KumaHebheru 10 - Siswati 1996 Bible

Umhlatjelo longuKhristu longiwo sibili

¹ Umtsetfo usitfunti setintfo letinhle letatitawufika; ute simo lekungiso sibili saletintfo. Ngemihlatjelo yawo, lenikelwa iminyaka ngeminyaka, lomtsetfo ungeke ubente baphelele labo labakhontako.

² Kube labo labakhonta Nkulunkulu bebahlanjululwa ngemtsetfo etonweni kube kanye, ngabe imihlatjelo seyayekelwa kwentiwa, futsi bebangeke baphindze bative banelicala lekona.

³ Kodvwa ngalemihlatjelo bantfu bakhunjutwa ngetono tabo iminyaka ngeminyaka;

⁴ ngobe kungeke kwenteke kutsi ingati yetinkunzi neyetimbuti itisuse tono.

⁵ Kungako nje, Jesu naketa lapha emhlabeni, watsi: “Umhlatjelo neminikelo awunandzaba nayo, kodvwa ungilungiselele umtimba.

⁶ Awujatjuliswanga yiminikelo yekushiswa neminikelo yetono.

⁷ Ngase ngitsi: ‘Naku, ngilapha! Ngitekwenta intsandvo yakho, Nkulunkulu; njengobe kubhaliwe ngami emculwini.’ ”

⁸ Kwekucala utsi: “Awuyifunanga imihlatjelo neminikelo, njengeminikelo yekushiswa neminikelo yetono, futsi awujatjuliswanga ngiyo.” Noko yonkhe leminikelo inikelwa ngekwemtsetfo.

⁹ Wase uphindze utsi: “Naku, ngilapha! Ngitekwenta intsandvo yakho.” Ucitsa kwekucala, khona atewumisa kwesibili.

¹⁰ Njengobe Jesu Khristu wenta intsandvo yaNkulunkulu, wanikela ngemtimba wakhe, sesihlanjululwe kwaba kanye kwenela.

¹¹ Wonkhe umphristi uma njalo nje aphindzaphindze ente inkonzo yakhe, anikela ngayo yona leyo mihlatjelo lengatisusi tono.

¹² Kodvwa kwatsi Khristu nasanikele kwaba kanye kwenela ngemhlatjelo munye wetono, wase uhlala ngesekudla saNkulunkulu,

¹³ lapho asahleti khona amele kutsi titsa takhe tize tifakwe ngaphansi kwetinyawo takhe.

¹⁴ Ngobe ngamnikelo munye ubahlante bonkhe, wabenta baphelela kuze kube phakadze.

¹⁵ NaMoya Longcwele usinika bufakazi bakhe. Kwekucala utsi:

¹⁶ “ ‘Ngulesi-ke sivumelwane lengiyawusenta nabo ngetikhatsi letitako,’ kusho iNkhosi. ‘Ngiyawufaka imitsetfo yami etinhlitiyweni tabo, ngiyibhale etingcondvweni tabo.’ ”

¹⁷ Uphindze atsi: “Ngingeke ngiphindze futsi ngitikhumbule tono nebubi babo.”

¹⁸ Ngako-ke lapho kunekutsetselelwa kwetono khona, sekute nesidzingo sekunikela ngenca yesono.

Asisondzele kuNkulunkulu

¹⁹ Ngako-ke, bazalwane, ingati yaJesu isikhululile kutsi singangena ngesibindzi endzaweni lengcwelengcwele.

²⁰ Lendlela lese sivulelwe yona yinsha, futsi iyaphila, idzabula sihenco iphumele ngale kwaso, sona-ke singumtimba waJesu.

²¹ Ngetulu kwaloko-ke tsine sesinemPhristi Lomkhulu lowengamele indlu yaNkulunkulu.

²² Ngako-ke asisondzele kuNkulunkulu ngenhlitiyo lecinisile, nangekwetsemba lokuphelele kwekukholwa, tinhlitiyo tetfu tinyenyetiwe tahlanjululwa kunembeza lomubi, nemitimba yetfu igeziwe ngemanti lahlobile.

²³ Asibambelele kuso sivumo selitsemba letfu, singangabati, ngobe yena lowenta lesetsembiso wetsembekile ekutigcineni tetsembiso takhe.

²⁴ Ngako-ke asinakane, sisitane ngekukhutsatana elutsandvweni nasemisebentini lemihle.

²⁵ Singakuyekeli kuhlangana ndzawonye, njengobe labanye sebanemkhuba wekungahlangani; kodvwa asikhutsatane kakhulu, njengobe nani niyabona kutsi lilanga selisondzele.

Nkulunkulu uyatehlulela tono letentiwa ngemabomu

²⁶ Nasona ngemabomu sesilati liciniso, sekute umhlatjelo longesula tono,

²⁷ kodvwa sekusele kutsi ngekwesaba lokukhulu silindzele kwehlulelwa nemlilo loshisa ngelulaka loyawucedza emaphikankhani.

²⁸ Umuntfu lowephula umtsetfo waMosi ufa ngaphandle kwekuhawukelwa, ngebufakazi bebantfu lababili nome labatsatfu.

²⁹ Nicabanga kutsi siyawuba sikhulu kangakanani-ke sijeziso salowo logcobagcoba iNdvodzana yaNkulunkulu, edzelele ingati yesivumelwane lahlanjululwe ngayo, etfuke Moya wesihawu?

³⁰ Siyamati lowo lowatsi: “Kubuyisela ngekwami, ngimi lotawunenanela.” Uphindze atsi: “Simakadze uyawusehlulela sive sakhe.”

³¹ Maye, kuyesabeka kwehlulelwa nguNkulunkulu lophilako!

Cinani ekukholweni

³² Kodvwa khumbulani emalanga ekucala, lekwatsi emvakwekukhanyiswa kwenu, nacinisela ekukhutsateleni kuhlangabetana netinhlupheko.

³³ Ngaletinye tikhatsi nanetfukwa nihlukumetwe emkhatsini webantfu, nangaletinye tikhatsi nanitfwalisana nalabo bebaphetfwe ngaleyo ndlela.

³⁴ Naba nesihawu kulabo bebaboshiwe, nacinisela ngekujabula nanemukwa timphahla tenu, ngobe nanati kutsi nine ninalokuncono lokukhonsako.

³⁵ Ngako-ke ningasilahli lesibindzi senu sekwetsemba Nkulunkulu, ngobe sinemvuzo lomkhulu.

³⁶ Nidzinga kucinisela kuze kutsi nase nente intsandvo yaNkulunkulu, nitekwemukela loko lokwatsenjiswa nguye.

³⁷ UmBhalo utsi: “Kusasele sikhashana nje kutsi lowo lotako afike, angeke alibale.

³⁸ Kodvwa lolungile wami ngekukholwa uyawuphila; kodvwa nangabe ahlehla nyova, ngingeke ngimjabulele.”

³⁹ Kepha tsine asikho kulabo labahlehla nyova badzimate babhubhe; kodvwa sikulabo labanekukholwa, aze Nkulunkulu asindzise imiphefumulo yabo.