Jobe 37 - Siswati 1996 Bible

¹ “Ngenca yaloku ngiva shangatsi inhlitiyo yami iyagcumagcuma, isuka endzaweni yayo.

² Lalela! Lalela kudvuma kwelivi lakhe, nalokugedletela lokuphuma emlonyeni wakhe.

³ Ujikijela imibane yakhe ngaphansi kwemazulu, ayitfumele emikhawulweni yonkhe yemhlaba.

⁴ Emvakwaloko kuta umsindvo wekudvuma kwakhe, ubhavumula ngelivi lakhe lebukhosi. Liphimbo lakhe lingabhavumula akusali lutfo lunganyakati.

⁵ Liphimbo laNkulunkulu libhavumula ngetindlela letimangalisako. Wenta tintfo letinyenti letinkhulu naletingetulu kwetingcondvo tetfu.

⁶ Utjela ngcocwane atsi: ‘Yehlela emhlabeni,’ nasetihlambini tetimvula atsi: ‘Bani sihhuhhula lesinemandla.’

⁷ Usuke entela kutsi bonkhe bantfu labentile bayati imisebenti yakhe, umisa bonkhe bantfu emisebentini yabo.

⁸ Tilwane tiyabhaca, tihlale emihumeni yato.

⁹ Sihhushuhhushu sihoshobe siphume emgodzini waso, nelichwa liphume emoyeni lowendlulako.

¹⁰ Kuphefumula kwaNkulunkulu kukhafula lichwa, kwente emanti abe tibhelekeca temanti lomile.

¹¹ Wetfwesa emafu ngemswakama, asakate imibane igcwale kuwo.

¹² Ngekuyalwa nguye iphitsitela igcwale umhlaba wonkhe jikelele, iphutfuma kwenta loko layitfume kona.

¹³ Wehlisa emafu, khona atewujezisa bantfu, nome atewunisela umhlaba wakhe, akhombise lutsandvo lwakhe.

¹⁴ “Lalela lapha, Jobe, asewume ucabange kahle ngetimanga taNkulunkulu.

¹⁵ Uyati yini kutsi Nkulunkulu uwabusa kanjani emafu, nekutsi uyiklazisa kanjani imibane yakhe?

¹⁶ Uyawati yini kutsi emafu alenga kanjani eme kahle kangaka emoyeni, angadziliki, leto timangaliso takhe lowo lophelele ngelwati?

¹⁷ Wena muntfu loshiswa kwekwembatsa kwakho ngesikhatsi kuhhusha umoya waseningizimu uthulisa live,

¹⁸ ungahlanganyela yini naye ekwendlaleni kwakhe sibhakabhaka lesicine njengesibuko selitfusi lelincibilikisiwe?

¹⁹ “Sitjele kutsi sifanele sitsini kuNkulunkulu; tingcondvo tetfu timnyama, site lutfo lesingalusho kuye.

²⁰ Kufanele yini kutsi atjelwe kutsi nami ngifuna kukhuluma? Ukhona yini kambe umuntfu longafuna kumitwa eva?

²¹ Kute umuntfu longabukana nelilanga, ebukhatikhatini balo esibhakabhakeni, emvakwekutsi umoya sewusishanyele sonkhe.

²² Uchamuka enyakatfo ngebukhatikhati bakhe begolide, Nkulunkulu uta ngebuNkulunkulu bakhe lobesabekako.

²³ Somandla ungetulu kwemandla etfu, uphakeme ngemandla nangekulunga kwakhe; ngebukhulu bekulunga kwakhe akacindzeteli muntfu.

²⁴ Ngako-ke bantfu bayamhlonipha, ngobe akabanaki yini bonkhe labacabanga kutsi bahlakaniphile enhlitiyweni?”