Jobe 39 - Siswati 1996 Bible

¹ “Uyati yini kutsi timbuti tentsaba titala nini? Uyaye ubukele yini inyamatane nayitalako?

² Uyaye utibale yini tinyanga tato tize titale? Uyasati yini sikhatsi sato sekutala?

³ Tiguca phansi titale bantfwabato, kuphele nemihelo yato.

⁴ Emazinyane ato ayacina, akhulele etigangeni, ahambe angaphindzi abuye.

⁵ “Ngubani lowenta imbongolo yesiganga kutsi ihambe ikhululekile? Ngubani lowatfukulula tindilimo tayo?

⁶ Ngayinika lihlane kutsi libe likhaya layo nematsafa eluswayi kutsi abe yindzawo yayo yekuhlala.

⁷ Ayihlushwa ngimisindvo yemadolobha, kantsi futsi kute nemuntfu longayifuya ayisebentise.

⁸ Yehla yenyuka nemagcuma abe lidlelo layo, ifunana neluhlata lonkhe.

⁹ “Inyatsi ingavuma yini kutsi uyisebentise? Ingakutsambela yini kuhlala esibayeni sakho ebusuku?

¹⁰ Ungayifaka yini emseleni ngematomu? Ingatilima yini leto tigodzi emvakwakho?

¹¹ Ungawetsemba yini lamandla ayo lamakhulu? Ungawuyekelela yini umsebenti wakho lomkhulu kuyo?

¹² Ungetsembela yini kuyo kutsi ingakuletsela sivuno sakho, isibutsisele ndzawonye ebaleni lakho lekubhulela?

¹³ “Timphiko tenshi tiyaphephetela ngenca yenjabulo. Kodvwa tingeke tilinganiswe netingwabha netinsiba tadvoye.

¹⁴ Emacandza ayo iwatalela phansi, iwafukamele ngesihlabatsi,

¹⁵ inganaki kutsi angahle anyatseleke ngetinyawo, nekutsi tilwane tesiganga tingawafohlota.

¹⁶ Emantjwele ayo iwaphatsa ngelunya, kube shangatsi akasiwo ayo, ayinaki nekutsi yake yahelwa yini ngawo,

¹⁷ ngobe Nkulunkulu akazange ayiphe kuhlakanipha, nome-ke ayinike ingcondvo levulekile.

¹⁸ Noko nayivula tinsiba tayo yentela kugijima, ivele ilihleke lusulu lihhashi nemgibeli walo.

¹⁹ “Lihhashi uyalinika yini emandla alo, nome wembese intsamo yalo ngemdlonga?

²⁰ Uyalenta yini ligcumagcume njengentsetse, ulente likhale ngendlela yekutigcabha lokutfutfumelisako?

²¹ Lihwaya phansi ngendlela leyesabekako, lijabule emandleni alo, lisukeleke naliya ekuhlaseleni emphini.

²² Likuhleka lunya kwesaba, lingesabi lutfo; alikhweshi futsi aliyibalekeli inkemba.

²³ Umgodla wemicibisholo ukhehletela ecebeni lalo, kukanye nesikhali lesimanyatelako nesikhali lesidze.

²⁴ Livukwa lusinga, litsatse emabanga lamakhulu, nakukhala licilongo, kute longakhona kulimisa.

²⁵ Litsi licilongo lingakhala, litsi: ‘Nako-ke!’ Imphi liyiva ngeliphunga isesekhashane, liva netindvuna temphi tidla siga.

²⁶ “Lokuhlakanipha kwakho kuyamfundzisa yini lohheya kutsi ate akwati kundiza, endlalele timphiko takhe ngaseningizimu?

²⁷ Lona lusweti lundiza ngekutjelwa nguwe yini, luze lwakhe nesidleke salo etulu?

²⁸ Luhlala esiweni ngisho nasebusuku, inqaba yalo kube lufantsa lwelidvwala.

²⁹ Nalusuka lapho, luhamba luyewufuna kudla kwalo; emehlo alo avele akubone kusesekhashane.

³⁰ Bantfwabalo lubondla ngengati; lapho kunalokubulewe ngakhona, ngulapho lukhona nalo.”