Jobe 41 - Siswati 1996 Bible

¹ “Ungamdvonsa yini Leviyathani ngelidweba? Ungalubopha yini lulwimi lwakhe ngentsambo?

² Ungamfaka yini siwondvo ekhaleni lakhe, nome-ke ungawubhobosa yini umhlatsi wakhe ngelidweba?

³ Angatincengela yini kutsi umentele umusa, nome akuncenge ngekukhuluma kamnandzi?

⁴ Sivumelwane angasenta yini nawe kutsi umtsatse abe sigcili sakho kokuphela?

⁵ Ungamenta yini kutsi abe silwane lesingumnganakho njengenyoni, nome uhambe umbophe ngentsambo, khona atekujabulisa emantfombatana akho?

⁶ Labatsenga batsengise bangantjintjiselana yini ngaye? Bona bahwebi bangehlukaniselana yini ngaye?

⁷ Sikhumba sakhe ungasigcwalisa yini ngabondzangumadweba nome-ke inhloko yakhe ngemadweba?

⁸ Nawungake ubeke sandla sakho etikwakhe, ungeke uwukhohlwe umzabalazo wakhe, futsi ungeke ukuphindze ukwente loko.

⁹ “Usuke utiyenga nawungatsi ungenta nome yini ngaye, kumbuka nje kukucedza emandla.

¹⁰ Kute lonesibindzi sekumchukuluta. Pho, ngubani longakhona kumelana nami?

¹¹ Ngubani-ke lenginelicala kuye lokungafanela kutsi ngilikhokhele? Konkhe lokungaphansi kwemazulu kwami.

¹² “Ase ngikutekele ngemilente yakhe, emandla akhe kanye nesimo sakhe lesihle.

¹³ Ngubani nje longamkhumula libhantji lakhe langaphandle? Ngubani nje longamfaka ematomu?

¹⁴ Ngubani longaqunga avule umlomo wakhe, wona lowo logcwele ematinyo akhe lesabekako?

¹⁵ Umhlane wakhe unemigca yemahawu lahlanganiswe ndzawonye,

¹⁶ asondzelene lelinye kulelinye, kuze kungangeni kwasamoya emkhatsini wawo.

¹⁷ Ahlanganiswa lelinye kulelinye, anamatselane, futsi angeke ehlukaniseke.

¹⁸ Kutsimula kwakhe kusakata imibane yekukhanya, kantsi emehlo akhe afanana nemisebe yentsatsakusa.

¹⁹ Ukhafula imililo ngemlomo wakhe, kusakateke tinhlase temlilo.

²⁰ Emakhaleni akhe kutfucuka intfutfu, kube shangatsi simoko lesiphuma ebhodweni lelibilako nalisemlilweni wetinhlanga.

²¹ Kuphefumula kwakhe kuvutsela emalahle emlilo abe bovu, kulavuke emalangabi emlonyeni wakhe.

²² Emandla ahlala entsanyeni yakhe, tesabiso timhambela embili.

²³ Imitsebe yakhe ihlangene icinile, futsi ayehlukaniseki.

²⁴ Sifuba sakhe silukhuni njengelidvwala, silukhuni njengelitje lekusila.

²⁵ Nakaphakama, labanemandla bayatfutfumela, bahlehla nyova yena asengakagadli.

²⁶ Inkemba legwaza yena ayenti lutfo kuye, kanjalo nesikhali, nemcibisholo kanye nemkhonto.

²⁷ Kuye insimbi ifanana nelutsi lwetjani, litfusi linjengelukhuni lolubolile.

²⁸ Imicibisholo ayimenti abaleke, ematje esidubulelo afanana nemakhoba kuye.

²⁹ Umshiza kuye ufanana nelutsi loluncane; kukhehleta kwelutsi lwesikhali kuyamhlekisa.

³⁰ Lingaphansi lakhe limagebhugebhu njengetindzengelo, kusale umvila lomkhulu eludzakeni lonjengewesihliphi sekubhula emabele.

³¹ Wenta kujula kucubuke njengekubila kwelibhodo, anyakatise lwandle lube nemagwebu njengelibhodo lemafutsa.

³² Lapho ahambe khona kusala kunemagwebu, ungaze ucabange kutsi kujula kunetinwele letimhlophe.

³³ Kute lokulingana naye emhlabeni, usidalwa lesingesabi lutfo.

³⁴ Utibukela phansi tonkhe tilwane letitiphakamisako, uyinkhosi yato tonkhe tilwane letinkhulu letitigabatisa ngemandla ato.”