Joshuwa 14 - Siswati 1996 Bible

Kwabiwa kwelive langasenshonalanga neJordane

¹ Leti-ke tindzawo ema-Israyeli labelwa tona taba lifa lawo eveni laseKhenani, lekwatsi Eleyazare, umphristi, naJoshuwa, umsa waNuni, nebaholi betive taka-Israyeli bawabela tona.

² Lamafa abiwa ngenkatho etiveni letiyimfica nencenye, njengobe Simakadze abeshito ngaMosi.

³ Mosi letive letimbili nencenye abesatabele lifa lato ngasemphumalanga neJordane; kodvwa akazange emaLevi awabele lifa emkhatsini wato,

⁴ ngobe emadvodzana aJosefa abesative letimbili: sive sakaManase, nesaka-Efrayimu. EmaLevi akazange abelwe live, kodvwa abelwa emadolobha lapho abetawuhlala khona, abelwa nemadlelo etifuyo tawo.

⁵ Ngako-ke ema-Israyeli abelana live, kwaya njengobe Mosi abeyalwe nguSimakadze.

IHebroni inikwa Khalebi

⁶ Emadvodzana akaJuda aya kuJoshuwa eGilgali, Khalebi, umsa waJefune, umKhenizi, wafike watsi: “Uyati kutsi Simakadze watsini ngawe nami, kuMosi, inceku yaNkulunkulu, eKhadeshi Bhaneya?

⁷ Ngangineminyaka lengema-40 budzala ngesikhatsi Mosi, inceku yaNkulunkulu, angitfuma eKhadeshi Bhaneya kutsi ngiyewuhlola live. Ngamletsela umbiko lowetsembekile ngaloko lengakubona,

⁸ kodvwa bomnaketfu lengangenyuke nabo benta tinhlitiyo tesive tatfutfumela, tashona phansi ngenca yekwesaba. Noko, mine ngalandzela Simakadze Nkulunkulu wami ngayo yonkhe inhlitiyo yami.

⁹ Ngako, ngalelo langa Mosi wafunga kimi, watsi: ‘Live lapho lunyawo lwakho luke lwanyatsela khona liyawuba lifa lakho kanye nelebantfwabakho phakadze naphakadze, ngobe wena ulandzele Simakadze Nkulunkulu wami ngayo yonkhe inhlitiyo yakho.’

¹⁰ “Manje, njengobe Simakadze etsembisa, ungigcinile ngaphila iminyaka lengema-45 seloku Simakadze akukhuluma loko kuMosi, ngesikhatsi ema-Israyeli azulazula ehlane. Ngako-ke naku lamuhla ngineminyaka lengema-85 budzala!

¹¹ Nalamuhla seloku emtimbeni ngitiva ngisacine njengobe nganginjalo mhlazana Mosi angitfuma. Namanje ngitiva ngicine kangangekutsi nemphi ngisengayiphuma njengobe ngangingenta nangaleso sikhatsi.

¹² Manje nginike nali live letintsaba, Simakadze langetsembisa lona ngalelo langa. Nawe cobo lwakho wativela ngaleso sikhatsi kutsi ema-Anaki abekhona lapho nekutsi emadolobha awo abemakhulu futsi atinqaba, kodvwa, ngekusitwa nguSimakadze, ngitawadvungulula ngiwacoshe njengobe Simakadze asho.”

¹³ Ngako Joshuwa wabusisa Khalebi, umsa waJefune, wamabela iHebroni, yaba lifa lakhe.

¹⁴ Kusukela ngalelo langa iHebroni yaba yaKhalebi, umsa waJefune, umKhenizi, ngobe walandzela Simakadze, Nkulunkulu wema-Israyeli, ngayo yonkhe inhlitiyo yakhe.

¹⁵ IHebroni yayetsiwe nga-Abha, yabitwa ngekutsi yiKhiriyathi Abha. Abha abeyindvodza leyayidvume kakhulu esiveni sema-Anaki. Live laba nekuphumula, netimphi taphela.