Jobe 42 - Siswati 1996 Bible

Imphendvulo yaJobe yekugcina

¹ Jobe waphendvula Simakadze, watsi:

² “Ngiyati kutsi wena unemandla ekwenta konkhe, kute muntfu longaphatamisa loko lese uhlose kukwenta.

³ Ubute watsi: ‘Ngubani yena lona longati lutfo lokhinyabete teluleko tami?’ Empeleni nami ngikhulume ngetintfo lengingaticondzi, tintfo letimangalisa kakhulu kutsi ngingatati.

⁴ “Wena utsite: ‘Lalela-ke nyalo, ngitawukhuluma; ngitakubuta, wena ungiphendvule.’

⁵ Tindlebe tami setike teva ngawe, kodvwa nyalo emehlo ami asakubonile.

⁶ Ngako-ke manje sengiyatenyanya, ngiyaphendvuka ngitilahla elutfulini nasemlotseni.”

Siphetfo

⁷ Watsi Simakadze nasakhulume lamavi kuJobe, wagucukela ku-Elifazi, umThemani, watsi: “Wena nalabangani bakho lababili nginitfukutselele, ngobe anikakhulumi lokuhle ngami njengobe Jobe, inceku yami, akhulumile.

⁸ Ngako-ke tsatsani tinkunzi letisikhombisa netihhanca letisikhombisa, nihambe niye kuJobe, inceku yami, nifike ninikele ngato, tibe ngumnikelo wenu wekushiswa. Jobe, inceku yami, utanithandazela, mine-ke ngitawemukela nalomthandazo wakhe nginganiphatsi kamatima njengalokufanele bulima benu. Anikakhulumi lokuhle ngami njengobe Jobe, inceku yami, akhulumile.”

⁹ Ngako Elifazi, umThemani, naBildadi, umShuhi, naSofari, umNama, benta loko Simakadze abebatjele kona; Simakadze wawemukela umthandazo waJobe.

¹⁰ Watsi kube Jobe athandazele labangani bakhe, Simakadze wamenta wanjinga futsi; wanjinga ngalokuphindvwe kabili kunakucala.

¹¹ Bonkhe bomnakabo, nabodzadzewabo, nabo bonkhe lababemati kucala beta kuye badla naye endlini yakhe. Bamkhalela, bamdvudvuta kuko konkhe loko kuhlupheka Simakadze labekuletse etikwakhe; kwatsi lowo nalowo wamupha luhlavu lwesiliva kanye nendandatho yegolide.

¹² Simakadze imphilo yaJobe yamuva wayibusisa kakhulu kwengca yakucala. Abenetimvu letiti-14 000, nemakamela lati-6 000, netinkhabi letitinkhulungwane letimbili, netimbongolo letiyinkhulungwane.

¹³ Abenemadvodzana lasikhombisa nemadvodzakati lamatsatfu.

¹⁴ Libito lendvodzakati yakhe yekucala bekunguJemima, yesibili kunguKhesiya, yesitsatfu kunguKhereni Haphukhi.

¹⁵ Kulo lonkhe live bekute besifazane lababebahle kwendlula emadvodzakati aJobe; uyise wawabela lifa kanye nebafowabo.

¹⁶ Emvakwaloko, Jobe waphila iminyaka leli-140; waze wabona bantfwabakhe, nebantfwana bebantfwabakhe, kwaze kwayawufika esitukulwaneni sesine.

¹⁷ Jobe wafa asamdzala, asakhulile ngeminyaka.