Jobe 4 - Siswati 1996 Bible

Kukhulumisana kwekucala Inkhulumo ya-Elifazi

¹ Elifazi, umThemani, waphendvula watsi:

² “Nangabe umuntfu atimisele kukhuluma nawe, wena utambeketelela yini? Ngubani nje longake athule angakhulumi?

³ Ase ucabange kutsi banyenti kangakanani bantfu bewubafundzisa, nalababutsakatsaka bewubakhutsata.

⁴ Emavi akho abesimisa labakhubatelako, acinise nemadvolo lagedletelako.

⁵ Kodvwa nyalo kuhlupheka sekuhlasele wena, nawe sewujabhile, kuhlupheka sekukusukele, nawe sewuphelelwa ngemandla.

⁶ Kantsi lokukhonta kwakho Nkulunkulu akukudvudvuti ngani? Bona lobucotfo bakho abukuniki ngani litsemba?

⁷ “Ase ucabange naku: Wase wambona yini longenacala abhubha? Ngukuphi lapho labalungile bake babulawa khona?

⁸ Njengobe sengike ngabona kutsi labo labalima bubi bahlanyele kuhlupheka, bavele bavune kona loko.

⁹ Ngekuphefumula kwaNkulunkulu bayabhubha; ngekuvunguta kwentfukutselo yakhe bayaphela.

¹⁰ Emabhubesi angabhodla ahhonge, noko ematinyo alawo mabhubesi lamakhulu ahhumukile.

¹¹ Libhubesi libulawa kweswela kudla, emawundlu elibhubesi abaleke asabalale.

¹² “Kwanyenyiselwa livi kimi, tindlebe tami takubamba loko lokwakuhletjwa.

¹³ Kwatsi emkhatsini wekuvinjetelwa kwami ngemaphupho ebusuku, ngesikhatsi bantfu behlelwa ngulobukhulu butfongo,

¹⁴ kwesaba nekutfutfumela kwangigagadlela, kwatfutfumelisa onkhe ematsambo ami.

¹⁵ Umoya wantjuza wendlula embikwami, kwasikitela tinwele emtimbeni wami.

¹⁶ Wema; kodvwa angizange ngati kutsi kuyini. Kwema intfo embikwemehlo ami, ngase ngiva liphimbo lelihlebako, litsi:

¹⁷ ‘Kungenteka yini lobhubhako alunge kakhulu kunaNkulunkulu? Kungenteka yini umuntfu abe msulwa kakhulu kuneMdali wakhe?

¹⁸ Nangabe Nkulunkulu angatetsembi tinceku takhe, nangabe tingilosi takhe atibeka licala,

¹⁹ kakhulu kangakanani-ke labo labahlala etindlini letakhiwe ngeludzaka, letitisekelo tato tiselutfulini, labo labapitjiteka kalula njengemiyiyane.

²⁰ Babhujiswa emkhatsini wekusa nekuhwalala, babhubha kokuphela kubete nalokunakako loko.

²¹ Atikadvonswa yini tindophi temathende abo, badzimate bafe bangenakuhlakanipha nje?’ ”