Johane 18 - Siswati 1996 Bible

Kuboshwa kwaJesu

¹ Jesu watsi kube acedze kuthandaza, wahamba kanye nebafundzi bakhe, bewelela ngesheya kwemfudlana lokwakutsiwa yiKhidroni. Bekunengadze langena kuyo Jesu kanye nebafundzi bakhe.

² Judasi, lowamtsengisa, naye bekayati leyo ndzawo. Phela Jesu abevamise kuhlanganela khona nebafundzi bakhe.

³ Ngako-ke Judasi wavele wacondza khona kuleyo ndzawo, ahamba nesicuku lesikhulu semasotja, nalabanye bogadzi belithempeli lababetfunywe baphristi labakhulu bakanye nebaFarisi. Babehlome tikhali, baphetse emalambu netidlwane.

⁴ Ngako Jesu, akwati konkhe lokwakutamehlela, wasondzela embikwabo watsi: “Nifuna bani?”

⁵ Bamphendvula batsi: “Jesu waseNazaretha.” Jesu watsi kubo: “Ngimi.” Judasi, lowamtsengisa, bekeme nabo.

⁶ Kwatsi Jesu nakabaphendvula atsi: “Ngimi,” bakhwesha nyova, baze bawela phansi.

⁷ Jesu waphindza wababuta watsi: “Kantsi nifuna bani?” Bamphendvula batsi: “Jesu waseNazaretha.”

⁸ Jesu watsi kubo: “Ingani nginitjelile ngatsi ngimi. Ngako-ke nangabe nifuna mine, bayekeleni bahambe laba!”

⁹ Loku wakusho kuze kutewugcwaliseka livi labesalikhulumile kuYise lekutsi: “Babe, kute ngisho namunye lowalahleka kulaba lowangipha bona.”

¹⁰ Simoni Phetro abenenkemba, wayihoshula wagalela ngayo esigcilini semPhristi Lomkhulu, wasihhumbula indlebe yangesekudla. Libito lalesigcili kwakunguMalkhusi.

¹¹ Jesu watsi kuPhetro: “Buyisela inkemba yakho esikhwameni sayo! Kantsi angisete ngayinatsa yini lendzebe yelusizi lengiyinikwe nguBabe?”

Jesu embikwa-Anasi

¹² Ngako-ke lesicumbi semasotja nendvuna yawo kanye nabogadzi bemaJuda bambamba Jesu bambopha.

¹³ Kwekucala bammikisa ku-Anasi, ngobe abenguyisetala waKhayafase, labengumPhristi Lomkhulu kulowo mnyaka.

¹⁴ Bekunguye, yena loKhayafase, lowayala emaJuda kutsi bekufanele kufe umuntfu munye, afele bonkhe bantfu.

Phetro uphika Jesu

¹⁵ Simoni Phetro nalomunye umfundzi babeloku balandzela Jesu. UmPhristi Lomkhulu abemati kahle lona lomunye umfundzi. Ngako-ke wangena naJesu ngekhatsi esibuyeni sendlu yemPhristi Lomkhulu.

¹⁶ Phetro yena bekeme ngephandle nje eyeme umnyango. Ngako lomfundzi lomunye labatiwa ngumPhristi Lomkhulu, wancandzeka waphuma wakhuluma nentfombatana leyayingasemnyango ingugonsa, yase iyamngenisa-ke naPhetro.

¹⁷ Lentfombatana yabuta Phetro yatsi: “Awusiye yini lomunye webafundzi balomuntfu?” Phetro watsi: “Cha, angisiye.”

¹⁸ Kwakumakhata, ngako-ke tisebenti kanye nabogadzi bese babase umlilo wemalahle bawutungeletile botsa, naPhetro wema kanye nabo, wotsa umlilo.

UmPhristi Lomkhulu ubuta Jesu

¹⁹ UmPhristi Lomkhulu wabuta Jesu ngebafundzi bakhe nangetimfundziso takhe.

²⁰ Jesu wamphendvula watsi: “Ngikhulume ebaleni ngikhuluma nemhlaba wonkhe. Ngato tonkhe tikhatsi bengifundzisa emasinagogeni nasethempelini, lapho kubutsana khona onkhe emaJuda. Angizange sengikhulume lutfo emasitseleni.

