KubaseRoma 5 - Siswati 1996 Bible

Umphumela wekubuyisana naNkulunkulu

¹ Njengobe sesentiwe semukeleka kuNkulunkulu kutsi silungile ngekukholwa, sesinekuthula naNkulunkulu ngeNkhosi yetfu Jesu Khristu.

² Ngaye loJesu Khristu sinekungena ngekukholwa kulomusa lesesime kuwo; siyabonga sijabulela litsemba lebukhosi baNkulunkulu lobutawuba betfu.

³ Ngetulu kwaloko siyabonga nasetinhluphekweni tetfu, ngobe siyati kutsi tinhlupheko tiveta kubeketela.

⁴ Kubeketela kuveta kuciniseka, kuciniseka kudala litsemba.

⁵ Litsemba alijabhisi, ngobe lutsandvo lwaNkulunkulu selutselwe etinhlitiyweni tetfu ngaMoya Longcwele, lesinikwe yena.

⁶ Ngobe kwatsi sisebutsakatsaka, Khristu wafela labangamesabi Nkulunkulu; wafa ngesikhatsi lesifanele.

⁷ Kulukhuni kabi kutsi umuntfu afele lomunye umuntfu nome ngabe umsulwa. Mhlawumbe kukhona longaba nesibindzi sekufela umuntfu lolungile.

⁸ Kodvwa-ke Nkulunkulu sewulukhombisile lutsandvo lwakhe kitsi ngekutsi sisetoni Khristu wafa esikhundleni setfu.

⁹ Sesentiwe ngengati yaJesu semukeleka kuNkulunkulu kutsi silungile, ngetulu kwaloko siyawusindziswa ngaye elulakeni lwaNkulunkulu.

¹⁰ Ngobe nangabe kwatsi sisetitsa satfola kubuyisana naNkulunkulu ngekufa kweNdvodzana yakhe, kakhulu kanganani-ke nase sibuyisene naye siyawusindziswa ngekuphila kwayo.

¹¹ Noko akusiko loko kuphela, kodvwa siphindze sijabula kuNkulunkulu ngaJesu Khristu iNkhosi yetfu lokungaye semukeliswe kubuyisana naNkulunkulu.

Adamu naKhristu

¹² Sono sangena ngemuntfu munye emhlabeni, sangena nekufa, kufa kwase kwendlulela kubo bonkhe bantfu, njengobe bonkhe bonile.

¹³ Sono sasikhona emhlabeni usengakabekwa umtsetfo; kodvwa lapho kute khona umtsetfo, sono asibalelwa kumuntfu.

¹⁴ Kodvwa kusukela esikhatsini sa-Adamu kuye esikhatsini saMosi bonkhe bantfu babuswa kufa, ngisho nalabo labangazange bone njenga-Adamu. Adamu abesitfunti salowo abetawufika.

¹⁵ Kodvwa sono sa-Adamu singeke silinganiswe nesipho saNkulunkulu semusa; ngobe nangabe ngesiphambuko semuntfu munye kwafa labanyenti, kakhulu kangakanani-ke ngesipho lesingumuntfu longuJesu Khristu, umusa waNkulunkulu wenela bantfu labanyenti.

¹⁶ Kukhona umehluko emkhatsini wesipho saNkulunkulu nemphumela wesono salowo muntfu munye: Nganhlanye kunesehlulelo ngenca yesono sinye kube kubhujiswa; nganhlanye kunesipho saNkulunkulu semusa lesisusa tono letinyenti kube kulunga lokwemukeleka kuNkulunkulu.

¹⁷ Nangabe ngesono semuntfu munye kufa kwacala kubusa ngaye, kakhulu kanganani-ke labo labemukela umusa lochichimako nesipho sekulunga bayawubusa ekuphileni ngemuntfu munye longuJesu Khristu.

¹⁸ Njengobe ngesono sinye bonkhe bantfu banesijeziso sekufa, ngalokufananako ngesento sinye lesilungile bonkhe bayakwentiwa balungelane naNkulunkulu ekuphileni.

¹⁹ Njengobe ngekungalaleli kwemuntfu munye labanyenti baba toni, ngalokufananako ngekulalela kwemuntfu munye longuKhristu labanyenti bentiwa balungelana naNkulunkulu.

²⁰ Umtsetfo wefikela kwandzisa siphambuko, kodvwa ngekwandza kwesono nemusa waNkulunkulu wandza kakhulu.

²¹ Ngako-ke, njengobe sono sabusa kwaba kufa, ngalokufananako kubusa kwemusa kwaba kulunga lokusiholela ekuphileni kwaphakadze ngaJesu Khristu iNkhosi yetfu.