KubaseFiliphi 1 - Siswati 1996 Bible

Singeniso

¹ Lencwadzi iphuma kuboPawula naThimothi, tinceku taKhristu Jesu. Iya kubo bonkhe labangcwele baseFiliphi, labakuJesu Khristu, nakubabonisi nebadikhoni:

² Akube kini umusa nekuthula lokuvela kuNkulunkulu, longuBabe wetfu, naseNkhosini Jesu Khristu.

Pawula ukhulekela libandla laseFiliphi

³ Ngiyambonga Nkulunkulu wami ekunikhumbuleni kwami konkhe.

⁴ Ngetikhatsi tonkhe, ekuncuseni kwami, nginithandazela nonkhe ngekutfokota.

⁵ Ngibonga kuhlanganyela kwenu nami eVangelini kusukela ngelilanga lekucala kuze kube ngulamuhla.

⁶ Nginelitsemba leliphelele kutsi lowo lowacala umsebenti lomuhle kini, uyakuwufeza kuze kube lilanga laKhristu Jesu.

⁷ Kufanele kutsi ngibe nemcondvo lonjalo ngani nonkhe, njengobe nami nginetfwele enhlitiyweni yami. Ngemusa weNkhosi nonkhe nihlanganyele nami ekuboshweni kwami ngenca yeliVangeli, nasekulivikeleni, nasekulisimiseni.

⁸ Nkulunkulu ungufakazi wami kutsi nginilangatelela kanganani nonkhe ngesihe saKhristu Jesu.

⁹ Ngikhulekela loku kutsi lutsandvo lwenu lukhule njalo ekwatini nasekucondzeni konkhe,

¹⁰ nize nikwati kwehlukanisa lokuncono, nibe msulwa nibete sici, kuze kube lilanga laKhristu.

¹¹ Nitsele inala yetitselo tekulunga letingaye Jesu Khristu, kube yinkhatimulo neludvumo kuNkulunkulu.

Kuphila nguKhristu

¹² Ngitsandza kutsi nati, bazalwane, kutsi loko lokwangehlela kugcine sekuvete kuchubeka kweliVangeli.

¹³ Kubonakele kubalindzi bami, nakubo bonkhe labanye kutsi kuboshwa kwami kungenca yaKhristu.

¹⁴ Ngekuboshwa kwami linyenti lebazalwane litfole sibindzi lesikhulu eNkhosini sekukhuluma livi laNkulunkulu ngekungesabi.

¹⁵ Kantsi labanye bashumayela Khristu ngemona nangembango, kepha labanye ngenhlitiyo lenhle.

¹⁶ Laba-ke bashumayela bachutjwa lutsandvo, bayati kutsi ngimiselwe kuvikela liVangeli;

¹⁷ kepha labo labashumayela Khristu ngembango, kungesiko ngenhlitiyo lemhlophe, bacabanga kutsi batangivusela kukhatsateka ekuboshweni kwami.

¹⁸ Kepha kunani? Nome labanye bashumayela Khristu ngekutentisa, nome labanye bamshumayela ngeliciniso, lokumcoka kimi kutsi Khristu uyashunyayelwa nome nganguyiphi indlela. Loko-ke kuyangitfokotisa, futsi ngiyawuhlala ngitfokota.

¹⁹ Ngiyati kutsi ngemithandazo yenu nangekusitwa nguMoya waJesu Khristu, ngiyawukhululwa.

²⁰ Ngukulangatelela nekwetsemba kwami kutsi ngibete emahloni, kepha ngibe nesibindzi, njengobe bengivele nginaso ngaso sonkhe sikhatsi, kutsi Khristu entiwe abe mkhulu emphilweni yami, nome kwenteka ngemphilo yami nome kwenteka ngekufa kwami.

²¹ Kimi kuphila kunguKhristu, kufa kuyinzuzo.

²² Kepha nangisetawuphila enyameni, ngisenemsebenti lengisengawenta. Angisakwati lengitawukukhetsa.

²³ Kepha ngisemkhatsini walokubili: Nginesifiso sekuhamba ngiyewuba naKhristu, ngobe ngiko lokuhle kakhulu.

²⁴ Kantsi-ke kuphila kulomtimba kweswelekile kakhulu ngenca yenu.

²⁵ Kuloko ngineliciniso, futsi nginelitsemba lekutsi ngisetawuphila. Ngisetawuhlala nani nonkhe nginisite kutsi nikhule ekukholweni kwengeteke injabulo yenu,

²⁶ kuze kutsi, nasengiphindza ngifika lapho kini, nitibonge kakhulu ngami kuKhristu Jesu.

Pawula uyabayala kutsi abahambe ngekweliVangeli

²⁷ Kuphela hambani ngalokufanele liVangeli laKhristu, kuze kutsi nome ngita nginibona, nome ngingekho, ngive tindzaba letimnandzi ngani kutsi nime nicinile emoyeni munye, kukholwa liVangeli nikulwele ngebunye.

²⁸ Ningetfuswa lutfo ngalabo labamelene nani, lokusiciniseko sekubhubha kubo, kepha sekusindziswa kwenu. Loku-ke kuvela kuNkulunkulu.

²⁹ Ngobe ngenca yaKhristu nine nabelwa ngemusa angisho kukholwa kuye kuphela, kepha nekuhlupheka ngenca yakhe.

³⁰ Nikuko kona loko kulwa lenakubona kimi, njengobe nanyalo niva kutsi ngisekuko.