KumaHebheru 11 - Siswati 1996 Bible

Kukholwa

¹ Kukholwa kukuciniseka ngetintfo lesetsembele kuto, kukweneliseka ngetintfo lesingakatiboni.

² Bokhokho betfu bemukeleka ngaloko kukholwa kwabo kuNkulunkulu.

³ Ngekukholwa sicondza kutsi Nkulunkulu wadala indalo yonkhe ngelivi lakhe, kwaze kwatsi loko lokubonakalako kwavela kulokungabonakali.

⁴ Ngekukholwa Abela wanikela kuNkulunkulu ngemnikelo lowemukelekako kunewaKhayini. Ngiko lokwamenta wemukeleka njengemuntfu lolungile kuNkulunkulu, ngobe loko kwafakazeleka ngekutsi Nkulunkulu emukele tipho takhe. Nanyalo usakhuluma ngekukholwa kwakhe nome sekadze afa.

⁵ Ngekukholwa Enoke watsatfwa, kuze angakuboni kufa; akazange aphindze abonakale, ngobe Nkulunkulu abesamtsetse. UmBhalo utsi angakatsatfwa wajabulisa Nkulunkulu.

⁶ Umuntfu lote kukholwa angeke akhone kujabulisa Nkulunkulu; ngobe lota kuNkulunkulu kufanele akholwe kutsi Nkulunkulu uyaphila nekutsi uyabavuza labo labamfunako.

⁷ Ngekukholwa Nowa walalela tecwayiso taNkulunkulu ngetintfo letatingakabonakali letatitakwenteka. Walalela Nkulunkulu ngekwakha umkhumbi wekuphephisa umndeni wakhe. Ngekukholwa wadalula bubi belive, wase uba yindlalifa yekulunga lokutfolakala ngekukholwa.

⁸ Ngekukholwa Abrahama walalela, nakabitwa nguNkulunkulu kutsi aye endzaweni labetawunikwa yona ibe lifa lakhe; waphuma, wahamba, angati lapho aya khona.

⁹ Ngekukholwa waba sihambi eveni labetsenjiswe lona. Wahlala emathendeni; benta njalo nabo-Isaka naJakobe. Nabo baba tindlalifa kanye naye kuso leso setsembiso,

¹⁰ ngobe Abrahama abebheke lelo khaya lelinetisekelo, lelimsunguli nemakhi walo kunguNkulunkulu.

¹¹ Ngekukholwa Sara wemukela emandla ekukhulelwa, nome abesandlulile eminyakeni yakhe yekutetfwala. Wetsemba kutsi Nkulunkulu utasigcina setsembiso sakhe.

¹² Nome Abrahama bese kufanana nekutsi ufile ngebudzala, noko kuye yedvwa nje kwatalwa titukulwane letinyenti letingangetinkhanyeti tesibhakabhaka, nangangesihlabatsi saselugwini lwelwandle lesingenawubalwa.

¹³ Bonkhe laba bafa bakholiwe bangakakwemukeli loko lababetsenjiswe kona, kodvwa bakubona bakwemukela kusekhashane, bavuma kutsi lapha emhlabeni babafokati netihambi.

¹⁴ Labo labakhuluma kanje, bakubeka ebaleni kutsi bafuna live labo lemdzabo.

¹⁵ Kube babelikhumbula live lababephuma kulo, ngabe bafuna litfuba lekubuyela kulo.

¹⁶ Esikhundleni saloko, babelangatelela live lelincono, lokusho kutsi: lizulu. Ngako-ke Nkulunkulu akanamahloni kutibita ngekutsi nguNkulunkulu wabo, ngobe ubalungiselele lelo khaya.

¹⁷ Ngekukholwa Abrahama, nakavivinywa, wanikela nga-Isaka kutsi abe ngumhlatjelo. Nome Abrahama abesatemukele leto tetsembiso, kodvwa abetimisele kunikela ngayo yona leyo ndvodzana yakhe yekuphela.

