Jobe 38 - Siswati 1996 Bible

Simakadze uphendvula Jobe

¹ Simakadze waphendvula Jobe asesivunguvungwini, watsi:

² “Ngubani lona lokhinyabeta teluleko tami ngemavi late lwati?

³ Bhukula-ke njengendvodza; ngitakubuta, wena ungiphendvule.

⁴ “Bewukuphi wena, nangibeka sisekelo semhlaba? Ngitjele, nawukucondza loko.

⁵ Ngubani labekala bukhulu bawo? Nakanjani ufanele kukwati loko! Ngubani labedvonsa intsambo yekukala nawukalwako?

⁶ Tinsika tawo temiswaphi? Labekwa ngubani litje lekusimisa likona,

⁷ ngesikhatsi tinkhanyeti tentsatsakusa tihlabela kanyekanye, netingilosi tonkhe tihlatjeleliswa kujabula?

⁸ “Ngubani lowavala emasango ekuvimbela lwandle, naluphuphuma, luphuma esiswini semhlaba,

⁹ ngesikhatsi ngenta emafu aba yingubo yalo ngilugocota ngebumnyama lobukhulukati,

¹⁰ ngesikhatsi ngimisa iminyele yalo, ngibeka iminyango neticabo talo,

¹¹ ngesikhatsi ngitsi: ‘Ungahamba ugcine lapha, ungabe usachubekela embili, emagagasi akho latigcabhako atawugcina lapha’?

¹² “Wase wakutfuma yini kusa nome ukhombe intsatsakusa indzawo yayo?

¹³ Wase wayitjela yini intsatsakusa kutsi ichwage lomhlaba, ishukumise lababi lapho babhace khona?

¹⁴ Kuphuma kwenhlavu yelilanga kwenta emagcuma netihosha kubonakale njengemitfungo yengubo, kukhanye njengekugcama kweluphawu ebumbeni.

¹⁵ Kukhanya kwemini kunemandla kulababi, kubavimbela kutsi bangakwenti lokubi.

¹⁶ “Use waya yini etiyalwini telwandle, nome uhambe ekujuleni kwelwandle?

¹⁷ Sewuke wakhonjiswa yini emasango ekufa? Sewuke wawabona yini emasango ematfunti ekufa?

¹⁸ Ubucondza kahle yini bubanti bemhlaba? Ase ungitjele, nangabe uyakwati konkhe loku.

¹⁹ “Iphi indlela leya ekhaya lekukhanya? Bona bumnyama uyabati yini kutsi buhlalaphi?

²⁰ Ungakumikisa yini etindzaweni tako? Uyatati yini tindlela letiya emakhaya ako?

²¹ Nakanjani ufanele kukwati loko, ngobe wase utelwe! Maye, sewuwadlile emabele bo!

²² “Wase wangena yini etingungwini tangcocwane, nome uke watibona yini tingungu tesangcotfo,

²³ lengikugcinele tikhatsi letimatima, lekutinsuku tekulwa kanye netemphi?

²⁴ Umbane lona usuke uchamuka ngakuphi, nome-ke umoya wasemphumalanga losakateka nemhlaba wonkhe usuke uchamukaphi?

²⁵ Ngubani lomba imisele yetikhukhula temanti emvula, nalomba indlela yekudvuma kwelitulu,

²⁶ kutekunisela live lelingahlalwa ngumuntfu, lihlane kalashameshame,

²⁷ nekwenelisa live lelingenalutfo lihlume libe neluhlata?

²⁸ Imvula inaye yini uyise? Ngubani nje lotala ematfonsi ematolo?

²⁹ Ngcocwane uphuma esiswini sabani? Ngubani lotala sitfwatfwa emazulwini,

³⁰ ngesikhatsi emanti asalukhuni njengelitje, nangesikhatsi kujula kwemanti sekulidvwala?

³¹ “Ungasibophela yini ndzawonye Silimela lesimengetelako? Ungatichacha yini tintsambo teMtsala?

³² Ungaticondzisa yini tinkhanyeti kutsi tihambe ngekugcina sikhatsi sato? Ungalikhombisa yini liBhele lelitinkhanyeti kanye netinkhanyeti talo letincane kutsi kufanele kuhambe kushonephi?

³³ Uyayati yini imitsetfo yasemazulwini? Leyo mitsetfo ungayenta yini kutsi isebente lapha emhlabeni?

³⁴ “Ungawamemeta yini emafu, utembese wena ngelibhudlo lemanti?

³⁵ Ungayitfuma yini imibane kutsi ibaneke? Yona ingakuphendvula yini itsi: ‘Naku sesikhona’?

³⁶ Ngubani nje lowaphakela inhlitiyo ngekuhlakanipha nome wapha ingcondvo kucondza?

³⁷ Ngubani nje lohlakaniphe kangangekutsi angabala emafu? Ngubani longagoboncisa timbita temanti tasemazulwini,

³⁸ ngesikhatsi lutfuli luba lukhuni nemagadze emhlaba anamatselana?

³⁹ “Ungalitingelela yini libhubesikati kudla? Ungakwesutsisa yini kulamba kwemabhubesi,

⁴⁰ ngesikhatsi abhaca khona emihumeni yawo nome abhace khona etincumatsini?

⁴¹ Ngubani lonika emahhwabayi kudla, ngesikhatsi emazini awo akhala kuNkulunkulu azula aswele langakudla?”