Johane 6 - Siswati 1996 Bible

Jesu wesutsisa sicumbi lesinemadvodza lati-5 000

¹ Emvakwaloko Jesu wahamba waya ngesheya kweLwandle lwaseGalile lolulwaseThibheriyase.

² Sicumbi lesikhulu sebantfu samlandzela, ngobe sasibone tibonakaliso labetente kulabagulako.

³ Jesu wenyukela entsabeni, wefike wahlala phansi akanye nebafundzi bakhe.

⁴ UMkhosi wemaJuda weliPhasika bese usedvute.

⁵ Jesu watsi uphakamisa emehlo, wabona kutsi sicuku lesikhulu sita kuye, watsi kuFiliphu: “Labantfu sitabatsengela kuphi tinkhwa batewudla?”

⁶ Abembuta loko amhlola nje, ngobe yena abekwati labetakwenta.

⁷ Filiphu wamphendvula watsi: “Tinkhwa temaLangeni langema-200 tingeke tibenele, kube ngulowo nalowo atfole lucetwana nje.”

⁸ Lomunye webafundzi bakhe, Andreya, umnakaboSimoni Phetro, watsi kuye:

⁹ “Kukhona umfana lapha lonetinkhwa tebhali letisihlanu netinhlanti letimbili. Kepha kungentani loko, bantfu babanyenti kangaka nje?”

¹⁰ Jesu watsi: “Hlalisani labantfu.” Bekunetjani lobunyenti kuleyo ndzawo. Emadvodza lahlaliswa phansi abengacishe abe ti-5 000.

¹¹ Jesu watitsatsa letinkhwa, wabonga, wase utiphakululela laba bebahleti phansi, wabuye, wenta njalo futsi nangetinhlanti, kwaya ngekutsi basakufuna yini kudla.

¹² Kwatsi nase besutsi, watsi kubafundzi bakhe: “Butsani timvutfuluka letisele, kubete lokulahlekako.”

¹³ Batibutsa, bagcwalisa emabhasikidi la-12 ngetimvutfuluka tetinkhwa tebhali letatisihlanu letatisele kulababedla.

¹⁴ Kwatsi bantfu nababona lesibonakaliso lasenta Jesu, batsi: “Impela, lona ngumphrofethi labefanele kuta emhlabeni.”

¹⁵ Ngako-ke Jesu ati kutsi batawuta bambambe bambeke inkhosi, wamonyuka waya entsabeni yena yedvwa.

Jesu uhamba etikwemanti

¹⁶ Ekushoneni kwelilanga bafundzi baJesu behla baya elwandle.

¹⁷ Bangena esikebheni, bewela lwandle baya eKhaphanawume, kwase kuhlwile, Jesu abesolo angakefiki kubo.

¹⁸ Kwavunguta umoya lomkhulu, lwandle lwavuka indlwabane.

¹⁹ Bafundzi bese bagwedle emakhilometha lasihlanu nome lasitfupha ngesikhatsi babona Jesu ahamba etikwemanti, asondzela esikebheni, betfuka besaba kakhulu.

²⁰ Kodvwa watsi kubo: “Ningesabi, ngimi.”

²¹ Bese bajabulele kutsi bamekhwete esikebheni sabo. Batsi bangakabheki babona sebefikile eveni labebaya kulo.

Bantfu bafuna Jesu

²² Ngakusasa lesicumbi sebantfu lebesisasele ngesheya kwelwandle, sabona kutsi bese kute lesinye sikebhe, sakhumbula nekutsi bese sisinye kuphela, nekutsi Jesu abengakahambi ngesikebhe sebafundzi bakhe, kodvwa babehambe bodvwa.

²³ Kodvwa letinye tikebhe lebetiphuma eThibheriyase, tefika edvutane naleyo ndzawo, lapho lesicumbi sasidlele khona tinkhwa emvakwekubonga kweNkhosi.

²⁴ Satsi kube sibone lesicumbi sebantfu kutsi Jesu nebafundzi bakhe abasekho lapho, sakhwela etikebheni saya eKhaphanawume, sifuna Jesu.

