KumaHebheru 5 - Siswati 1996 Bible

¹ Lowo nalowo mPhristi Lomkhulu ukhetfwa emkhatsini webantfu amiselwe kumela bantfu kuNkulunkulu, kuze anikele tipho nemihlatjelo ngenca yetono.

² Lowo-ke angababeketelela labo labangati lutfo nalaba labedukako, ngobe kwayena unebutsakatsaka.

³ Ngenca yalobo butsakatsaka bakhe, naye kudzingekile kutsi ente iminikelo yetono takhe, njengobe abentela labanye bantfu.

⁴ Kute umuntfu lotitsatsela lesikhundla ngaphandle kwekutsi abitwe nguNkulunkulu, njengobe na-Aroni abitwa.

⁵ Ngako-ke naKhristu akatitsatselanga lesikhundla sekuba ngumPhristi Lomkhulu; kodvwa wamiswa nguNkulunkulu lowatsi kuye: “Wena uyiNdvodzana yami; lamuhla ngikutele.”

⁶ Uphindze atsi kulenye indzawo: “Wena ungumphristi loyawuhlala akhona kuze kube phakadze, ngekuma kwaMelkhisedeki.”

⁷ Asesemhlabeni, Jesu wanikela ngekuthandaza, nangekuncusa, nangekukhala lokukhulu, nangetinyembeti, akhala kulowo lonemandla ekumsindzisa ekufeni, wevakala ngenca yekumesaba Nkulunkulu.

⁸ Nome abeyiNdvodzana, wafundza kulalela ngekuhlupheka kwakhe,

⁹ kwase kutsi ngekupheleliswa kwakhe waba ngumtfombo wensindziso yaphakadze yabo bonkhe labo labamlalelako,

¹⁰ Nkulunkulu asammise kutsi abe ngumPhristi Lomkhulu ngekuma kwaMelkhisedeki.

Secwayiso ngekuhlubuka

¹¹ Mayelana naloku kunyenti lesingakusho, kodvwa kulukhuni kunichazela, ngobe naku senaba butfuntfu ekuveni.

¹² Bekufanele kutsi ngabe senibafundzisi nyalo, kodvwa nisadzinga lotanifundzisa, nicalele phansi etinyatselweni tekucala temfundziso yelivi laNkulunkulu. Solo nidzinga lubisi, hhayi kudla lokucinile.

¹³ Ngobe lowo losaphila ngelubisi usengakakhuli evini lekulunga; useluswane.

¹⁴ Kudla lokucinile kwebantfu lasebakhulile, lasebanemicondvo lehlutekile, leseyikwati kwehlukanisa lokuhle nalokubi.