KumaHebheru 6 - Siswati 1996 Bible

¹ Ngako-ke asitishiye timfundziso tekucatfuta evini laKhristu, sendlulele kuletingembili talasebavutsiwe eNkhosini. Asikuyekele kuphindza sibeke sisekelo ngekushumayela kuphendvuka emisebentini lefile, kanye nesekukholwa kuNkulunkulu.

² Asikuyekele futsi kuphindza sinifundzise ngemibhabhatiso letinhlobonhlobo, nangekubekwa tandla, nangekuvuswa kwalabafile, nangekwehlulelwa kwaphakadze.

³ Loku siyawukwenta, nakuvuma Nkulunkulu.

⁴ Kukhona labake bakhanyiselwa, banambitsa sipho sasezulwini, badzimate baba nesabelo saMoya Longcwele.

⁵ Labo-ke labanambitse kulunga kwelivi laNkulunkulu baweva nemandla ekuphila lokutako,

⁶ nase bahlubuka, kusho kutsi bona matfupha sebaphindze batibetselela iNdvodzana yaNkulunkulu esiphambanweni, bayitsela ngelihlazo ebaleni; labo kungeke kwenteke kutsi baphindze baphendvuke.

⁷ Umhlabatsi lonatsa emanti emvula nayina njalo nje, bese umilisa tilimo letiba lusito kulabo labawulimako, ubusiswa nguNkulunkulu.

⁸ Kodvwa nangabe umhlaba umilisa emanyeva netinchachabutane, awunamsebenti walutfo, futsi usengotini yekucalekiswa nguNkulunkulu; nesiphetfo sawo kushiswa ngemlilo.

⁹ Kodvwa, bazalwane bami, nome sikhuluma kanjena nje, asesabi lutfo ngani, ngobe siyanati kutsi ninako lokuncono lokumacondzana nensindziso yenu.

¹⁰ Ngobe phela Nkulunkulu akakhetsi, futsi angeke ayikhohlwe imisebenti yenu nelutsandvo lenilukhombise ekusiteni labangcwele, njengobe nenta namanje.

¹¹ Sifisa shangatsi ngulowo nalowo kini angakhombisa loko kushisekela, nekuciniseka etsembeni lenu, kuze kube ngusekugcineni.

¹² Sifisa kutsi ningavilaphi, kodvwa nibe njengabo labo labadla lifa letetsembiso ngekukholwa nangekubeketela.

Setsembiso saNkulunkulu lesicinisekile

¹³ Ngesikhatsi Nkulunkulu etsembisa Abrahama, bekute labemkhulu kunaye labengamfunga, ngako-ke watifunga yena matfupha.

¹⁴ Watsi: “Ngiyawukubusisa nekukubusisa, ngikwandzise nekukwandzisa.”

¹⁵ Abrahama wabeketela, ngako wemukela setsembiso.

¹⁶ Nangabe umuntfu afunga, usebentisa libito lalomunye lomkhulu kunaye. Sifungo siyacinisa, sicedze kuphikisana kwebantfu.

¹⁷ Kulabo labebafanele kwemukela loko kwakutsenjisiwe, Nkulunkulu watimisela kukukhanyisa kahle kutsi yena ngeke ayigucule injongo yakhe, ngiko nje acinisa tetsembiso takhe ngekufunga.

¹⁸ Ngako-ke Nkulunkulu wasebentisa tintfo letimbili langeke agucuke kuto: setsembiso nesifungo. Tsine-ke lesesitfole kuphepha kuye kufanele sibe nekukhutsatela lokukhulu, siphutfume lelitsemba leselibekwe embikwetfu.

¹⁹ Ngulelo litsemba letfu lemiphefumulo yetfu. Linjengesisimiso semkhumbi, lisiphephelo lesicinile, lingenisana ngekhatsi kwesihenco, endzaweni lengcwelengcwele,

²⁰ lapho Jesu angena khona njengemvuli wendlela lomele tsine, waba ngumPhristi Lomkhulu loyawuhlala akhona phakadze naphakadze, ngekuma kwaMelkhisedeki.