Jobe 31 - Siswati 1996 Bible

¹ “Ngenta sivumelwane nemehlo ami kutsi ngingeke ngiyibuke ngenkhanuko intfombi.

² Ngabe siyini sabelo semuntfu lesiphuma kuNkulunkulu? Siyini sabelo lesilifa leliphuma etulu kuSomandla?

³ Akusiyo yini imbhubhiso kulababi, sehlakalo kulabo labenta sono?

⁴ Akatiboni yini tindlela tami, abale tonkhe tinyatselo tami?

⁵ “Nangabe ngihamba ngekungetsembeki, nome-ke lunyawo lwami lusheshisile lwajakela emangeni,

⁶ Nkulunkulu akangilinganise ngesilinganiso seliciniso, utabe sewuyatfola kutsi ngimsulwa.

⁷ Nangabe tinyatselo tami tijikile emkhondvweni, nangabe inhlitiyo yami beyidvonswa ngemehlo ami, nome-ke nangabe tandla tami betingcolisiwe,

⁸ nakunjalo-ke, lomunye umuntfu akadle konkhe loko bengikuhlanyele, netilimo tami atizushunwe.

⁹ “Nangabe inhlitiyo yami ike yahungwa ngulomunye umfati, nome-ke ngike ngayawukhukhubala emvakwesivalo samakhelwane,

¹⁰ nakunjalo-ke, umfati wami akahambe ayewusilela lenye indvodza, alale nalamanye emadvodza.

¹¹ Ngobe loko bekungaba lihlazo nendlisamahloni, sono lesifanele sehlulelwe.

¹² Lowo ngumlilo loshisa kube khona imbhubhiso, ngabe kusizuphunile sivuno sami sonkhe.

¹³ “Nangabe ngingakatiphatsi njengekwemtsetfo tisebenti tami letidvuna naletisikati, natinetikhalo ngami,

¹⁴ ngitakwenta njani, nangabe Nkulunkulu asabhekana nami ngaloko? Ngitawuphendvula ngitsini, nasengibutwa?

¹⁵ Akusiye yini yena lowo lowabumba mine esiswini lona lowabumba tona? Akusiye yini lowaseluka sonkhe etiswini tabomake?

¹⁶ “Nangabe angikahlangabetani neticelo talabamphofu, nome-ke ngenta emehlo emfelokati aphophota tinyembeti,

¹⁷ nangabe ngatigodlela mine kudla kwami, ngangete ngahlephulelana nalabatintsandzane,

¹⁸ kodvwa ngabondla kusukela ebusheni bami, ngaba njengeyise kubo, kusukela ekutalweni kwami ngabondla bafelokati,

¹⁹ nangabe ngake ngabukelela umuntfu afa, abulawa kweswela kwekwembatsa, nome loweswele nje angenasembatfo,

²⁰ inhlitiyo yakhe yangete yangibusisela kumfutfumalisa ngetimfulumane letiphuma etimvini tami,

²¹ nangabe ngake ngaphakamisa sandla sami etikwaloyintsandzane, ngati kahle kutsi mine ngiyalalelwa enkhundleni,

²² nakunjalo-ke, umkhono wami awumane uncutfuke lapha elungeni lesiphanga, awujubeke elungeni lesiphanga, ulahleke phansi.

²³ Ngobe mine ngangiyesaba kakhulu imbhubhiso levela kuNkulunkulu. Nangenca yekwesaba bukhosi bakhe nje, ngangingeke ngiyente intfo lenje.

²⁴ “Nangabe bengibeke litsemba lami egolideni, nome ngasho kuyo igolide lecengiwe ngatsi: ‘Wena usivikelo sami,’

²⁵ nangabe ngangijatjuliswa bunjinga bami, umcebo lowawakhiwe tandla tami,

²⁶ nangabe nganaka lilanga ekukhanyeni kwalo nome inyeti ekuhambeni kwayo lokumangalisako,

²⁷ kangangekutsi inhlitiyo yami yase iyebeka ngikuhloniphe ngekwanga sandla sami,

²⁸ nakunjalo-ke, konkhe loko tono lokusafanele tehlulelwe, ngobe ngabe bengingaketsembeki kuNkulunkulu losetulu.

²⁹ “Nangabe ngajabulela sitsa sami, nasehlelwa ngulokubi, nome ngagalajela inhlupheko leyasehlela,

³⁰ angizange ngiwuvumele umlomo wami kutsi wone ngekutsi ngikhiphe sicalekiso simelane nemphilo yaso.

³¹ Bantfu labasekhaya kami abazange sebasho yini batsi: ‘Ngubani longazange asayidle ayesutse inyama yakaJobe?’

³² Kodvwa kute nasinye sihambi lesake salala ngephandle. ngobe umnyango wami wawuhlala uvulekele tihambi.

³³ Ngake ngasifihla yini sono sami, njengobe kuhlale kwenta emadvodza, ngake ngalifihla yini licala lami enhlitiyweni yami?

³⁴ Ngempela, angizange ngesabe kutsi bantfu batawutsini, angizange ngibindze nome ngitivalele endlini ngenca yekubesaba labo bantfu.

³⁵ “Awu! Kube mane kunemuntfu longangiva! Sengiyakusicilela manje kutivikela kwami. Akangiphendvule phela Somandla. Lowo longibeka licala akalibhale phansi.

³⁶ Empeleni bengingaletjatsa, bengingalifaka enhloko njengemchele.

³⁷ Bengingamlandzisa ngato tonkhe tinyatselo tami, bengingalingisa umbusi, ngicondzane naye ngco.

³⁸ “Nangabe live lami likhala ngami, nayo yonkhe imisedlana yalo imanti tinyembeti,

³⁹ nangabe bengidle titselo talo ngaphandle kwekukhokha tindleko talo, nome ngababulalisa ngendlala labo labahlala kulo,

⁴⁰ nakunjalo-ke, akuvumbuke emanyeva kulo esikhundleni sakolo; kuvumbuke lukhula esikhundleni sebhali.” Aphela lapho-ke emavi aJobe.