Jesu usinkhwa sekuphila

²⁵ Batsi kube bamtfole asangesheya kwelwandle, batsi kuye: “Mfundzisi, ufike nini lapha?”

²⁶ Jesu wabaphendvula watsi: “Ngicinisile, ngicinisile, ngitsi kini: Aningifuni ngobe nibone tibonakaliso, kepha ningifuna ngobe nidle tinkhwa, nesutsa.

²⁷ Ningabosebentela kudla lokuphelako, kepha nibosebentela kudla lokutawukhonsa kuze kubesekuphileni lokuphakadze leyawunipha kona iNdvodzana yeMuntfu. Ngobe Nkulunkulu uYise ulubekile luphawu kuyo.”

²⁸ Base bayambuta-ke batsi: “Singentani lokungukona kuyimisebenti yaNkulunkulu?”

²⁹ Jesu wabaphendvula watsi: “Umsebenti waNkulunkulu kutsi nikholwe nguye lamtfumile.”

³⁰ Base batsi kuye: “Sibonakaliso sini semandla longasenta kuze sibone, sitewukholwa nguwe? Msebenti muni lowentako?

³¹ Bokhokho betfu badla imana ehlane, njengobe kubhaliwe kutsi: ‘Wabapha sinkhwa lesehla ezulwini, kutsi badle.’ ”

³² Jesu watsi kubo: “Ngicinisile, ngicinisile, ngitsi kini: Bekungesiye Mosi lona lowanipha sinkhwa lesavela ezulwini, kepha Babe unipha sinkhwa sibili sivela ezulwini.

³³ Ngobe sinkhwa laphana ngaso Nkulunkulu nguleso lesehla siphuma ezulwini, lesiletsa kuphila emhlabeni.”

³⁴ Base batsi kuye: “Nkhosi, siphe leso sinkhwa onkhe emalanga.”

³⁵ Jesu watsi kubo: “Mine ngisinkhwa sekuphila, lowo lota kimi, angeke alambe; nalowo lokholwa ngimi, angeke aphindze ome.

³⁶ Kepha nginitjelile kutsi ningibonile, kodvwa anikakholwa.

³⁷ “Konkhe langipha kona Babe kutawuta kimi; lotako kimi, angeke ngimlahlele ngephandle.

³⁸ Ngobe kwehla kwami ezulwini akusiko kutsi ngetela kutakwenta intsandvo yami, kepha kutakwenta intsandvo yalowo longitfumile.

³⁹ Intsandvo yalona longitfumile kutsi ngingalahlekelwa lutfo kuko konkhe loko langiphe kona, kepha ngikuvuse ngemhla wekuphela.

⁴⁰ Ngobe loko kuyintsandvo yaBabe kutsi, bonkhe lababone iNdvodzana, base bakholwa kuyo, babe nekuphila lokuphakadze; mine-ke ngiyawubavusa ngemhla wekuphela.”

⁴¹ EmaJuda ase acala kukhonona ngaye, ngobe phela abetsite: “Mine ngisinkhwa lesehla ezulwini.”

⁴² Ngako batsi: “Lona akusiye yini Jesu, umsa waJosefa, uyise nenina lesibatiko? Pho, usho kanjani kutsi: ‘Ngehle ezulwini’?”

⁴³ Jesu wabaphendvula, watsi: “Anisiwuvungama nodvwana!

⁴⁴ Kute umuntfu longeta kimi nangabe Babe, lokunguyena angitfumile, angamdvonsi. Ngemhla wekuphela mine-ke ngiyawumvusa aphile.

⁴⁵ Kubhaliwe kubaphrofethi kutsi: ‘Bonkhe bayawuba ngulabafundziswe nguNkulunkulu.’ Bonkhe labevile kuBabe, bafundza kuye, bayeta kimi.

⁴⁶ Kute umuntfu loke wambona Babe, ngaphandle kwalowo lovela kuNkulunkulu; nguyena-ke lambonile Babe.

