Johane 11 - Siswati 1996 Bible

Kufa kwaLazaro

¹ Bekukhona indvodza lebeyigula, libito layo kunguLazaro. BeyiyaseBhetani, lidolobha lekhaboMariya nadzadzewabo, Mata.

² LoMariya bekungulona lowagcobisa tinyawo teNkhosi ngemakha watesula ngetinwele takhe. LoLazaro labegula-ke bekungumnakabo.

³ Bodzadzewabo base batfumela umlayeto kuJesu batsi: “Nkhosi, umngani wakho lomtsandzako uyagula.”

⁴ Jesu nakakuva loko, watsi: “Lokugula akusiko kwekufa, kepha kungenca yenkhatimulo yaNkulunkulu, kuze iNdvodzana yaNkulunkulu idvunyiswe ngako.”

⁵ Jesu abebatsandza boMata nadzadzewabo kanye naLazaro.

⁶ Ngako-ke watsi kube eve kutsi uyagula, wachubeka wahlala emalanga lamabili lapho abekhona.

⁷ Emvakwaloko watsi kubafundzi bakhe: “Asibuyele eJudiya.”

⁸ Bafundzi bakhe batsi: “Mfundzisi, khona nyalo emaJuda abesandza kufuna kukugcoba ngematje, kepha wena usafuna kubuyela khona nanyalo?”

⁹ Jesu watsi kubo: “Angitsi lilanga liyaphuma libuye lishone? Umuntfu nakahamba emini akakhutjwa, ngobe ukhanyiselwa ngulokukhanya kwalapha emhlabeni.

¹⁰ Kepha nakahamba ebusuku, uyakhutjwa, ngobe kute kukhanya kuye.”

¹¹ Emvakwekusho njalo Jesu wachubeka watsi kubo: “Lazaro, sihlobo setfu, sewulele, kodvwa ngitakuya ngiyemvusa.”

¹² Bafundzi bamphendvula batsi: “Nkhosi, nangabe ulele, utawusindza.”

¹³ Kepha Jesu abesho kutsi Lazaro sewufile; bona-ke bacabanga kutsi ulele butfongo.

¹⁴ Ngako Jesu wabatjela kahle kamhlophe watsi: “Lazaro sewufile.

¹⁵ Ngiyanitfokotela kwati kutsi bengingekho kuye, kuze nikholwe; kepha asambeni siye kuye.”

¹⁶ Tomase, labebitwa ngekutsi liPhahla, watsi kulaba labanye bafundzi: “Natsi asihambe kanye naye, kuze sitewufa kanye naye.”

Jesu ukuvuka nekuphila

¹⁷ Nakefika Jesu, wakhandza kutsi sekuphele emalanga lamane Lazaro angcwatjiwe.

¹⁸ IBhetani beyisedvutane neJerusalema; kungaba ngemakhilometha lamatsatfu kusuka eJerusalema uye eBhetani.

¹⁹ EmaJuda lamanyenti abesetile kutawulilela boMata naMariya ngalokufa kwemnakabo.

²⁰ Ngako Mata asevile kutsi Jesu uyeta, wahamba wayawumhlangabeta, kepha Mariya wasala afukeme.

²¹ Mata wakhuluma kuJesu watsi: “Nkhosi, kube mane bewukhona, ngabe umnaketfu akafi.

²² Kepha ngiyati kutsi nanyalo Nkulunkulu angakunika nobe yini longayicela kuye.”

²³ Jesu watsi kuye: “Umnakenu utawuvuka aphile.”

²⁴ Mata watsi kuye: “Ngiyati kutsi uyawuvuka aphile, nase kuvukwa ngemhla wekuphela.”

²⁵ Jesu watsi kuye: “Mine ngikuvuka nekuphila, lokholwa ngimi, nome angafa, uyawuphila.

²⁶ Lowo lophila akholwe ngimi, angeke afe naphakadze. Uyakukholwa loku?”

²⁷ Waphendvula watsi: “Yebo, Nkhosi, ngiyakholwa kutsi wena unguKhristu, iNdvodzana yaNkulunkulu, labetakuta emhlabeni.”

Jesu uyakhala

²⁸ Watsi kube asho njalo Mata, wahamba wayawubita Mariya ngasense watsi: “Sheshisa, uMfundzisi sewukhona, uyakubita.”

²⁹ Nakakuva loko Mariya, wasukumela etulu waya kuye.

³⁰ Jesu abesengakefiki kulowo muti, kodvwa abesakuleyo ndzawo lapho abehlangabetwe nguMata khona.

