Jobe 33 - Siswati 1996 Bible

¹ “Manje-ke, Jobe, lalela nankha emavi ami, kulalele konkhe loku lengitakukhuluma.

² Manje-ke, sengitawucala ngikhulume, emavi ami asaselulwimini lwami.

³ Emavi ami ngawo lakhombisa ngalokusebaleni kutsi ngicotfo enhlitiyweni, lulwimi lwami lukhuluma kona cobo loku lengikwatiko.

⁴ Moya waNkulunkulu ungentile. Umphefumulo waSomandla unginika kuphila.

⁵ Ngiphendvule-ke, nawungakhona, tilungiselele kubhekana nami.

⁶ Mine ngifanana nawe embikwaNkulunkulu, nami ngatatjwa ebumbeni.

⁷ Ngako-ke akukadzingeki kutsi ungesabe, sandla sami ngeke sibe matima etikwakho.

⁸ “Nawe ukhulume nami ngikhona, ngive onkhe emavi akho, watsi:

⁹ ‘Mine ngimsulwa, anginasono; ngihlobile, anginacala.

¹⁰ Kodvwa Nkulunkulu ungibeka licala, ungitsatsa njengesitsa sakhe.

¹¹ Tinyawo tami utitsekeleta ngetinketane, acaphelisise tonkhe tinyatselo tami.’

¹² “Kodvwa ngiyakutjela ngitsi: Kuloku uyalahleka, ngobe Nkulunkulu mkhulu kunemuntfu.

¹³ Manje-ke, ukhononelani kuye, ube utsi akawaphendvuli emavi emuntfu?

¹⁴ Ngobe Nkulunkulu uyakhuluma nome ngayiphi indlela. Kulesinye sikhatsi kuba ngulomuntfu longacondzi kutsi utsini Nkulunkulu.

¹⁵ Ukhuluma ngemaphupho nangemibono yasebusuku, bantfu nabalele emacansini abo, badvodla butfongo etingutjeni tabo.

¹⁶ Angakhuluma nasetindlebeni tabo, abesabise ngetecwayiso takhe.

¹⁷ Loko ukwentela kutsi ancandze umuntfu ekwenteni tono nasekutishayeni sifuba,

¹⁸ entela kugcina umphefumulo wakhe ungashoni emgodzini nemphilo yakhe kutsi ingabhubhi ngenkemba,

¹⁹ nome umuntfu angeviswa buhlungu ecansini lakhe ngemahlaba nangekujabha lokungenamkhawulo kwasematsanjeni,

²⁰ kangangekutsi umtimba wakhe ungasakukhanuki nekudla, kunenkhetele inhlitiyo nome abuka kudla lokumnandzi kangakanani,

²¹ umtimba wakhe wondze ube ngumkhehlekhehle, kutsi ematsambo awo labefihlakele bese avela ebaleni.

²² Umphefumulo wakhe udvonseleke emgodzini, nemphilo yakhe indvonswe titfunywa tekufa.

²³ “Kantsi kube bekungaba nengilosi leme ngakuye lengumlamuleli, yinye nje enkhulungwaneni, letabotjela umuntfu kutsi yini lokubi nalokuhle,

²⁴ ibe nemusa kuye itsi: ‘Mane umvikele angayi emgodzini. Sengimtfolele inhlawulo,’

²⁵ umtimba wakhe bese uyavuseteleka ube musha njengeweluswane, ubuyiseleke ube musha njengasebusheni bakhe.

²⁶ Uyathandaza kuNkulunkulu atfole umusa kuye; ubona buso baNkulunkulu ajabule aze amemete. Nkulunkulu umbuyisela esimeni sakhe sekulunga.

²⁷ Uyabe sewuya kubantfu, afike atsi: ‘Ngonile, ngagwegwisa loko lobekulungile, kodvwa angikakutfoli loko lebengikufanele.

²⁸ Uwephulile umphefumulo wami kutsi ungayi emgodzini, sengitawuhlala ngijatjuliswa kukhanya.’

²⁹ “Nkulunkulu wenta tonkhe letintfo kumuntfu, kabili nome katsatfu,

³⁰ entela kuncandza umphefumulo wakhe ungangeni emgodzini, kuze kukhanya kwemphilo kukhanye emphilweni yakhe.

³¹ Lalela la, Jobe, lalela mine. Thula, ngitabe sengiyakhuluma.

³² Nawunako longakusho, ngiphendvule, ukhulume kakhulu, ngobe ngifuna kutsi uhlanguleke kahle.

³³ Kodvwa nawute lutfo, lalela la kimi, uthule, ngobe mine ngitakufundzisa kuhlakanipha.”