Jona 1 - Siswati 1996 Bible

Jona ubalekela Simakadze

¹ Ngalelinye lilanga livi laSimakadze lefika kuJona, umsa wa-Amithayi, latsi:

² “Hamba uye eNineve, lidolobha lelikhulukati, ufike umemetele kubantfu balo utsi bubi babo sebenyukele kimi.”

³ Kepha Jona wesuka wacondza eThashishi. Wehlela eJopha, lapho afike wakhokha imali yekwekhwela, wagibela umkhumbi, waya eThashishi, abalekela Simakadze.

⁴ Kodvwa Simakadze watfumela umoya lomkhulu elwandle, kwaba nesivunguvungu lesikhulu kangangekutsi umkhumbi wabasengotini yekwephuka.

⁵ Onkhe ematilosi efikelwa kwesaba lokukhulu, kwaba ngulelo nalelo lakhala kunkulunkulu walo. Batijika elwandle timphahla letatisemkhunjini, batsi betama kuwuphungula umkhumbi. Kepha Jona abewukele ngaphansi ekhatsi nemkhumbi, akulobukhulu butfongo.

⁶ Indvuna yemkhumbi yakhandzanisa Jona alele, yafike yatsi: “Wentani la? Uleleleni? Vuka uthandaze kuNkulunkulu wakho! Mhlawumbe yena utasivela asisindzise singabhubhi!”

⁷ Ematilosi emkhumbi akhuluma odvwana, atsi: “Wotani, sitekwenta inkatho sibone kutsi ngubani lona losidvonsele lomkhokha.” Ngako-ke base benta inkatho; inkatho yadla Jona.

⁸ Base bayambuta batsi: “Ngubani yena lona losibangele yonkhe lenhlupheko? Utekwentani la? Ungewekukleza kuphi wena? Usive sini?”

⁹ Wabaphendvula watsi: “NgingumHebheru; ngikhonta Simakadze, Nkulunkulu welizulu, lowadala umhlaba nelwandle.”

¹⁰ Lamadvodza esaba kakhulukati, adzimate atsi kuye: “Yini-ke lena lose uyentile?” Phela lamadvodza abesati kutsi ubalekela Nkulunkulu, ngobe Jona abesawatjelile.

¹¹ Sivunguvungu sachubeka sahhusha ngemandla, aze lamatilosi atsi: “Sitakwenta njani-ke ngawe, kuze lesivunguvungu sibindze?”

¹² Jona wabaphendvula watsi: “Ngitsatseni ningijikijele elwandle, sitawube sesiyabindza lesivunguvungu; ngobe vele ngiyati kutsi ngimi lona lonidvonsele lomkhokha wesivunguvungu.”

¹³ Esikhundleni saloko, lamatilosi etama kuwugwedla ngemandla awo onkhe lomkhumbi kutsi ubuyele elugwini, kodvwa ehluleka, ngobe lwandle lwachubeka lwahhusha kakhulu kunakucala.

¹⁴ Ngako base bakhala kuSimakadze, batsi: “Awu, Simakadze waJona, siyakuncenga, ungasibhubhisi ngenca yalomuntfu! Ungalibeki etikwetfu licala lengati lengenacala! Nguwe, Simakadze waJona, lowente konkhe loku!”

¹⁵ Ngako-ke base batsatsa Jona, bamjikijela elwandle, lwase luyathula lutsi nya.

¹⁶ Loko kwenta lamatilosi esabe Simakadze kakhulu kangangekutsi adzimate amentela umhlatjelo; etsembisa nekumkhonta.

¹⁷ Simakadze wahlinzeka Jona ngenhlanti lenkhulu, leyafike yammita. Jona wahlala esiswini sayo emalanga lamatsatfu nebusuku lobutsatfu.