KubaseFiliphi 2 - Siswati 1996 Bible

Kutfobeka nekuphakanyiswa kwaKhristu

¹ Ngako-ke, naninendvudvuto kuKhristu, naninekudvudvuteka kwelutsandvo, naninebudlelwane baMoya, naninesisa nesihawu,

² gcwalisani kutfokota kwami ngekutsi nibe mcondvo munye, nelutsandvo lunye, nenhlitiyo yinye, nemgomo munye.

³ Ningenti lutfo ngembango nangeludvumo lwelive, kepha ngekutfobeka nishaye kungatsi labanye bakhulu kunani.

⁴ Ngulowo nalowo anganakekeli kwakhe yedvwa, kepha anakekele nekwalabanye:

⁵ Awube kini lowo mcondvo lowawukuJesu Khristu,

⁶ lowatsi anesimo saNkulunkulu, wangete washo kutsi kulingana naNkulunkulu kuyintfo yekunkonkoshelwa.

⁷ Kepha watidzela, watsatsa simo senceku, waba ngumuntfu njengatsi. Watsi atfolakale anjengemuntfu ngesimo,

⁸ watitfoba, walalela kwadzimate kwaba ngusekufeni, yebo, ekufeni kwesiphambano.

⁹ Ngako-ke Nkulunkulu wamphakamisa kakhulu, wamnika libito lelingetulu kwemabito onkhe,

¹⁰ kuze kutsi ngelibito laJesu emadvolo onkhe aguce, alabasezulwini, newalabasemhlabeni, newalabangaphansi kwemhlaba,

¹¹ netilimi tonkhe tivume kutsi Jesu Khristu uyiNkhosi, kube ludvumo kuNkulunkulu longuYise.

Pawula ubakhutsata kutsi baphilele Khristu

¹² Batsandzekako bami, benilalele ngetikhatsi tonkhe, kungasiko nangikhona kuphela, kodvwa kakhulu manje nangingekho. Ngako-ke, fezani kusindziswa kwenu ngekwesaba nangekutfutfumela,

¹³ ngobe nguNkulunkulu losebenta kini kutsandza nekwenta ngekwentsandvo yakhe lenhle.

¹⁴ Yentani konkhe ningakhononi, ningaphikisani,

¹⁵ kuze nibe ngulabangasoleki, nalabangenacala, bantfwana baNkulunkulu labangenasici emkhatsini wesitukulwane lesigwegwile nalesiphambene. Kufanele nikhanye kuso lesitukulwane njengetinkhanyeti letikhanyisa esibhakabhakeni,

¹⁶ nisabapha livi lekuphila. Nanenta njalo-ke, ngiyawuba nekutibonga ngelilanga laKhristu ngekutsi angigijimelanga lite nome-ke angisebentelanga lite.

¹⁷ Kukholwa kwenu kungumhlatjelo wenu lonikelwa kuNkulunkulu. Nome ingati yami beyingengetwa kuwo lomhlatjelo, mine bengingajabula, sijabule kanye nani nonkhe.

¹⁸ Ngako-ke ngitsi: Nani tfokotani kanye nami.

BoThimothi na-Ephafrodithu

¹⁹ Kepha ngiyetsemba eNkhosini Jesu kutsi ngitawutfumela Thimothi kini masinyane, kuze nami ngitewujabula nasengive tindzaba tenu letimnandzi.

²⁰ Ngite muntfu lonenhlitiyo lenjengeyakhe, lotawunakekela tindzaba tenu ngebucotfo.

²¹ Ngobe bonkhe labanye batifunela kwabo, abafuni kona kwaJesu.

²² Kepha vele niyakwati kwetsembeka kwakhe, kutsi ukhonte kanye nami eVangelini njengendvodzana ibambisene neyise.

²³ Yena-ke ngiyetsemba ngitamtfumela masinyane, nasengibonile kutsi lokucondzene nami kuphela kuphi.

²⁴ Kepha ngiyetsemba eNkhosini kutsi nami ngitawuta masinyane.

²⁵ Umzalwane Ephafrodithu, lenanimtfumele kimi kutsi atewungisita ekwesweleni kwami, usisebenti nelisotja laJesu kanye nami. Ngikubone kudzingekile kutsi ngimtfumele kini.

²⁶ Loku phela abenilangatelela nonkhe, asakhatsatekile emoyeni wakhe, njengobe neva kutsi abegula.

²⁷ Ngempela abegula, asemkhatsini wekufa nekuphila, kepha Nkulunkulu wamhawukela, kungesiye yena yedvwa, kepha wangihawukela nami kutsi ngingabi nelusizi etikwelusizi.

²⁸ Ngaloko-ke ngakhutsalela kakhulu kumtfuma, kuze kutsi nase nimbonile futsi nitfokote, nakimi kunciphe lusizi.

²⁹ Ngako-ke memukeleni eNkhosini ngekutfokota konkhe; labanjalo-ke nibobatisa.

³⁰ Ngobe ngenca yemsebenti waKhristu wacishe wafa, watidzela, kuze agcwalise lokusilele ekungikhonteni kwenu.