Jobe 6 - Siswati 1996 Bible

Imphendvulo yaJobe

¹ Jobe waphendvula, watsi:

² “Kube tinhlungu tami betingafakwa esikalini tikalwe, nalo lonkhe lusizi lwami lubekwe esilinganisweni;

³ ngempela betingaba matima kwendlula sihlabatsi saselwandle, ngako-ke akumangalisi kutsi emavi ami ashube kangaka.

⁴ Imicibisholo yaSomandla ingekhatsi, ingihlabile, umoya wami sewunatse shevu wayo. Tesabiso taNkulunkulu ticondzane nami ngco.

⁵ Imbongolo yesiganga iyakhonya yini nayiseluhlateni? Yona inkhomo iyabhonsa yini nayiseluhlateni?

⁶ Kudla lokudvuma kuyadliwa yini nakute luswayi? Kona nje bukhona yini bunandzi kulokumhlophe kwelicandza?

⁷ Kudla lokungabe kondla umtimba wami kusuke kunginamatsele emphinjeni, nasematfunjini kufike kungigulukunye kwente umdvumacolo.

⁸ “Awu, shangatsi kucela kwami kungevakala, Nkulunkulu amane angiphe loko lengikufunako.

⁹ Kutsi Nkulunkulu amane asale angisila, angihlwitse ngesandla sakhe angijube.

¹⁰ Ngobe loko ngukona bekunganginika kuphumula nekutfokota kuleminjunju lengapheli yemahlaba, ngekutsi angikawaphiki emavi aLongcwele.

¹¹ “Mandlana mani mine lenginawo, kutsi ngisengachubeka ngetsembe? Tsemba lini lengisenalo kutsi ngisengabeketela?

¹² Nginemandla elitje yini kantsi mine? Wona lomtimba wami ulitfusi yini?

¹³ Nginawo yini emandla ekutisindzisa ngekwami, njengobe nje sengemukwe konkhe kwami?

¹⁴ “Umuntfu losaphelelwa litsemba kufanele akhutsatwe bangani bakhe labetsembekile, nakhona asakufulatsela kwesaba Somandla.

¹⁵ Kodvwa bomnaketfu bangimbulutela njengetibhobhodla temanti, yebo, njengetibhobhodla temanti letiphuphumako tiphindze tome,

¹⁶ tibuye tidvungeke tibe mnyama ngekuncibilika kwangcocwane, tigcwale lapho sitfwatfwa sifihlakele khona.

¹⁷ Kodvwa tiyoma tingete tageleta ebusika, litsi lingashisa tibaleke emivileni yato.

¹⁸ Tindvwendvwe letibekelele ngaleyo ndlela yato tiyeduka, tilahleke, tize tiphelele ehlane.

¹⁹ Tindvwendvwe tebaseThema titfungatsana nemanti, netihambi tebaseSheba letitsenga titsengise, tilindzele ngelitsemba.

²⁰ Tiyajabha noko, ngobe betetsemba kakhulu, titsi natifika lapho, tijabhe.

²¹ Ningiyenge kanjalo-ke nani, nitsite kube nibone lenhlupheko yami, nase nikhweshela emuva ngenca yekwesaba.

²² Ngike ngasho yini ngatsi: ‘Nginikeleleni,’ nome ngatsi: ‘Ngicela ningihlenge’?

²³ Ngike ngasho yini ngatsi: ‘Ngikhululeni esandleni sesitsa, ningisindzise etidladleni talabanelunya’?

²⁴ “Ngifundziseni-ke, ngitawubindza, ningikhombise lapho ngone khona.

²⁵ Maye, abuhlungu emavi laliciniso! Kodvwa angisita ngani emavi enu ekuhlakanipha?

²⁶ Ngekwenu netama kulungisa loku lengikukhulumako yini? Lamagama emuntfu losaphelelwa litsemba wona niwenta abe ngumoya yini?

²⁷ Nitawuze nente inkatho, nentele longenayise, nitsengise ngekuntjintjiselane ngemngani wenu.

²⁸ “Kodvwa phela, ase nimane nibe nesihawu, ningibuke nje. Ngingawacala yini mine emanga lapha embikwenu?

²⁹ Ase nicabangisise kabusha, ningangiphatsi ngalokungakafaneli. Ase nicabangisise kahle lendzaba, bucotfo bami sebusebucayini.

³⁰ Bukhona yini bubi kuloku lengikushoko? Umlomo wami ungete wabubona yini bubi nabusenhlitiyweni?”