²¹ Manje, ungibutelani-ke? Buta kulabantfu bebangiva. Ubabute kutsi bengibatjela kutsini, ngobe bayakwati konkhe loku bengibafundzisa kona.”

²² Asakhuluma loko Jesu, lomunye wabogadzi labesedvutane naye wammukula ngemphama watsi: “Uphendvula umPhristi Lomkhulu nawusho nje?”

²³ Jesu wamphendvula watsi: “Nangikhulume kabi, shano phela kutsi ngitsiteni; kodvwa nangikhulume liciniso, ungishayelani?”

²⁴ Ngako Anasi watfumela Jesu asaboshiwe kuKhayafase, umPhristi Lomkhulu.

Phetro uchubeka nekuphika Jesu

²⁵ Phetro abeseloku emile lapho otsa umlilo, base batsi kuye: “Awusiye yini lomunye webalandzeli balomuntfu?” Kodvwa Phetro wakuphika loko watsi: “Cha, angisiye.”

²⁶ Lomunye wetigcili temPhristi Lomkhulu, labesinini salona lowahhunjulwa nguPhetro indlebe, wambuta watsi: “Angikubonanga yini unaye engadzeni?”

²⁷ Waphindza waphika Phetro. Masinyane nje lichudze lakhala.

Jesu embikwaPhilatu

²⁸ Base bayamtsatsa Jesu ekhaya laKhayafase bamyisa ekwehlulelweni, kwakungusekuseni ngeluvivi. EmaJuda wona akazange angene kuleyondlu, ngobe abentela kutigcina angangcoli ngekwemtsetfo, kuze phela alungele kudla Sidlo seliPhasika.

²⁹ Ngako-ke Philatu waphuma, waya kubo, wababuta watsi: “Cala lini lalentile lomuntfu?”

³⁰ Bamphendvula batsi: “Kube lomuntfu abete licala, ngabe asikamletsi lapha kuwe.”

³¹ Philatu watsi kubo: “Mtsatseni nine niteke lelo cala lakhe ngekwemtsetfo wenu!” EmaJuda aphendvula atsi: “Site lilungelo lekubulala umuntfu.”

³² Loku kwenteka kuze kutewugcwaliseka livi laJesu lalisho, nakachaza indlela labetawufa ngayo.

³³ Philatu wancandzeka wabuyela endlini, wabuta Jesu watsi: “Ye Jesu, wena ungiyo yini inkhosi yemaJuda?”

³⁴ Jesu wamphendvula watsi: “Ngekwakho lombuzo usuka kuwe yini, nome kukhona labakutjele kona ngami?”

³⁵ Philatu waphendvula watsi: “NgingumJuda yini mine? Sive sakini nebaphristi bakini labakhulu labakuletse la kimi. Wenteni wena?”

³⁶ Jesu wamphendvula watsi: “Umbuso wami awusiwo wakulelive. Kube bewuwakulelive, ngabe balandzeli bami bangilwele, kuze ngingetiwuniketwa kumaJuda. Kepha noko umbuso wami awusiwo wakulelive.”

³⁷ Ngako Philatu watsi: “Ngempela ungiyo yini inkhosi?” Jesu waphendvula watsi: “Uyasho wena kutsi ngiyiNkhosi. Mine ngatalelwa kona loko, futsi ngetela kona loko kulomhlaba kuze ngifakazele liciniso. Lowo loweliciniso uyaliva livi lami.”

³⁸ Philatu wabuta watsi: “Yini-ke liciniso?” Emvakwekusho njalo Philatu waphindze waphuma, waya kumaJuda, watsi kuwo: “Angilitfoli licala kulomuntfu.

Jesu ugwetjwa intsambo

³⁹ Kodvwa ngelisiko lenu kufanele nginikhululele siboshwa sinye njalo ngeliPhasika. Nginganikhululela yini inkhosi yemaJuda?”

⁴⁰ Bamphendvula bamemeta batsi: “Hhayi lowo! Sifuna Bharaba!” Bharaba abesigelekece.