³¹ LamaJuda abefukeme kanye naMariya amlilela, amlandzela, nakambona asukuma aphuma ngekushesha; abecabanga kutsi uyawukhala ethuneni.

³² Mariya nakefika lapho bekunaJesu khona, wambona, watilahla phansi etinyaweni takhe watsi: “Nkhosi, kube mane bewukhona, ngabe umnaketfu akafi.”

³³ Ngako Jesu nakambona akhala, nalamaJuda labefike naye akhala, wabibitseka, wadzabuka kakhulu.

³⁴ Wababuta watsi: “Nimbekephi?” Batsi kuye: “Nkhosi, kota utewubona.”

³⁵ Jesu wakhala tinyembeti.

³⁶ Ngako emaJuda atsi: “Ase nibheke kutsi abemtsandza kangakanani!”

³⁷ Kodvwa labanye batsi: “Utsi kambe lona lowavula emehlo emuntfu labeyimphumphutse, abengeke akwenta yini kutsi amvimbe angafi lomufi?”

Lazaro uvuswa ekufeni

³⁸ Ngako Jesu waphindze wabibitseka, wahamba waze wefika ethuneni. Belingumhume nje limbonywe ngelitje emnyango.

³⁹ Jesu watsi: “Susani lelitje.” Mata, dzadzewabomufi, watsi: “Nkhosi, kutawunuka, ngobe sekwendlule emalanga lamane angcwatjiwe!”

⁴⁰ Jesu watsi kuye: “Angikakutjeli yini kutsi nawukholwa utawubona inkhatimulo yaNkulunkulu?”

⁴¹ Base bayalisusa-ke lelitje. Jesu wabuka etulu watsi: “Ngiyabonga, Babe, ngobe ungivile.

⁴² Bengati mine kutsi uyangiva ngawo onkhe emalanga, kepha loko ngikukhulume ngenca yalabantfu labalapha, khona batekwati kutsi ngitfunywe nguwe.”

⁴³ Asakushito loko, wamemeta ngelivi lelikhulu watsi: “Lazaro! Phuma!”

⁴⁴ Umufi waphuma aboshwe tandla netinyawo ngetindvwangu, buso bakhe bumbonywe ngeliduku.

Benta lisu lekubulala Jesu

⁴⁵ EmaJuda lamanyenti labevakashele Mariya ambona Jesu nakwenta loko, ase ayakholwa kuye.

⁴⁶ Kodvwa labanye babo besuka baya kubaFarisi, bafike babatjela ngako konkhe lakwentile Jesu.

⁴⁷ Ngako baFarisi nebaphristi labakhulu bahlangana neLiqoqo batsi: “Senta njani? Lomuntfu wenta tibonakaliso letinyenti.

⁴⁸ Nasimyekela achubeka ngalendlela, bonkhe bantfu batawukholwa kuye. EmaRoma atawufika abhidlite lendzawo atfumbe nesive sakitsi.”

⁴⁹ Lomunye wabo labenguKhayafase angumPhristi Lomkhulu ngalowo mnyaka watsi kubo: “Anati lutfo nine!

⁵⁰ Aniboni kutsi kunilungele kutsi kufe munye umuntfu, afele bantfu, kuze kutsi kungabhubhi sive sonkhe.”

⁵¹ Empeleni loko wakusho angatikhulumeli yena. Kepha njengemPhristi Lomkhulu ngalowo mnyaka waphrofetha kutsi Jesu abetawufela sive;

⁵² kungesiso sive kuphela, kepha kuze atekubutsela ndzawonye bantfwana baNkulunkulu, labasakateke nemhlaba wonkhe, babe munye.

⁵³ Kusukela ngalelo langa tiphatsimandla temaJuda tenta emasu ekubulala Jesu.

⁵⁴ Ngako-ke Jesu akabange asahamba ebaleni emkhatsini wemaJuda, kodvwa wesuka lapho, wahamba waya endzaweni lesedvute nelihlane, emtini lobitwa ngekutsi yi-Efrayimu, wayawutihlalela khona nebafundzi bakhe.

⁵⁵ Umkhosi wemaJuda weliPhasika bese usedvute. Bantfu labanyenti lababephuma emaphandleni, bakhuphukela eJerusalema, liPhasika lingakacali, bentela kutetihlambulula.

⁵⁶ Babefuna Jesu, nasebahlangene ethempelini, babutana bodvwana batsi: “Nisho kutsi kambe aketi kulomkhosi?”

⁵⁷ Baphristi labakhulu nebaFarisi base bakhipha simemetelo sekutsi nakukhona lowatiko lapho akhona Jesu, abobabikela, kuze batembamba.