KubaseRoma 3 - Siswati 1996 Bible

¹ Pho, emaJuda ancono ngani kunalabanye bantfu? Kusita ngani kusoka?

² Vele kusita ngalokuphelele. Kwekucala Nkulunkulu emavi akhe wawaphatsisa emaJuda.

³ Pho, nangabe lamanye emaJuda angazange etsembeke-ke, ngabe loko kusho kutsi kungetsembeki kwawo kungacedza kwetsembeka kwaNkulunkulu yini?

⁴ Cha, akusho loko. Nkulunkulu wetsembekile, nome bonkhe bantfu bangaba nemanga, njengobe kubhaliwe kutsi: “Kukhuluma kwakho kuyabonakalisa kutsi uneliciniso; nawubekwa licala, utfolakala umsulwa.”

⁵ Kodvwa kunjani nangabe kwenta kwetfu lokungakalungi kusita ekubonakaliseni ngalokukhanyako kwenta kwaNkulunkulu lokulungile? Singatsini? Singatsi Nkulunkulu akenti kahle ngekusijezisa? Ngikhuluma njengemuntfu.

⁶ Cha, akunjalo. Pho, nangakalungi Nkulunkulu, angawehlulela kanjani umhlaba?

⁷ Kodvwa nangabe bucili bami busita ludvumo lwaNkulunkulu ngekwenta liciniso lakhe libonakale kakhulu, ngingalahlelwani njengesoni?

⁸ Pho, akushiwo ngani-ke kutsi: “Asente lokubi, khona kutawuvama lokuhle”? Labanye bantfu, badzimate bangetfuka ngekungibeka licala ngekutsi ngikhuluma kanjalo! Bayawulahlwa njengobe kufanele.

Kute umuntfu lolungile

⁹ Tsine maJuda sincono yini kunalabanye? Cha, asincono. Njengaloku sengishito kutsi tsine maJuda nebetive singephansi kwemandla esono ngalokufananako,

¹⁰ njengobe kubhaliwe kutsi: “Kute namunye lolungile,

¹¹ kute ngisho namunye locondzisisako, kute lofuna Nkulunkulu.

¹² Bonkhe bamfulatsele, bagucuke baba ngimibungu, babantfu labangenamsebenti walutfo balahleke bonkhe; kute lowenta lokulungile, ngisho namunye,

¹³ umphimbo wabo ulidliza lelikhamisile, ngetilimi tabo bayakhohlisa, ngaphansi kwetindzebe temilomo yabo kubindze shevu webunyoka.

¹⁴ Imilomo yabo igcwele ticalekiso nebutsi.

¹⁵ Tinyawo tabo tiyashesha kuya ekucitseni ingati.

¹⁶ Tindlela tabo tigcwele incitsakalo nelusizi,

¹⁷ nendlela yekuthula abazange sebayati.

¹⁸ Abamesabi Nkulunkulu.”

¹⁹ Siyati kutsi konkhe lokusemtsetfweni kucondzene nalabo labangephansi kwawo, khona kutewuvinjwa tonkhe taba tebantfu, nemhlaba wonkhe utfolakale unelicala kuNkulunkulu.

²⁰ Ngobe kute umuntfu loyakwemukeleka kuNkulunkulu kutsi ulungile ngekugcina umtsetfo. Umtsetfo wenta bantfu basati sono.

Nkulunkulu usenta kanjani kutsi silungelane naye?

²¹ Kodvwa nyalo kulunga kwaNkulunkulu sekwembuliwe, akusiko kwemtsetfo; umtsetfo nebaphrofethi bayawufakazela loko.

²² Nkulunkulu wenta kutsi bonkhe labakholwako balungelane naye ngekukholwa kwabo nguJesu Khristu, bonkhe ngalokufananako.

²³ Bonkhe bantfu bonile, bakhashane kakhulu nenkhatimulo yaNkulunkulu.

²⁴ Kodvwa ngesipho samahhala semusa waNkulunkulu bonkhe bentiwe bemukeleka kuye kutsi balungile ngekuhlengwa lokukuKhristu Jesu.

²⁵ Nkulunkulu wamnikelela kutsi abe yinhlawulo ngengati yakhe; lenhlawulo-ke yemukeleka ngekukholwa. Ngalendlela Nkulunkulu sewubonakalise kulunga kwakhe ngekutsi ngaJesu ahlawule tono letatentiwa kadzeni Nkulunkulu angakatehluleli,

²⁶ ngenca yekubeketela kwakhe. Kodvwa kwanyalo Nkulunkulu sewubonakalisa kulunga kwakhe, kuze kukhanye kutsi yena ulungile nekutsi wonkhe umuntfu lokholwa nguJesu uyamemukela kutsi ulungile.

²⁷ Pho-ke, singatigabatisa ngani? Kute! Ngasiphi sizatfu? Ngesizatfu semisebenti yini? Cha, kodvwa ngesizatfu sekukholwa.

²⁸ Ngako sibona kutsi umuntfu wemukelwa nguNkulunkulu kutsi ulungile ngekukholwa kuphela, hhayi ngekwenta lokufunwa ngumtsetfo.

²⁹ Empeleni Nkulunkulu ngabe unguNkulunkulu wemaJuda kuphela yini? Akasiye yini futsi Nkulunkulu webetive? Vele, unguNkulunkulu newebetive,

³⁰ ngobe phela Nkulunkulu munye. Bekusoka bayakwemukelwa nguNkulunkulu kutsi balungile ngekukholwa; kanjalo nebekungasoki balungisiswa ngekukholwa.

³¹ Pho, siyawulahla yini umtsetfo ngalokukholwa? Cha, asiwulahli, esikhundleni saloko siyawusekela umtsetfo.