Johane 16 - Siswati 1996 Bible

¹ “Loku-ke nginitjelele kutsi ningalahlekelwa kukholwa kwenu.

² Bayakunincuma emasinagogeni. Yebo, sikhatsi siyeta, lapho bayawunibulala, bacabange kutsi basebentela Nkulunkulu.

³ Bayawukwenta konkhe loku, ngobe bangamati Babe, nami bangangati.

⁴ Kodvwa nginitjela loku kuze kutsi, nase kufika sikhatsi sekutsi bakwente, nikhumbule kutsi nganitjela ngako.” “Bengisengakanitjeli letintfo ekucaleni, ngobe bengisenani.

Umsebenti waMoya Longcwele

⁵ Manje sengibuyela kulowo lowangitfuma; kodvwa kute lapha emkhatsini wenu longibutako kutsi: ‘Uyaphi?’

⁶ Kodvwa njengobe senginitjelile nje, tinhlitiyo tenu setilusizi.

⁷ Kodvwa noko nginitjela liciniso: Kuncono kini kutsi ngihambe, ngobe nangingahambi, angeke ete kini uMeluleki. Kodvwa nangihamba, ngitamtfumela kini.

⁸ Nakefika yena, uyawukhanyisela bantfu balelive kutsi yini sono, nekulunga, nekwehlulela:

⁹ “Sono, kutsi abakakholwa ngimi;

¹⁰ kulunga, kutsi mine ngiya kuBabe, ningeke niphindze ningibone;

¹¹ kwehlulela, kutsi umbusi walelive sewehlulelwe.

¹² “Ngisenalokunyenti lenginganitjela kona. Kodvwa kwanyalo ningeke nikwati kukwetfwala.

¹³ Kodvwa Moya weliciniso nakefika, uyawuniholela kulo lonkhe liciniso. Angeke atikhulumele kwakhe, kodvwa uyawukhuluma lakuvako, anitjele nangetintfo letisetakwenteka.

¹⁴ Uyawubonakalisa bukhosi bami, njengobe ayawutsatsa loko lengiyawumtjela kona kutsi anitjele.

¹⁵ Konkhe lanako Babe kwami, ngiko nje ngitsi: Moya uyakutsatsa loko lengiyakumnika kona anitjele.”

Lusizi luyawuguculwa lube yinjabulo

¹⁶ “Kusetawuba sikhashana nje ningabe nisangibona; kantsi futsi emvakwesikhashana nitawuphindze ningibone.”

¹⁷ Labanye kubafundzi bakhe bakhuluma bodvwa batsi: “Kusho kutsini loko? Usho kutsini nakatsi: ‘Kusetawuba sikhashana nje ningabe nisangibona; kantsi futsi emvakwesikhashana nitawuphindze ningibone,’ nalokutsi: ‘Ngobe kwanyalo ngisaya kuBabe’?”

¹⁸ Babutana batsi: “Usho kutsini nakatsi: ‘Sikhashana’? Asati nje tsine kutsi ukhuluma ngani!”

¹⁹ Jesu bekati kutsi bafuna kumbuta, ngako-ke watsi kubo: “Senibutana ngaloku lengikushoko yini kwekutsi: ‘Kusetawuba sikhashana nje ningabe nisangibona; kantsi emvakwesikhashana nitawuphindze ningibone futsi’?

²⁰ Ngicinisile, ngicinisile, ngitsi kini: Nitawukhala, nilile, kodvwa live litawujabula. Niyawuba nelusizi, noko lusizi lwenu luyawugucuka lube yinjabulo.

²¹ Nangabe umfati asatawubeleka, ubaselusizini, ngobe sikhatsi sebuhlungu sesifikile. Kodvwa nasambelekile umntfwana, ubukhohlwa bonkhe lobo buhlungu, ngobe ujatjuliswa kutalwa kwemntfwana.

²² Kunjalo-ke nakini, kwamanje niselusizini, kodvwa ngitawuphindze nginibone futsi, tinhlitiyo tenu tiyawujabula kakhulu. Kute futsi umuntfu loyakunemuka loko kujabula kwenu.

²³ “Ngalelo langa aniyiwubuta lutfo kimi. Ngicinisile, ngicinisile, ngitsi kini: Nome ngabe yini leniyicela kuBabe, uyawuninika yona egameni lami.

²⁴ Sekuze ngunyalo anikaceli lutfo egameni lami. Celani nitawuphiwa, kuze kutfokota kwenu kuphelele.”

“Ngilincobile live”

²⁵ “Tonkhe letintfo senginitjele ngemifanekiso. Siyeta sikhatsi lapho ngingaseyiwukhuluma kini ngemifanekiso, kodvwa ngiyawuvele nginitjele ngaBabe ngalokukhanyako.

²⁶ Ngalelo langa niyawucela ngelibito lami; angisho nekutsi ngiyawunicelela mine kuBabe.

²⁷ Ngobe phela Babe ngekwakhe uyanitsandza, unitsandza ngobe niyangitsandza; futsi senikholiwe nekutsi ngiphuma kuNkulunkulu.

²⁸ Ngaphuma kuBabe ngeta emhlabeni; manje sengiyawushiya futsi lomhlaba, sengibuyela kuBabe.”

²⁹ Bafundzi bakhe batsi kuye: “Buka-ke manje, ngukhona ukhuluma kahle, sekuyacaca nje ngaphandle kwekukhuluma ngemifanekiso!

³⁰ Manje sesiyati-ke kutsi wati konkhe; awudzingi kutsi umuntfu akubute imibuzo. Ngako-ke siyakholwa kutsi uphuma kuNkulunkulu.”

³¹ Jesu wabaphendvula watsi: “Seniyakholwa kambe nyalo?

³² Siyeta sikhatsi, nanyalo sesifikile, lapho nonkhe nitawusakateka, ngulowo nalowo abuyele ekhaya lakhe. Nitangishiya ngedvwa; kodvwa noko angingedvwa, ngobe Babe unami.

³³ Senginitjele loku, kuze nitewuba nekuthula kimi. Eveni niyawuhlupheka nibe nelusizi. Kodvwa manini sibindzi, ngobe mine ngilincobile live.”