¹⁸ Nkulunkulu abekhulume kuye watsi: “Titukulwane takho tiyawubitwa nga-Isaka.”

¹⁹ Abrahama wabona kutsi Nkulunkulu unemandla ekuvusa umuntfu ngisho kulabafile; ngiko nje, ngekufanekisa, Abrahama emukela Isaka asaphila.

²⁰ Ngekukholwa Isaka wabusisa likusasa laJakobe na-Esawu.

²¹ Ngekukholwa Jakobe, nasafa, wabusisa onkhe emadvodzana aJosefa, ngayinye; wakhuleka avinyelele etikweludvondvolo lwakhe.

²² Ngekukholwa Josefa asatawufa, waphawula ngekuphuma kwema-Israyeli eGibhithe, wabanika imiyalo mayelana nekungcwatjwa kwakhe.

²³ Ngekukholwa batali baMosi, aseluswane, bamfihla tinyanga letintsatfu, ngobe bambona kutsi muhle; abesabanga kungawulaleli umtsetfo wenkhosi yaseGibhithe.

²⁴ Ngekukholwa Mosi, asakhulile, wala kubitwa ngekutsi yindvodzana yendvodzakati yaFaro.

²⁵ Wakhetsa kuhlupheka nesive saNkulunkulu kunekutijabulisa esonweni kwesikhashana.

²⁶ Wabona kutsi kwetfukwa ngenca yaKhristu kwakungumcebo loncono kunemcebo waseGibhithe, ngobe phela abebheke umvuzo.

²⁷ Ngekukholwa Mosi wesuka eGibhithe, angesabi kutfukutsela kwenkhosi yakhona; wacinisela kwaba shangatsi uyambona longabonwa.

²⁸ Ngekukholwa wasungula liPhasika ngekunyenyeta ingati, kuze kutsi ematubulo ema-Israyeli angabulawa ngumbulali.

²⁹ Ngekukholwa ema-Israyeli ewela Lwandle Lolubovu, kwaba shangatsi kusemhlabatsini lowomile; atsi emaGibhithe ayakwenta loko, acwila, afa.

³⁰ Ngekukholwa lubondza lwaseJerikho lwabhidlika, ema-Israyeli asatitungelete emalanga lasikhombisa.

³¹ Ngekukholwa Rahabi, ingwadla, akabulawanga kanye nalabo lababengakholwa, ngobe wemukela tinhloli tema-Israyeli ngemoya lomuhle.

³² Ngingachubeka ngitsini nje? Sikhatsi asingivumeli kutsi ngilandze ngaGideyoni, naBharaki, naSamsoni, naJafta, naDavide, naSamuweli, nebaphrofethi.

³³ Ngekukholwa balwa bancoba imibuso, benta kulunga, bazuza tetsembiso, bavimba imilomo yemabhubesi,

³⁴ bacima emandla emlilo, baphepha enkembeni, baphiwa emandla ebutsakatsakeni, baba ngemachawe ekulweni timphi, badzimate baticosha timphi tebetive.

³⁵ Labasikati bemukeliswa labafile babo bavusiwe. Labanya babetfoswa ngetinhlupho letitinhlobonhlobo bangete bavuma kukhululwa, kuze bemukeliswe lokuncono lokukuvuswa kulabafile.

³⁶ Labanye baphukutwa, bashaywa, baboshwa ngetinketane ejele.

³⁷ Bagcotjwa ngematje, [bavivinywa] bancunywa ngemasaha, babulawa ngenkemba, bazulazula bembetse tikhumba tetimvu netetimbuti, beswela, bahlushwa, baphatfwa kabi.

³⁸ Live lalingakabafaneli; bazulazula emahlane, nasetintsabeni, nasemihumeni, nasemigedzeni yemhlaba.

³⁹ Bonkhe laba, bemukeleka ngekukholwa kwabo, kodvwa abazange bakwemukele lababetsenjiswe kona,

⁴⁰ ngobe Nkulunkulu abesakubonenchanti lokuncono lokusifanele kutsi abaphelelise sebakanye natsi.