisedeki

¹⁵ Loku kubuye kukhanye kakhulu, nasekuvela lomunye umphristi ngendlela yaMelkhisedeki.

¹⁶ Waba ngumphristi, hhayi ngemtsetfo lababebekwa ngawo bantfu, kodvwa ngemandla emphilo lengabhubhi.

¹⁷ Ngobe umBhalo uyakufakaza loko, utsi: “Wena ungumphristi loyawuhlala akhona phakadze naphakadze, ngekuma kwaMelkhisedeki.”

¹⁸ Umyalo wekucala sewubekwe eceleni ngenca yebutsakatsaka bawo nekungabi nalusito kwawo,

¹⁹ ngobe umtsetfo awuphelelisi lutfo. Kodvwa sesinikwe litsemba lelisha nalelincono, lesingasondzela ngalo kuNkulunkulu.

²⁰ Ngetulu kwaloko linesifungo saNkulunkulu. Kadzeni besingentiwa sifungo nakubekwa baphristi.

²¹ Kodvwa Jesu waba ngumphristi ngesifungo ngesikhatsi Nkulunkulu atsi: “INkhosi yente sifungo, futsi ingeke iyigucule ingcondvo yayo: ‘Wena ungumphristi loyawuhlala akhona phakadze naphakadze.’ ”

²² Nguloko-ke lokwenta kutsi Jesu abe sibambiso sesivumelwane lesincono.

²³ Baphristi bekucala babebanyenti, ngobe kufa kwakumvimba lowo nalowo kutsi achubeke nalowo msebenti.

²⁴ Kodvwa buphristi baJesu abupheli, ngobe yena uhlala akhona kuze kube phakadze.

²⁵ Ngako-ke unawo emandla ekubasindzisa ngalokuphelele labo labasondzela ngaye kuNkulunkulu, njengobe yena aphilela kubancusela ngaso sonkhe sikhatsi.

²⁶ Jesu-ke ungumPhristi Lomkhulu lohlangabetana netidzingo tetfu. Ungcwele, ute sici nome sono, akasoleki; wehlukaniswa netoni, waphakanyiswa waba ngetulu kwemazulu.

²⁷ Yena akadzingi kunikela imihlatjelo yekushiswa njengalaba labanye baphristi labakhulu lababeyinikela onkhe emalanga, ngekutinikelela bona tono tabo kucala, bese banikelela tono talabanye. Kodvwa yena loko wakwenta kwaba kanye, kwenela, ngesikhatsi anikela ngaye lucobo lwakhe.

²⁸ Empeleni, umtsetfo ubeka bantfu labanebutsakatsaka, ubente babe baphristi labakhulu; kodvwa livi laNkulunkulu lelaciniswa ngesifungo, nalelefika muva kunemtsetfo, ngilo lelabeka iNdvodzana leyentiwa yaphelela kuze kube phakadze.