⁴⁷ Ngicinisile, ngicinisile, ngitsi kini: Lowo lokholwako, unekuphila lokuphakadze.

⁴⁸ Mine ngisinkhwa sekuphila.

⁴⁹ Bokhokho benu badla imana ehlane, kodvwa bafa.

⁵⁰ Lesi sinkhwa lesehla ezulwini, kuze wonkhe umuntfu asidle angabe asafa.

⁵¹ Mine ngisinkhwa lesinekuphila lesehla ezulwini, umuntfu nakadla lesinkhwa uyawuphila ingunaphakadze. Futsi-ke lesinkhwa, lengitasinikelela kuphila kwelive, siyinyama yami.”

⁵² EmaJuda aphikisana odvwana atsi: “Kodvwa lomuntfu angasinika kanjani inyama yakhe, kutsi siyidle?”

⁵³ Jesu watsi kubo: “Ngicinisile, ngicinisile, ngitsi kini: Naningayidli inyama yeNdvodzana yeMuntfu, ninatse nengati yayo, nite kuphila.

⁵⁴ Lodla inyama anatse nengati yami, unekuphila lokuphakadze; mine-ke ngemhla wekuphela ngiyawumvusa aphile.

⁵⁵ Ngobe inyama yami ikudla sibili, nengati yami isinatfo sibili.

⁵⁶ “Lodla inyama yami, anatse ingati yami, unekuphila; uhlala kimi, nami ngihlala kuye.

⁵⁷ Njengobe Babe lophilako angitfumile, nami ngiphila ngaBabe, kanjalo-ke lodla mine, uyawuphila ngami.

⁵⁸ Lesi-ke sinkhwa lesehla ezulwini, asifanani nesinkhwa lesadliwa bokhokho benu, babuye bafa. Lodla lesinkhwa uyawuphila kuze kube phakadze.”

⁵⁹ Konkhe loko Jesu wakukhuluma asesinagogeni eKhaphanawume, afundzisa.

Emavi ekuphila lokuphakadze

⁶⁰ Linyenti lebafundzi bakhe lelayiva lenkhulumo latsi: “Ilukhuni-ke lemfundziso. Ngubani nje longayiva?”

⁶¹ Kepha Jesu ati enhlitiyweni yakhe kutsi bafundzi bakhe bayakhonona ngalenkhulumo yakhe, watsi: “Kuyanenyanyisa yini loko?

⁶² Kepha niyawutsini nase nibona iNdvodzana yeMuntfu yenyuka iya lapho beyivele ikhona kucala?

⁶³ Lokunika imphilo nguMoya; inyama ayinamsebenti; emavi lengiwakhuluma kini anguMoya, futsi akuphila.

⁶⁴ Noko bakhona labanye lapha emkhatsini wenu labangakholwa.” Ngobe Jesu bekati kwasekucaleni kutsi bobani labangakholwa, nekutsi ngubani labetamtsengisa.

⁶⁵ Wachubeka watsi: “Ngiko nje ngitsite kini: Kute longeta kimi, nangakakuphiwa nguBabe.”

⁶⁶ Emvakwaloko labanyenti bebafundzi bakhe bamhlubuka, abazange baphindze bahambe naye.

⁶⁷ Ngako Jesu watsi kulabo labebali-12: “Nani nifuna kuncandzeka yini?”

⁶⁸ Simoni Phetro wamphendvula watsi: “Nkhosi, singasuka kuwe siyephi? Ngobe emavi ekuphila lokuphakadze akuwe.

⁶⁹ Nyalo sesiyati, futsi siyakholwa, kutsi wena unguLongcwele waNkulunkulu.”

⁷⁰ Jesu wabaphendvula watsi: “Anginikhetsanga naba li-12 yini nine? Noko lomunye wenu ungusathane.”

⁷¹ Abekhuluma ngaJudasi, umsa waSimoni Skariyothi, ngobe nguye labetamtsengisa, naye futsi abengulomunye walabo labebali-12.