Jobe 5 - Siswati 1996 Bible

¹ “Memeta nawutsandzako, sibone kutsi ngubani lotakuphendvula! Ngubani nje emkhatsini wabo bonkhe labangcwele longajikela ngakuye?

² Silima siyafa sibulawe tinhlungu tekutfukutsela kwaso, nemona uyababulala labanengcondvo yebuntfwana.

³ Mine ngitibonele ngekwami, silima lesibukeka shangatsi sivikelekile, kodvwa sicalekiso sehlela etikwemuti waso masinyane nje.

⁴ Bantfwabaso bakhashane kabi nekuphepha, kute namunye lobemelelako emacaleni asetinkhundleni.

⁵ Sivuno saso sidliwa ngulabalambile, basikhosholote ngisho lesisekhatsi kulamnyama emacobhe. Labomile bahahela umcebo waso kutsi bawufuhlute bawucedze.

⁶ Bulukhuni abumane bumile phansi nje, yebo, nenhlupheko ayivumbukisi kwemakhowe nje.

⁷ Kodvwa umuntfu utalelwe kuhlupheka, njengaloku netinhlase tisuka tiye etulu.

⁸ “Kodvwa kube bekungimi, ngabe ngiyatincengela kuNkulunkulu, ngabe ngibeka yonkhe indzaba yami embikwakhe.

⁹ Yena wenta timangaliso letingeke tichazwe ngumuntfu, ente nemigilingwane lengeke ibalwe ngumuntfu.

¹⁰ Unisa imvula etikwemhlaba, ehlisele emanti etikwematsafa.

¹¹ Uphakamisa labaphansi abayise etulu, labalilako baphakanyiselwe endzaweni lephephile.

¹² Ucitsa emacebo emacili, kuze labakwenta ngetandla tabo kungaphumeleli.

¹³ Ubamba labahlakaniphile kuwo onkhe emacebo abo, nemachinga alabangemacili uwaphambanisa onkhe.

¹⁴ Behlelwa bumnyama lobukhasa phansi emini, litsi libalele lise nga, bona bahambe baphumphutsa njengasebusuku.

¹⁵ Usindzisa labeswele emlonyeni wekufa, abasindzise nasetidladleni talabo labanemandla sebababambile.

¹⁶ Ngako labamphofu ubanika litsemba, bese kutsi kungetsembeki kuvalwe umlomo.

¹⁷ “Maye, ubusisiwe umuntfu locondziswa nguNkulunkulu! Ngako ungakwedzeleli kuyalwa nguSomandla.

¹⁸ Ngobe yena nome angamilisa tilondza, uphindze atipholise, uyalimata aphindze aphilise ngetandla takhe.

¹⁹ Nome ungehlelwa tehlakalo letisitfupha, uyakukusindzisa kuto tonkhe; nome nguletisikhombisa kute lokuyakukulimata.

²⁰ Ngesikhatsi sendlala uyakukusindzisa ekufeni, nasemphini akusindzise enkembeni.

²¹ Uyawuvikeleka ekushayweni ngemagama, ungesabi nome kufika imbhubhiso.

²² Uyawuyihleka lusulu indlala nembhubhiso, nayifika ngakuwe; awuyikwesatjiswa tilwane temhlaba.

²³ Ngobe uyakuba nesivumelwane nematje asematsafeni, netilwane tesiganga tiyawuhlalisana nawe ngekuthula.

²⁴ Uyawukwati kutsi likhaya lakho livikelekile, uyawubala kahle tonkhe timphahla takho utikhandze tiphelele.

²⁵ Uyawukwati kutsi bantfwabakho bayawuba banyenti, nebatukulu bakho bayawuba ngangetjani besiganga.

²⁶ Uyawuya ethuneni ugcwele emandla, wenelisekile ngebudzala njengetitfungo letibutfwa ngesikhatsi sato lesifanele.

²⁷ “Sikuphenyisisile-ke loku, sakukhandza kuliciniso lodvwa. Ngako-ke kuve kahle utibute ukusebentisa kuwe.”