Johane 10 - Siswati 1996 Bible

Umfanekiso ngemelusi lolungile

¹ “Ngicinisile, ngicinisile, ngitsi kini: Longangeni ngelisango esibayeni setimvu kodvwa asuke afohle, ekhwele kulenye indzawo, ulisela nemphangi.

² Kepha longena ngelisango ungumelusi wetimvu.

³ Umgadzi welisango uyamvulela lowo, netimvu tiyaliva livi lakhe. Takhe timvu utibita ngemabito ato atiholele ngephandle.

⁴ Nasaphume nato tonkhe utihola embili, tona timlandzele ngemuva, ngobe tiyalati livi lakhe.

⁵ Ngeke timlandzele lomunye umuntfu, kodvwa tiyawumbalekela; ngobe atiwati emavi ebafokati.”

⁶ Jesu wabatjela lomfanekiso, kodvwa bona abazange beve kahle kutsi kuyini loku labekukhuluma kubo.

Jesu ngumelusi lolungile

⁷ Ngako Jesu waphindza watsi kubo: “Ngicinisile, ngicinisile, ngitsi kini: Mine ngilisango letimvu.

⁸ Bonkhe labefika kucala kunami bangemasela nebaphangi; kodvwa timvu atizange setibalalele.

⁹ Mine ngilisango, umuntfu nakangena ngami uyawusindziswa; uyawungena, aphume, akhandze lidlelo.

¹⁰ Lisela litela kweba, nekubulala, nekubhubhisa. Mine ngitele kwekutsi bantfu babe nekuphila; babe nako kuphuphume.

¹¹ “Mine ngingumelusi lolungile. Umelusi lolungile udzela kuphila kwakhe ngenca yetimvu.

¹² Umuntfu locashiwe, longesiye umelusi wetimvu, naletimvu kungesito takhe, nakabona imphisi ita, ushiya letimvu, abaleke, imphisi itisukele itihlakate.

¹³ Ngobe phela lomuntfu ucashiwe, ngako akatinakekeli letimvu.

¹⁴ Mine ngingumelusi lolungile, ngiyatati timvu tami, nato futsi tiyangati.

¹⁵ Njengobe naBabe uyangati, nami ngiyamati, ngidzela kuphila kwami ngenca yetimvu.

¹⁶ Nginaletinye timvu letingesito noko takulesibaya, nato futsi kufanele ngitiletse, titakuliva livi lami. Titawuba mhlambi munye tonkhe nemelusi munye.

¹⁷ “Ngaloko-ke Babe uyangitsandza, ngobe ngidzela kuphila kwami khona ngitawubuya ngikutsatse futsi.

¹⁸ Kute longangemuka kuphila kwami. Ngikubeka phansi mine ngekwami. Nginawo emandla ekukubeka phansi, newekuphindze ngikutsatse futsi. Nguloko lengikutfunywe nguBabe kutsi ngikwente.”

¹⁹ Kwaphindze kwaba khona kwehlukana futsi emkhatsini wemaJuda ngalamavi akhe.

²⁰ Lamanyenti awo atsi: “Unelidimoni! Uyahlanya! Nine nimlalelelani?”

²¹ Kodvwa labanye babo batsi: “Lamavi akusiwo emavi emuntfu lonelidimoni. Lidimoni lingawavula yini emehlo emphumphutse?”

Jesu akemukelwa ngemaJuda

²² Kwase kufika sikhatsi sekugubha uMkhosi Wekuhlanjululwa kweliThempeli eJerusalema, bekungusebusika.

²³ Jesu abehamba eMhubheni waSolomoni ethempelini.

²⁴ Ase ayamkaka emaJuda atsi: “Kutawudzimate kube ngunini solomane usibambelela wena, ulibatisa tinhlitiyo tetfu? Nangabe unguKhristu sitjele ngalokuvakalako.”

²⁵ Jesu wawaphendvula watsi: “Nganitjela, kodvwa anizange senikholwe. Imisebenti lengiyenta egameni laBabe, ngiyo lengifakazelako.

²⁶ Kodvwa nine anikholwa, ngobe vele anisibo betimvu tami.

²⁷ Timvu tami tiyaliva livi lami, nami ngiyatati; tiyangilandzela.

²⁸ Ngitinika kuphila lokuphakadze, futsi tingeke tisabhubha naphakadze, kute nalongatihlwitsa esandleni sami.

²⁹ Babe longinike tona mkhulu kunabo bonkhe; kute longatitsatsa esandleni saBabe.

³⁰ Mine naBabe simunye.”

³¹ EmaJuda aphindza atsatsa ematje afuna kumgcoba ngawo.

³² Jesu wawaphendvula watsi: “Minyenti imisebenti lengiyente embikwenu lengiyinikwe nguBabe. Ngumuphi-ke lona lenifuna kungigcobela wona ngalamatje?”

³³ EmaJuda amphendvula atsi: “Kute umsebenti lomuhle lesifuna kukugcobela wona, kuphela nje kutsi wena uyahlambalata; ungatsi kantsi ungumuntfu nje nawe, ube sewutenta Nkulunkulu!”

³⁴ Jesu wawaphendvula watsi: “Akukabhalwa yini emtsetfweni wenu kutsi: ‘Ngitsite nibonkulunkulu’?

³⁵ Wababita ngekutsi bonkulunkulu labo babenelivi laNkulunkulu, umBhalo ungeke uguculwe.

³⁶ Mine ngingulowehlukaniselwe Babe, ngitfunywe nguye emhlabeni. Ningigwebelani ngekuhlambalata ngobe ngitsite: ‘NgiyiNdvodzana yaNkulunkulu’?

³⁷ Nangabe angenti yona imisebenti yaBabe ningabongikholwa.

³⁸ Kodvwa nangabe ngenta yona, nome ngabe anikholwa kimi, kholwani ngulemisebenti lengiyentako, kuze nitekwati, nihlale nati kutsi Babe uhlala kimi, nami ngihlala kuye.”

³⁹ Aphindza futsi afuna kumbamba, kodvwa waphunyula etandleni tawo.

⁴⁰ Jesu waphindze wancandzeka futsi, wahamba wewelela ngesheya kweJordane, lapho acala khona Johane kubhabhatisa, wefike wahlala khona.

⁴¹ Bantfu labanyenti beta kuye batsi: “Ngempela Johane akazange asente nasinye sibonakaliso, kepha konkhe Johane lakusho ngalomuntfu kuliciniso.”

⁴² Bantfu labanyenti lababekhona bakholwa kuye.