KubaseKholose 4 - Siswati 1996 Bible

¹ Makhosi, tiphatseni kahle nangalokulungile tisebenti tenu, nikhumbule kutsi nani nineNkhosi lesezulwini.

Kucinisela ekuthandazeni

² Ciniselani ekuthandazeni, nilindze kuko ngekubonga.

³ Nisikhulekele natsi kuNkulunkulu, kutsi asinike ematfuba ekushumayela livi lakhe, sitekwati kukhuluma imfihlakalo yaKhristu, mine lengisiboshwa ngenca yayo.

⁴ Ningincusele kuze ngiyibonakalise ngalokuphelele, njengobe ngifanele kukhuluma.

⁵ Tiphatseni ngekuhlakanipha nanisemkhatsini webantfu labangakholwa, bambisisani sikhatsi, niwasebentise kahle ematfuba leninawo.

⁶ Kukhuluma kwenu akube nemusa ngaso sonkhe sikhatsi, nikunandzise njengeluswayi ekudleni, khona nitekwati lenifanele kubaphendvula ngako bantfu.

Imikhontiso yekugcina

⁷ Thikhikhusi, umzalwane lotsandzekako, nalosikhonti lesetsembekile, lesiyinceku kanye nami eNkhosini, utanatisa konkhe ngami.

⁸ Ngimtfumele kini kutsi anatise kutsi tsine siphila njani, advudvute netinhlitiyo tenu.

⁹ Utawube ahamba na-Onesimuse, umzalwane lomunye lowetsembekako nalotsandzekako, yena-ke ungulomunye wenu. Batanilandzisa-ke ngako konkhe lokwenteka ngalapha.

Kuvalelisa

¹⁰ Uyanihambisa Aristakhusi losiboshwa kanye nami, naMakho, umzala waBhanabasi, lenatjelwa ngaye, nakefika lapho kini nibomemukela.

¹¹ Uyanihambisa naJesu lowatiwa ngekutsi nguJustusi, labo-ke ngibo bodvwa lababekusoka labasebentela umbuso waNkulunkulu kanye nami, sebayindvudvuto lenkhulu kimi.

¹² Uyanihambisa na-Ephafrasi longulomunye wakini, inceku yaKhristu Jesu, lonilwela ngaso sonkhe sikhatsi emkhulekweni, kuze nime, niphelele nisime ekwenteni intsandvo yaNkulunkulu.

¹³ Nami ngingufakazi wakhe wekutsi uyanisebentela, nine kakhulu, kanye nebaseLawodisiya, nebaseHiyerapholisi.

¹⁴ NaLukha longudokodela lotsandzekako, kanye naDemasi bayanihambisa kakhulu.

¹⁵ Ngikhonteleni nami kubazalwane baseLawodisiya nakuNimfasi, nasebandleni lelihlanganela endlini yakhe.

¹⁶ Nangabe lencwadzi seniyifundzile, nibobafundzisa nebaseLawodisiya, nani niyifundze lena lephuma eLawodisiya.

¹⁷ Nitjele Akhipho nitsi: “Caphela kufeza lowo msebenti lowawemukela eNkhosini.”

¹⁸ Nako-ke kukhonta kwami, ngesandla sami, mine Pawula. Nikhumbule kutsi mine ngisaboshiwe. Umusa awube nani.