Jobe 8 - Siswati 1996 Bible

Bildadi

¹ Kwase kuphendvula Bildadi, umShuhi, watsi:

² “Kutawuze kube ngunini solomane ukhuluma tintfo letinje? Emavi akho atikhatsa nje temoya lohhushako.

³ Nkulunkulu uyawuguculela yini umtsetfo wakhe lolungile? Somandla uyayiguculela yini intfo lelungile?

⁴ Kungahle kube bantfwabakho kukhona labakonile kuNkulunkulu, wase ubajezisa ngalokufanele sono sabo.

⁵ Kodvwa wena nawungabuka kuNkulunkulu, utincengele kuSomandla,

⁶ futsi nangabe wena umsulwa ungcwele, ngisho nanyalo angasukuma yena akumele, akubuyisele endzaweni yakho lefanele wena.

⁷ Konkhe loku lokukulahlekele bekuyawuba lite kakhulu, nase kucatsaniswa naloku bewungakunikwa nguNkulunkulu kamuva.

⁸ “Buta titukulwane takucala, uvisise kuto kutsi boyisemkhulu babefundzani,

⁹ ngobe tsine sitelwe itolo loku, kute lesikwatiko, netinsuku tetfu tekuhamba lapha emhlabeni tisitfunti nje.

¹⁰ Tingete takufundzisa yini tikutjele? Tingete tawakhipha yini emavi laphuma ekuhlakanipheni kwato?

¹¹ Sitfombo sephaphira singakhula yini sibe sidze, nasingakamili echaphotini? Umhlanga wona ungakhula yini, nakute emanti?

¹² Kutsi kusakhula kahle kungakagawulwa nangumuntfu, bese kusheshe kuyabuna kwendlula ngisho tjani imbala.

¹³ Sinjalo-ke siphetfo sabo bonkhe labafulatsela Nkulunkulu, liphela kanjalo-ke litsemba lemuntfu longakholwa.

¹⁴ Loko lakwetsembako kulihobosha nje, loko labeke kuko litsemba kunjengendlu yebulembu.

¹⁵ Utsi nakatsi ubambelela kuko, kuwe kanye naye, nakatsi weyama kuko, akumsimisi.

¹⁶ Umuntfu lonjalo ufanana nesitjalo lesiniselwa kahle kantsi siselangeni, senabisela imiliba yaso kuyo yonkhe insimi.

¹⁷ Situngeletela timphandze taso encunjini yematje, setame kufuna indzawo lapho emkhatsini walamatje.

¹⁸ Sitsi singasishulwa lapha kulamatje, kwawona lamatje, lebeseyeme kuwo, asiphike atsi: ‘Cha, angikwati mine wena.’

¹⁹ Ngempela imphilo yaso iyabuna ife, bese kutsi lapho kulomhlabatsi waso kumile lesinye silimo.

²⁰ “Ecinisweni Nkulunkulu akamlahli umuntfu lomsulwa, futsi akaticinisi tandla tebantfu labenta bubi.

²¹ Noko umlomo wakho uyakuwugcwalisa ngeluhleko, netindzebe temlomo wakho atigcwalise ngekumemeta ngenjabulo.

²² Titsa takho tiyakwembatsiswa ngemahloni. Emakhaya alababi akasayiwubuye abonwe.”