Jobe 35 - Siswati 1996 Bible

¹ Elihu wase uyakhuluma, watsi:

² “Usho kutsi kambe ngabe loku kulungile? Utsi: ‘Ngiyawuhlangulwa nguNkulunkulu.’

³ Kodvwa uyambuta utsi: ‘Kutangisita ngani mine loko, kona mine ngitfolani ngekuhlala ngingoni?’

⁴ “Ngitsandza kukuphendvula kuloko, wena nalabangani bakho abakanye nawe.

⁵ Gucukela ngasemazulwini ubuke, bheka ngasemafini wona lasetulu kangaka kuwe.

⁶ Nangabe wona wena, loko kumtsintsa ngani yena? Nangabe tono takho titinyenti, loko kumentani yena?

⁷ Nangabe ulungile, uletsani kuye, nome-ke utfolani yena esandleni sakho?

⁸ Bubi bakho buhlupha umuntfu lonjengawe, nekulunga kwakho kutsintsana nebantfu bemhlaba.

⁹ “Bantfu bakhala bumayemaye ngaphansi kwemtfwalo wekucindzetelwa, bancusa kukhululwa kuwo umkhono walabanemandla.

¹⁰ Kodvwa kute lotsi: ‘Uphi Nkulunkulu, uMdali wami, lowephana ngetingoma ebusuku,

¹¹ losifundzisa lokunyenti tsine kunetilwane temhlaba, asente sihlakaniphe kakhulu kunetinyoni letindiza emoyeni?’

¹² Akaphendvuli bantfu nabakhala ngenca yekutiphakamisa kwalababi.

¹³ Liciniso, Nkulunkulu akayilaleli imibhedvo yetikhalo tabo. Somandla akatinaki, njengobe tilite nje.

¹⁴ Kangakanani-ke kutsi angalalela, nawutsi awumboni yena, kutsi nome licala lakho lisembikwakhe, wena kufanele ulindzele yena,

¹⁵ ngetulu kwaloko, kutsi lulaka lwakhe alujezisani, futsi akanaki lutfo nalolu twi lwalokubi.

¹⁶ Ngako-ke Jobe ukhuluma umbhedvo wodvwa nje; ulibala kutsakuta lite nje lodvwa, kodvwa abe angenalwati.”