Jobe 40 - Siswati 1996 Bible

¹ Simakadze wakhuluma kuJobe, watsi:

² “Lona lophikisana naSomandla angamkhombisa yini indlela? Lowo lobeka Nkulunkulu licala akamphendvule!”

Jobe

³ Jobe waphendvula Simakadze, watsi:

⁴ “Mine angikafanelwa lutfo, pho, ngingaphendvula ngitsini kuwe? Ngibeka sandla sami emlonyeni wami.

⁵ Ngakhuluma kanye, kodvwa angisenamphendvulo, kabili, kodvwa angisenakusho lutfo.”

Simakadze

⁶ Simakadze wakhuluma kuJobe asesivunguvungwini, watsi:

⁷ “Bhukula-ke njengendvodza; ngitakubuta, wena utangiphendvula.

⁸ “Ungakukhombisa yini kungalungi kwami? Ungangilahla yini ngelicala mine, khona utetitfola ungenacala wena?

⁹ Unawo yini umkhono lofanana newaNkulunkulu? Lona liphimbo lakho liyadvuma yini njengelakhe?

¹⁰ Nakunjalo-ke, tihlobise ngekubabateka nangenkhatimulo, utembatsise ngeludvumo nangebukhosi.

¹¹ Khumula sikhahlo sentfukutselo yakho, bukisisa wonkhe umuntfu lotigcabhako, bese umehlisela phansi,

¹² buka bonkhe bantfu labatigcabhako, bese uyabatfobisa. Pitjita lababi lapho beme khona.

¹³ Bonkhe bangcwabe ndzawonye elutfulini, sitselisa buso babo ethuneni.

¹⁴ Nami-ke ngitakuvumela kutsi sandla sakho sangesekudla singakusindzisa.

¹⁵ “Ase ubuke imvubu lengayidala kanye nawe, nekutsi idla tjani njengenkhabi.

¹⁶ Maye, makhulu emandla ayo lasemilenteni! Yebo, emandla ayo asemisisheni lesetibilinini tayo!

¹⁷ Umsila wayo untjikita njengemsedari, netinyama temilente yayo titfungene.

¹⁸ Ematsambo ayo ayimibhobho yelitfusi, imikhono nemilente yayo injengemigcala yensimbi.

¹⁹ Ihamba embili etidalweni taNkulunkulu, noko uMdali wayo angabhekana nayo ngenkemba yakhe.

²⁰ Emagcuma ayivetela sivuno sawo, tonkhe tilwane tesiganga tidlale edvutane nayo.

²¹ Ilala ngaphansi kwetihlahla temanyeva, ibhace emkhatsini wemihlanga yasechaphotini.

²² Tihlahla temanyeva tiyifihla ematfuntini ato, itungeletwe ngemabhabhabhulomu emfula.

²³ Kuhhulukuhlela kwemanti emfula akuyetfusi, idlalisela ngekuntjweza, lite nome iJordane seyigcwele igola tintsetse.

²⁴ Ukhona yini longahle ayibambe ibukile, nome-ke ayetsiye abhobose likhala layo?”