Jobe 7 - Siswati 1996 Bible

¹ “Umuntfu ute yini umsebenti lomatima lapha emhlabeni? Khona emalanga akhe akanjengawo yini emuntfu locashiwe?

² Njengesigcili silangatelela ematfunti asentsambama, nanjengemuntfu locashiwe lolindzela ngekulangatelela umholo wakhe,

³ kanjalo nami ngabelwe imihla yekuhlupheka kuletinyanga, ngabelwe busuku beminjunju kulamalanga.

⁴ Nangilala phansi, ngiyaye ngicabange ngitsi: ‘Ingabe ngiyawuvuka nini?’ Busuku nabo bunyonyobe kancane, ngibe mine ngijilajileka kudzimate kudzabuke kusa.

⁵ Umtimba wami wembetse timphetfu netincwencwe, sikhumba sami sigatuka cedze kubundvuke bovu etilondzeni tami.

⁶ “Emalanga ami agijima njengembane, efike ekugcineni asangasenalo litsemba.

⁷ Khumbula, mane ukhumbule, Nkulunkulu, kutsi imphilo yami ayisilo lutfo, kodvwa ngumphefumulo nje, emehlo ami akasayiwuphindza akubone kujabula.

⁸ Liso lelingibonako nyalo, alisayiwuphindza lingibone futsi. Uyawungifuna, kodvwa ngiyawube ngingasekho.

⁹ Njengelifu lelinyamalalako ligcina lingasekho, unjalo-ke nemuntfu losaya ethuneni, akaphindzi abuye.

¹⁰ Ngeke aphindze abuyele endlini yakhe, indzawo yakhe ayisayiwuphindza imati.

¹¹ “Ngako ngingeke ngithule, ngitawukhuluma ngikuletinhlungu temoya wami, ngikhonone kulobumunyu bemphefumulo wami.

¹² Ngilwandle yini mine, nome ngingumkhoma waselwandle yini, kutsi sewungaze uhlale ungigadzile?

¹³ Nangicabanga ngembhedze wami kutsi utangidvudvuta neluhlaka lwami kutsi lutawupholisa iminjunju,

¹⁴ wena ngulapho ungesabisa kakhulu khona ngemaphupho akho, ungetfuse ngemibono yakho,

¹⁵ sengize nginconota kwekhanywa ngimane ngife sekunalomtimba wami lengikuwo.

¹⁶ Sengiyayeya imphilo yami. Ngingamane ngingete ngaphila iminyaka leminyenti. Ngiyekele ngisale ngedvwa, emalanga ami akasesilo lutfo kimi.

¹⁷ “Uyini umuntfu kutsi ungadzimate umnakekele kangaka nekutsi ungaze umnake kangaka,

¹⁸ ngekutsi umvakashele onkhe malanga ekuseni, umvivinye ngawo onkhe ematfuba?

¹⁹ Ungeke yini sewumane unginike litfutjana ngike ngehlise liphukuphuku?

²⁰ Nangabe ngonile, ngenteni kuwe, wena Mlondvoloti webantfu? Wenteleni kutsi ngibe yinkoyoyo yakho? Wenteleni kutsi ngibe ngumtfwalo kuwe?

²¹ Awuticoleli ngani tiphambuko tami, utsetselele tono tami? Ngobe mine sengitawulala elutfulini masinyane; maye, utase uphenye sewungifuna mine ngingasekho!”