Jobe 9 - Siswati 1996 Bible

Jobe

¹ Wase uyaphendvula Jobe watsi:

² “Empeleni ngiyati kutsi loku kuliciniso. Kodvwa umuntfu loludzaka lolubolako angaba ngulolungile kanjani embikwaNkulunkulu?

³ Umuntfu nome abengafisa kuphindzilitana naye, abengeke akhone kuphendvula ngisho munye emibutweni yakhe leyinkhulungwane.

⁴ Kuhlakanipha kwaNkulunkulu kujulile, emandla akhe abanti kakhulu. Ngubani nje lowake wacinisa inhloko kuye, wachubeka waphumelela angulote sici?

⁵ Ugudlukisa tintsaba nato tingakwati loko, atigubuncelise ngentfukutselo yakhe.

⁶ Unyikanyisa umhlaba netisekelo tawo, tinsika tawo tichachatele.

⁷ Ukhuluma nelilanga kutsi lingakhanyi, lingete laphuma, usibekela kukhanya kwetinkhanyeti.

⁸ Yena yedvwa wendlala emazulu, anyatsele emagagasi elwandle.

⁹ Nguye uMdali weliBhele, neweMtsentse, neweSilimela, newetinkhanyeti taseningizimu.

¹⁰ Wenta tigemegeme letingaphenyeki, netimangaliso letingeke setibalwe ngumuntfu.

¹¹ Nome endlula ngakimi, ngingeke ngimbone, nakendlula ngendlela yami, ngingeke ngimuve.

¹² Nakukhona lamhlwitsako, ngubani longaba nemandla ekummisa? Ngubani kona longambuta atsi: ‘Wentani?’

¹³ Nkulunkulu akajiki angatfukutsela, ngisho nemabutfo akaRahabi akhotsama etinyaweni takhe.

¹⁴ “Mine-ke ngingaphindzilitana kanjani nalonjalo? Ngingawatfolaphi wona emavi ekuncakulisana naye?

¹⁵ Nome bengingaba msulwa kangaka, bengiyawubate imphendvulo kuye. Lebengingakwenta nje bengingamane ngitincengele kuye, ngilale tibutsa kuMehluleli wami, ngicele umusa wakhe.

¹⁶ Ngisho nome bengingambita avume ete, angiboni kutsi abengangilalela.

¹⁷ Abenganginyatsela ngesangcotfo, andzise emanceba ami ngaphandle kwesizatfu.

¹⁸ Abengeke angivumele ngiphindze ngitfole umphefumulo wami, kodvwa abeyawungifumbela ngekudzabuka nje.

¹⁹ Nangabe kukhulunywa ngetemandla, unemandla! Nangabe kukhulunywa ngetekulunga, ngubani longahle abhejelane naye?

²⁰ Ngisho nome bengimsulwa, umlomo wami bewungangilahla. Nome ngabe bengingenakusoleka, bewutakutsi nginelicala.

²¹ “Ngisho naloku ngimsulwa nje, ngingenasici, anginandzaba nalomtimba wami. Kwamine ngiyayeya imphilo yami.

²² Mine sekuyangifananela nje, ngiko nje ngitsi: ‘Ubhubhisa labalungile nalababi.’

²³ Nangabe inhlupheko iletsa kufa ngekushesha, uyabahleka labamsulwa, nabaphelelwa litsemba.

²⁴ Live naliniketelwe etandleni tebantfu lababi, emehlo ebehluleli balo uyawaphumphutsekisa. Nakungesiye, ngubani-ke?

²⁵ “Emalanga ami agijima ashiye inyosi, andiza abaleke angasakuboni nakancane nje lokujabulisako.

²⁶ Endlula ngelihubo njengemikhumbi yetitfombo tephaphira, nanjengelusweti lusukela kudla kwalo lokuphansi luphatima njengembane.

²⁷ Kube ngitsi: ‘Ngitawukhohlwa ngalokukhonona kwami, ngitawujika nasebusweni ngimandzatele,’

²⁸ nanyalo ngisatfutfumela ngako konkhe lokuhlupheka kwami, ngobe ngiyati kutsi Nkulunkulu ngeke asho kutsi ngimsulwa embikwakhe.

²⁹ Njengobe vele sengitfolakele nginelicala-ke, ngisahluphekelani, ngihluphekele lite?

³⁰ Ngisho nome bengingatigeza ngensipho, netandla tami ngitigeze ngasota wekugeza,

³¹ Nkulunkulu abetangifaka emgodzini weludzaka lwekungcola, kuze ngisho netimphahla tami tingenyanye.

³² “Nkulunkulu akasiye umuntfu njengami kutsi bengingaze ngiphendvulane naye, nekutsi bengingabukana naye buso nebuso enkhundleni.

³³ Kube mane bekungaba nemlamuli emkhatsini wetfu, kube abengabeka sandla sakhe etikwetfu sobabili,

³⁴ umuntfu labengesusa umzaca waNkulunkulu kimi, kuze kwesabisa kwakhe kungabe kusangetfusa.

³⁵ Nami-ke bengingakhuluma ngingasamesabi, kodvwa njengobe kunjena nje kimi, ngingeke.”