Jobe 34 - Siswati 1996 Bible

¹ Elihu wase uyakhuluma, watsi:

² “Vanini emavi ami, nine labahlakaniphile; lalelani mine, nine bantfu labafundze bagogodzela.

³ Ngobe indlebe iyawavivinya emagama, njengobe nelulwimi lunambitsa kudla.

⁴ Asitibonele nje kwatsine kutsi ngukuphi lokulungile, asifundze kanyekanye sonkhe kutsi yini lenhle.

⁵ “Jobe utsi: ‘Ngimsulwa, kodvwa Nkulunkulu ungima kulunga.

⁶ Naloku ngilunge kangaka, ngitsatfwa njengalonemanga, naloku ngingenacala umcibisholo wakhe uhlaba linceba lelingelapheki.’

⁷ Jobe kantsi ngumuntfu lonjani, longenayo ngisho inseketse yenhlonipho kuNkulunkulu.

⁸ Uhlanganyela nalabenta lokubi, umdzibimunye nalababi,

⁹ ngobe utsi: ‘Umuntfu akumsiti ngalutfo kwetama kujabulisa Nkulunkulu.’

¹⁰ “Ngako lalelani lapha kimi, nine bantfu labanekucondza. Akube khashane naNkulunkulu kuba ngumenti walokubi, kwenta bubi akube khashane naSomandla.

¹¹ Umuntfu umkhokhela njengaloku entile, ambuyisele njengalokufanele kutiphatsa kwakhe.

¹² Kumatima kucabanga kutsi Nkulunkulu angahle ente lokubi, nekutsi Somandla angaphambukisa umtsetfo.

¹³ Ngubani lowambeka lapha emhlabeni kutsi awubuse? Ngubani lowamenta waba ngumphatsi wemhlaba wonkhe?

¹⁴ Kube bekuyinhloso yakhe kususa umoya wakhe nemphefumulo wakhe,

¹⁵ bonkhe bantfu bebangafisa kwetimphungane bafe batsi ngco, bonkhe babuyele elutfulini.

¹⁶ “Nangabe unako kucondza, lalela lapha, lalela loko lengitakusho.

¹⁷ Umuntfu lotondza umtsetfo angabusa yini? Ungamlahla yini longuSokulunga nalonguSomandla?

¹⁸ Akusiye yini lolawula emakhosi atsi: ‘Aninamsebenti walutfo,’ nakulabahlonishwako atsi: ‘Nibabi,’

¹⁹ longakhetsi ngisho nakuto tikhulu, ngisho nakulabanjingile nalabamphofu, ngobe phela bonkhe bangumsebenti wetandla takhe?

²⁰ Bafa ngekushesha lokukhulu, ekhatsi nebusuku, bantfu bayatfutfumela bafe, labanemandla besuka bangakatsintfwa ngumuntfu ngisho nangesandla sakhe.

²¹ “Emehlo akhe abuka kuhamba kwemuntfu njalo, ubona tonkhe tinyatselo takhe.

²² Kute bumnyama lobumnyama kuye, kute nelitfunti lelimnyama, lapho benti balokubi bangabhaca khona.

²³ Nkulunkulu akadzingi kube solomane aphilikishana nebantfu abavivinya, kutsi bete kuye batekwehlulelwa.

²⁴ Ngaphandle nje kwemibuto uvele esuse labanemandla, abeke labanye etikhundleni tabo.

²⁵ Ngobe uyakunaka lokwenta kwabo, ubaketula ngebusuku bunye nje kube bayaphela njalo.

²⁶ Uyabajezisa ngetento tabo letimbi, akwente ebaleni kubona wonkhe umuntfu,

²⁷ ngobe bagucuka ekulandzeleni yena, abanandzaba nanayinye nje yetindlela takhe.

²⁸ Babangela kutsi lokukhala kwalabamphofu kufike etindlebeni takhe, wadzimate wakuva kukhala kwalabeswele.

²⁹ Kodvwa kube uthulile, ngubani labengamsola? Nakangafihla buso bakhe, ngubani longambona? Noko ubusa etikwemuntfu netive ngalokufananako,

³⁰ kuze avimbe longenaNkulunkulu angabusi, angabekeli bantfu tingibe.

³¹ “Ake ngitsi nje umuntfu utsi kuNkulunkulu: ‘Nginelicala, kodvwa ngingeke ngiphindze ngone.

³² Ngifundzise loko lengingeke ngikubone, nangabe ngonile, ngingeke ngisaphindza ngone.’

³³ Nkulunkulu angakuvuza yini njengekutsandza kwakho, nawala kuphendvuka? Nguwe lokufanele ukhiphe sincumo, akusimi, ngako-ke, ngitjele loko lokwatiko.

³⁴ “Emadvodza lanekuhlakanipha ayasho, nemadvodza lanekucondza langivako, atangitjela:

³⁵ ‘Jobe ukhulunyiswa kungabi nalwati, emavi akhe eswela kucondza.’

³⁶ Cabangisisani ngaloku lokukhulunywa nguJobe, ngobe uphendvula njengemuntfu lomubi longenangcondvo,

³⁷ wengeta buvukelambuso kulesono sakhe, ushaya tandla tendzelelo lapha emkhatsini wetfu, alibale kutsakuta, abaliselana naNkulunkulu.”