KumaHebheru 4 - Siswati 1996 Bible

¹ Ngako-ke asesabe, funa kube khona emkhatsini wenu lobonakala shangatsi sewusigejile lesitfuba, ngobe sisemile lesetsembiso saNkulunkulu sekungena ekuphumuleni kwakhe.

² LiVangeli lishunyayelwe kitsi, njengobe lashunyayelwa nakulabo bakadzeni. Kodvwa lelivi labaliva alizange libasite; ngobe naloku baliva ngetindlebe nje abazange balikholwe ngetinhlitiyo.

³ Tsine lesikholwako siyangena ekuphumuleni kwakhe, njengobe washo watsi: “Ekutfukutseleni kwami ngafunga ngatsi: ‘Bangeke basangena ekuphumuleni kwami.’ ” Noko imisebenti yakhe yase iphelelisiwe kusukela ekudalweni kwemhlaba.

⁴ Ngobe ngiko lokushiwo ngumBhalo ngelilanga lesikhombisa kutsi: “Ngelilanga lesikhombisa Nkulunkulu waphumula kuyo yonkhe imisebenti yakhe.”

⁵ Kodvwa uphindze atsi kulendzawo: “Bangeke basangena ekuphumuleni kwami.”

⁶ Kuyakhanya-ke kutsi nanyalo umnyango usavuliwe kutsi labo labatsandzako basengangena ekuphumuleni kwakhe, ngobe phela labo labaliva kucala liVangeli abangenanga ngenca yekungalaleli kwabo.

⁷ Loku-ke Nkulunkulu ukukhombise ngekutsi akhetse lelinye lilanga lekutsiwa ngu “lamuhla”. Wakhuluma ngaDavide emvakweminyaka leminyenti, njengobe kubhaliwe, watsi: “Lamuhla, naniliva livi lami, ningatenti tibe lukhuni tinhlitiyo tenu.”

⁸ Kube Joshuwa wabanika loko kuphumula, Nkulunkulu abengeke aphindze akhulume ngalelinye lilanga.

⁹ Ngako-ke kuphumula kweliSabatha kusabasalele bantfu baNkulunkulu.

¹⁰ Ngobe lowo longene ekuphumuleni kwaNkulunkulu, naye uphumula emisebentini yakhe, njengobe naNkulunkulu aphumula kuyakhe.

¹¹ Ngako-ke asikhutsalele kungena kuloko kuphumula, kubete lowehluleka ngenca yekungalaleli njengabo.

Livi laNkulunkulu liphilile

¹² Livi laNkulunkulu liphilile, linemandla; likhalipha kwengca inkemba lesika ngetinhlangotsi totimbili. Lisika lidzimate lehlukanise umphefumulo nemoya, emalunga nemnkantja, lehlulele imicabango netifiso tenhlitiyo.

¹³ Kute sidalwa lesifihlakele kuNkulunkulu, kodvwa konkhe kusebaleni kwembuliwe emehlweni alowo lekufanele sitilandze kuye.

Jesu ungumPhristi Lomkhulu kakhulu

¹⁴ Njengobe sinemPhristi Lomkhulu kakhulu, Jesu iNdvodzana yaNkulunkulu, lodzabule emazulu, asibambelele kuso sivumo sekukholwa kwetfu.

¹⁵ LomPhristi wetfu Lomkhulu akasiye lowehluleka kuvelana natsi ebutsakatsakeni betfu, kodvwa walingwa ngayo yonkhe indlela njengatsi, noko akazange one.

¹⁶ Ngako-ke asisondzele ngesibindzi esihlalweni semusa, khona sitekwemukela sihawu, sitfole umusa lotasisita ngesikhatsi lesifanele.