KubaseRoma 11 - Siswati 1996 Bible

Umusa waNkulunkulu kuma-Israyeli lakhetsiwe

¹ Sengiyabuta-ke, ngitsi: Nkulunkulu wasilahla yini sive sakhe? Cha, akazange! Nami matfupha ngingum-Israyeli, situkulwane sa-Abrahama, ngiwesive saBhenjamini.

² Nkulunkulu akazange asilahle sive sakhe lasikhetsanchanti. Anati yini kutsi umBhalo utsini nga-Elija, nakamangalela ema-Israyeli kuNkulunkulu?

³ Watsi: “Nkhosi, sebabulele baphrofethi bakho, babhidlita emalati akho; sengimi ngedvwa losasele, nami bayangitingela bafuna kungibulala.”

⁴ Kodvwa Nkulunkulu wamphendvula watsini? Watsi: “Ngitigcinele bantfu labati-7 000 labangakasikhonti sithico lesinguBhali.”

⁵ Nanyalo kulesikhatsi kunjalo, bakhona labasele ngekukhetfwa ngemusa.

⁶ Kukhetsa kwakhe kungemusa wakhe, hhayi ngemisebenti. Ngobe kube kukhetsa kwaNkulunkulu bekungemisebenti, ngabe lomusa wakhe awusesiwo.

⁷ Pho-ke yini? Kusho kutsi bantfu baka-Israyeli abakakutfoli loko bebakufuna, kodvwa kwatfolwa ngulabakhetsiwe; laba labanye bentiwa baba lukhuni,

⁸ njengobe kubhaliwe kutsi: “Nkulunkulu wabanika umoya webulima, nemehlo ekungaboni, netindlebe tekungeva, kuze kube ngulamuhla.”

⁹ NaDavide utsi: “Shangatsi lidzili labo lingaba ngusochaka nelugibe, libe sikhubekiso nesijeziso.

¹⁰ Shangatsi emehlo abo angafiphatwa bangete babona, nemigogodla yabo igobane kokuphela.”

¹¹ Sengiyabuta-ke ngitsi: EmaJuda, nakakhutjwa, awa aphela yini? Cha, akazange. Kodvwa ngekona kwawo insindziso yase ifika nakubetive, kuze nemaJuda avukelwe sikhwele ngayo.

¹² Kodvwa nangabe sono semaJuda saletsa tibusiso letikhulu kubantfu, nebuphuya bawo ngekwaMoya baletsa tibusiso letikhulu kubetive, pho, letibusiso titawuba tikhulu kangakanani-ke nasaphelele onkhe emaJuda!

Insindziso yebetive

¹³ Sengikhuluma kini betive: Njengobe ngingumphostoli kubetive nje, ngiyawudvumisa umsebenti wami.

¹⁴ Mhlawumbe ngingabavusela sikhwele bantfu besive sakitsi, ngize ngisindzise labanye babo.

¹⁵ Ngobe nangabe kulahlwa kwabo bekukubuyisana kwaNkulunkulu nemhlaba wonkhe, pho, kwemukelwa kwabo kungaba yini, nakungesiko kuphila kulabafile?

¹⁶ Nangabe litsantana lenhlama lehlukaniselwe Nkulunkulu, nenhlama yonkhe yehlukaniselwe Nkulunkulu; futsi nangabe imphandze ingcwele, nemagala angcwele.

¹⁷ Lamanye emagala ajutjwa, kwase kutsi endzaweni yawo kwahlunyeleliswa wena bewuligala lemncumo wesiganga, khona utewuba nenhlanganyelo emcebeni wemncumo wasekhaya.

¹⁸ Ngako-ke ungawedzeleli lamagala, ukhumbule kutsi akusiwe losimise imphandze, kodvwa yimphandze lesimise wena.

¹⁹ Utawutsi: “Emagala ajutjwa, khona kutawuhlunyeleliswa mine.”

²⁰ Ucinisile kuloko, ajutjwa ngenca yekungakholwa kwawo, kodvwa wena usime ngekukholwa kwakho. Ngako-ke ungatigabatisi, kodvwa mani ngekwesaba.

²¹ Ngobe nangabe Nkulunkulu angazange awaphephise emagala emvelo, kuyakhanya kutsi nawe angeke akuphephise.

²² Bheka-ke bumnene nesandla lesilukhuni saNkulunkulu: bulukhuni bakhe kulabo labawile, kodvwa umnene kuwe, nawuchubeka uphile ngebumnene bakhe; nakungenjalo nawe utawujutjwa.

²³ Nalabo labanye futsi nabakuyekela kungakholwa kwabo bayawuhlunyeleliswa, ngobe Nkulunkulu unawo emandla ekuphindza abahlumelelise.

²⁴ Nangabe wena wajutjwa emncumeni wesiganga ngemvelo, wahlunyeleliswa ngalokuphambene nemvelo emncumeni wasekhaya, kakhulu kangakanani-ke lamagala emvelo, atawuhlunyeleliswa esihlahleni sawo semvelo.

Bubele baNkulunkulu kubo bonkhe

²⁵ Bazalwane, ngitsandza kutsi niyati lemfihlakalo yeliciniso; ngobe naningayati, ningahle nicabange kutsi nihlakaniphile. Lemfihlakalo kutsi labanye bema-Israyeli behlelwa bulukhuni khona kutewutsi betive bahlunyeleliswe ngalokuphelele.

²⁶ Onkhe ema-Israyeli ayawusindziswa kanjalo-ke, njengobe kubhaliwe kutsi: “UMkhululi uyawuvela eSiyoni loyawususa konkhe konakala kuJakobe.

²⁷ Lesi sivumelwane sami nabo, nangisusa tono tabo.”

²⁸ NgekweliVangeli baka-Israyeli batitsa taNkulunkulu, khona kutewusitakala nine, kodvwa ngekwelukhetfo bangulabatsandzekako ngenca yabokhokho babo.

²⁹ Phela Nkulunkulu akakuguculi kwephana kwakhe kwamahhala nekubita kwakhe.

³⁰ Empeleni nine animlalelanga Nkulunkulu, kodvwa nyalo senemukeliswe sihawu ngenca yekungamlaleli kwebaka-Israyeli.

³¹ Ngalokufananako nabo abakalaleli, kuze kutsi sihawu leniphetfwe ngaso nabo basemukeliswe.

³² Ngobe Nkulunkulu bonkhe bantfu sewubayekelele ekutseni bangamlaleli, adzimate atebahawukela bonkhe.

Ludvumo kuNkulunkulu

³³ Maye, kujula kwemcebo, nekwenhlakanipho, nekwelwati lwaNkulunkulu! Ngubani nje longaphenya kwehlulela kwakhe ahlolisise imfihlakalo yetindlela takhe?

³⁴ “Ngubani lowase wati ingcondvo yeNkhosi, nome-ke, lowase waba ngumeluleki wayo?

³⁵ Ngubani lowase wanika Nkulunkulu lutfo kuze naNkulunkulu ambonge ngelutfo?”

³⁶ Ngobe konkhe kuvela kuye, kukhona ngaye, kukhonela yena. Akube kuye ludvumo nini nanini! Amen.