KubaseRoma 16 - Siswati 1996 Bible

Umkhontiso waPawula

¹ Ngetfula kini nango dzadzewetfu Foyibe longumdikhonikati welibandla laseKhenkhariya.

² Memukeleni egameni leNkhosi njengalokufanele labangcwele, nimnike lonkhe lusito langahle aludzinge kini, ngobe ube lusito kubantfu labanyenti ngisho nakini lucobo.

³ Hambisani boPhrisila na-Akhwila, labasebentela Khristu Jesu kanye nami,

⁴ labanikela ngemphilo yabo kutsi ibesengotini ngenca yami. Ngiyababonga kakhulu, hhayi mine ngedvwa, kepha nawo onkhe emabandla ebetive.

⁵ Hambisani nalelo bandla lelihlanganela endlini yabo. Hambisani Ephayinethosi wami lotsandzekako lowaba yindvodza yekucala leyakholwa kuKhristu eveni lase-Asiya.

⁶ Hambisani Mariya lowanisebentela kakhulu.

⁷ Hambisani Andronikhusi naJuniyasi, tihlobo tami letatisejele kanye nami. Bona babalulekile kubaphostoli, baba ngemaKhristu kucala kunami.

⁸ Hambisani Ampliyatusi lotsandzekako kimi eNkhosini.

⁹ Hambisani Ubhanusi, losebentela Khristu Jesu kanye nami; hambisani nalotsandzekako wami Stakhusi.

¹⁰ Hambisani Apelesi lotsembekile kuKhristu. Nihambise nalabo lababendlu ya-Aristobulusi.

¹¹ Hambisani Herodiyoni, sihlobo sami, nihambise nebazalwane bami kuKhristu labasendlini yaNasisusi.

¹² Hambisani boTrayifina naTrayifosa, tisebenti teNkhosi; nihambise naPhesisi lotsandzekako lowasebenta kakhulu eNkhosini.

¹³ Hambisani Rufusi, sisebenti lesibalulekile eNkhosini, nenina wakhe longumake wami.

¹⁴ Hambisani bo-Asinkrithusi, naFlegoni, naHemesi, naPhatrobasi, naHemasi, nabo bonkhe bazalwane labanabo.

¹⁵ Hambisani boFilologusi naJuliya naNeriyusi nadzadzewabo, na-Olimpasi, nabo bonkhe labangcwele labanabo.

¹⁶ Bingelelanani ngekwangana lokungcwele. Onkhe emabandla aKhristu ayanibingelela.

Imiyalo yekugcina

¹⁷ Ngiyanincenga, bazalwane bami, kutsi nicaphele labo lababanga kwehlukana netikhubekiso, baphambane nemfundziso lenayemukela; labo bagegeni.

¹⁸ Ngobe labo labenta njalo, abakhonti yena Khristu iNkhosi yetfu, kodvwa bakhonta tisu tabo; nangemavi lamahle nalamnandzi bayenga tinhlitiyo talabo labangakahlakaniphi.

¹⁹ Ngiyajabula ngani ngobe kulalela kwenu kuyatiwa kubo bonkhe. Ngifisa kutsi nihlakaniphe kulokulungile, nibe msulwa kulokungakalungi.

²⁰ Nkulunkulu, longumtfombo wekuthula, uyawumpitjita masinyane Sathane ngaphansi kwetinyawo tenu. Umusa weNkhosi yetfu Jesu awube nani.

²¹ Thimothi, losebenta kanye nami, uyanihambisa, kanye naLukhiyosi, naJasoni, naSosipateri, tihlobo tami.

²² Mine, Thethiyusi, umbhali walencwadzi, ngiyanihambisa eNkhosini.

²³ Gayusi, lengingenise kakhe nalapho kuhlanganela khona libandla lonkhe, naye uyanihambisa. Uyanihambisa na-Erastusi, umgcinisikhwama welidolobha; nemzalwane wetfu Kwathusi naye uyanihambisa. [

²⁴ Umusa weNkhosi yetfu Jesu Khristu awube nani nonkhe. Amen.]

Umthandazo wekwephetsa ngekubonga

²⁵ Asimdvumise Nkulunkulu! Nguye lonemandla ekunicinisa ngeliVangeli lami nangetinshumayelo ngaJesu Khristu, ngekwesembulo semfihlakalo yeliciniso lelalifihlakele kusukela phakadze,

²⁶ kodvwa nyalo seyembuliwe. Leyo mfihlakalo yabhalwa baphrofethi, yamenyetelwa kuto tonkhe tive ngekwemiyalo yaNkulunkulu waphakadze, kuze bonkhe batewukholwa balalele yena.

²⁷ KuNkulunkulu, lokunguye yedvwa lonekuhlakanipha, akube ludvumo ngaJesu Khristu phakadze naphakadze. Amen.