Jona 2 - Siswati 1996 Bible

Umthandazo waJona

¹ Asesekhatsi esiswini senhlanti Jona wathandaza kuSimakadze longuNkulunkulu wakhe, watsi:

² “Ekuhluphekeni kwami ngakhala kuwe, Simakadze, wangiphendvula; ngamemeta ngisematfunjini emhlaba, ngicela lusito, wena waliva livi lami.

³ Wangijikijela ekujuleni, enhlitiyweni yetilwandle, emanti angitungeleta; onkhe emagagasi nemanti endlula etikwami.

⁴ Ngase ngitsi: ‘Sengicoshiwe emehlweni akho; noko, ngiyawuphindze ngibuke lithempeli lakho lelingcwele.’

⁵ Emanti angimbonya, angihisha; kujula kwangitungeleta, tindzembuluka tangitsandzela enhloko.

⁶ Ngehlela emajukujukwini emhlaba, live lelimasango alo ahlala akhiyiwe kuze kube phakadze; kodvwa imphilo yami wayenyula emgodzini, Simakadze, Nkulunkulu wami.

⁷ Ngesikhatsi umphefumulo wami uphelelwa ngemandla ngakukhumbula wena, Simakadze. Umthandazo wami wafinyelela kuwe, ethempelini lakho lelingcwele.

⁸ Labo labakhonta bonkulunkulu labalite bamshiyile Nkulunkulu sibili lophatsana ngemusa.

⁹ Kepha mine ngiyawuhlabela kuwe ngelivi lekubonga, nginikele ngemihlatjelo; loko lengikufungele ngiyawukufeza. Insindziso ivela kuSimakadze.”

¹⁰ Simakadze wakhuluma enhlantini, yase ihlantela Jona elugwini, emhlabatsini lowomile.