KubaseRoma 14 - Siswati 1996 Bible

Ungamehluleli umzalwane wakho

¹ Mayelana nalobutsakatsaka ekukholweni, memukeleni kahle, kodvwa hhayi kutsi nitewuphikisana naye inkhani ngemibono.

² Lomunye lukholo lwakhe lumvumela kutsi angadla nome yini, kantsi lobutsakatsaka ekukholweni udla tibhidvo kuphela.

³ Lodla konkhe angabombukela phansi longadli konkhe, kantsi nalongadli konkhe angamehluleli lona lodla konkhe; ngobe Nkulunkulu umemukele naye.

⁴ Ungubani wena kutsi ungehlulela sisebenti salomunye? Kuma nekuwa kwaso kwenkhosi yaso; kodvwa siyakuma ngobe iNkhosi inemandla ekusimisa.

⁵ Lomunye umuntfu ucabanga kutsi lelinye lilanga libaluleke kakhulu kunalamanye, kantsi lomunye umuntfu ucabanga kutsi onkhe emalanga ayafanana. Ngulowo nalowo kufanele eneliseke ngalokuphelele engcondvweni yakhe.

⁶ Lowo lohlonipha lilanga ulihloniphela iNkhosi; nalowo lodlako udlela iNkhosi, ngobe naye ubonga kuNkulunkulu; kantsi nalowo longadli uyekelela iNkhosi, ngobe naye ubonga kuNkulunkulu.

⁷ Kute la emkhatsini wetfu lotiphilelako, futsi kute nalotifelako.

⁸ Nasiphila, siphilela iNkhosi, nome sifa sifela iNkhosi, ngako-ke nome siphila nome sifa sibeNkhosi.

⁹ Ngobe Khristu wafa waphindze waphila, khona atewuba yiNkhosi yalabaphilako nalabafile.

¹⁰ Wena-ke umehlulelelani umzalwane wakho? Nawe-ke umeyiselani umzalwane wakho? Empeleni sonkhe siyakuma embikwesihlalo sekwehlulela saNkulunkulu.

¹¹ Ngobe kubhaliwe kutsi: “Njengobe ngiphila, isho iNkhosi, onkhe emadvolo ayawukhotsama kimi, tonkhe tilimi tiyawudvumisa Nkulunkulu.”

¹² Ngako-ke, sonkhe siyawulandza ngatsi matfupha ngamunye ngamunye kuNkulunkulu.

Ungamwisi umzalwane wakho

¹³ Ngako-ke akubete lowehlulela lomunye. Esikhundleni saloko asitimisele kutsi kubete lobekela lomunye umzalwane sikhubekiso, nome umgoco longahle umwise.

¹⁴ Njengobe mine ngiseNkhosini Jesu, ngiyati futsi ngicinisekile kutsi kute lutfo lolungcolile ngekwalo; kodvwa kukhona lokungcolile kunome ngubani locabanga kutsi kungcolile.

¹⁵ Nangabe umzalwane wakho uyakhubeka ngaloko lokudlako, anisahambisani naye ngelutsandvo. Ngaloko lokudlako ungambulali lowo muntfu lowafelwa nguKhristu.

¹⁶ Ngako-ke ungakuvumeli loko lokuhle kuwe kutsi kukhulunywe kabi ngako.

¹⁷ Ngobe umbuso waNkulunkulu awusiko kudla nekunatsa, kepha ukulunga, nekuthula, nekujabula kuMoya Longcwele.

¹⁸ Lowo lokhonta Khristu ngalendlela, uyemukeleka kuNkulunkulu, futsi wetsembekile nakubantfu.

¹⁹ Ngako-ke, asilangatelele lokuletsa kuthula nekwakhana.

²⁰ Lesekwentiwe nguNkulunkulu ungakucitsi ngesizatfu sekudla. Konkhe kuhlantekile, kepha akukalungi kumuntfu kutsi loko lakudlako kube sikhubekiso.

²¹ Lokuncono kungayidli inyama, nekunganatsi lokudzakisanako, nekungenti nome yini lokungahle kwente umzalwane wakho awe.

²² Kukholwa lonako kugcine emkhatsini wakho naNkulunkulu. Ubusisiwe lowo longatilahli ngaloko lakubone kutsi kufanele.

²³ Kodvwa lowo lonekungabata ngalakudlako, sewulahliwe, ngobe ukwenta ngekungakholwa; phela konkhe lokungesiko kwekukholwa, kusono.