Jobe 32 - Siswati 1996 Bible

Elihu

¹ Njengobe Jobe abeciniseke kangaka ngebumsulwa bakhe, lamadvodza lamatsatfu ase ayayekela lokulibala kwetama kumphendvula.

² Kodvwa Elihu, umsa waBarakheli, umBuzi, wesive sakaRamu, watfukutselela Jobe kamatima ngekutsi kube nguye lotishoko kutsi umsulwa, kungete kwasho Nkulunkulu.

³ Wabatfukutselela labangani baJobe labatsatfu, ngobe babehlulekile kutfola sici kuJobe, kantsi phela bebakadze bamsolile.

⁴ Manje-ke Elihu abesethulile yena kukhuluma naJobe, ngobe bona babebadzala kunaye.

⁵ Kodvwa watsi kube abone kutsi labangani baJobe labatsatfu sebate labangahle bakusho, intfukutselo yakhe yavuka yema ngetinyawo.

⁶ Ngako Elihu, umsa waBarakheli, umBuzi, wakhuluma watsi: “Ngimncane ngeminyaka, nine nibadzala; ngiko nje bengesaba ngingafuni kunitjela loko lengikwatiko mine.

⁷ Ngicabange ngatsi: ‘Kukhula lokufanele kukhulume, iminyaka leminyenti lekufanele ifundzise kuhlakanipha.’

⁸ Kodvwa umoya lokumuntfu, kuphefumula kwaSomandla, lokunika umuntfu kucondza.

⁹ Akusibo labadzala bodvwa labanekuhlakanipha, futsi akusibo lase bagugile bodvwa labakwatiko lokulungile.

¹⁰ “Ngako-ke ngitsi: Lalelani kimi; nami futsi ngitanitjela loko lengikwatiko.

¹¹ Nginimele ngesikhatsi nisakhuluma, nganilalela nisabeka kubona kwenu ngekuhlakanipha, ngesikhatsi nisaphenya emagama.

¹² Nami nginilalele ngayo yonkhe ingcondvo yami, kodvwa kute namunye wenu lokhonile kubeka Jobe licala ngalokukhanyako, kute namunye lokhonile kuphendvula emavi akhe.

¹³ Ningasho kutsi: ‘Sikutfolile kuhlakanipha, akube nguNkulunkulu lophikisa Jobe, hhayi umuntfu.’

¹⁴ Kodvwa Jobe emavi akhe abengakawacondzisi kimi, ngako-ke ngingeke ngimphendvule ngetinkhulumo tenu.

¹⁵ “Sebamangele, abasenako labangakusho; sebaphelelwe ngemavi.

¹⁶ Kufanele ngime yini, njengaloku sebathulile nje, njengaloku sebatfomekile nje nyalo bangasenamphendvulo?

¹⁷ Nami ngitawubeka inkhulumo yami; nami ngitawukhuluma loko lengikwatiko.

¹⁸ Ngobe mine ngigcwele emavi, nemoya longekhatsi kwami uyangicindzetela.

¹⁹ Lapha ngekhatsi kwami nginjengeliwayini lelivalelwe ebhodleleni, njengetikhumbasikhwama teliwayini lelisha lesetifuna kupumuka.

²⁰ Kufanele ngikhulume kuze ngitfole kuhhamuleka, kufanele ngivule umlomo wami ngiphendvule.

²¹ Kute muntfu lengitamkhetsa, futsi kute lengitamyenga ngelite,

²² futsi-ke kube bengiyingcweti ekuyenganeni, uMdali wami abetangisusa masinyane emhlabeni.”