Jobe 30 - Siswati 1996 Bible

¹ “Kodvwa nyalo sebahlekisa ngami, bantfu labancane kunami, boyise babo lengangingabeyisa ngingabavumeli kutsi basite tinja tami ekweluseni timvu tami.

² Ngangingatfolani nje ngemsebenti wetandla tabo, bantfu lababemandla abo esukile kubo?

³ Bondziswe kweswela nesigagadvu sendlala, bahhubhana netimphandze tetihlahla tasehlane, yebo, elugwadvule ebusuku.

⁴ Babehlwatsika titselo letimunyu emahlatsini, kudla kwabo kutimphandze tesihlahla semtsanyelo.

⁵ Bacoshwa kubantfu bakubo, bekhutwa njengemasela.

⁶ Bacindzeteleka kutsi bayewuhlala etihosheni letomile, yebo, etihosheni letomile letingenamanti; bahlale emkhatsini wemadvwala nasemigodzini.

⁷ Babebhonsa ekhatsi emahlatsini njengetimbongolo tesiganga, bahlangane ngetinhloko phasetihlahla,

⁸ luhlobo lwebantfu lababi nalabalihlazo lelingachazeki, bacoshwa bakhishwa eveni.

⁹ “Manje sengiyinhlekisa kumadvodzana abo, sengiyingoma kuwo; ngiyintfo yekudlala.

¹⁰ Sebayangenyanya, bahambela khashane nami, abasesabi nekungikhafulela ebusweni.

¹¹ Njengobe Nkulunkulu sewungente ngaba butsakatsaka, wangenta ngaba sehluleki, bangitfobisa ngibukile.

¹² Ngesekudla sami sive siyahlasela, babekela tinyawo tami tingibe, bakha emasu ekungibhubhisa.

¹³ Bavimba indlela yami, bayaphumelela ekungibhubhiseni, kantsi kute nalobasitako.

¹⁴ Batseleka ngato tonkhe tintfunjana tenqaba batengihlasela. Bafohla lapho kubhidlike khona, batseleke ngekhatsi.

¹⁵ Tesabiso tiyangehlula, kuhlonipheka kwami kususiwe kimi, kwaba shangatsi kupheshulwe ngumoya, kuphepha nenhlalakahle yami kunyamalale njengemafu.

¹⁶ “Manje kuphila kwami kuyangikhweshela, emalanga eminjunju ayangintfonya.

¹⁷ Busuku bubhobosa ematsambo ami, emahlaba ami langihhwebhako akanakuphumula.

¹⁸ Ngemandla akhe lamakhulu Nkulunkulu ugucuka abe njengekwekwembatsa kimi. Ungibopha njengentsamo yengubo yami.

¹⁹ Ungilahla eludzakeni, sengehliswe ngaze ngaba njengelutfuli nemlotsa.

²⁰ “Ngikhala kuwe, Nkulunkulu wami! Kodvwa wena awungiphendvuli. Ngiyasukuma ngime ngetinyawo, kodvwa wena umane ungibuke nje.

²¹ Sewujike waba nelulaka kimi, ngemandla esandla sakho uyangihlasela.

²² Uyangihlutfula ungijike ngemuke nemoya, ungiyekele nginhlanhlatse nesivunguvungu.

²³ Ngiyati kutsi uyawungehlisela phansi kulabafile, endzaweni lemiselwe bonkhe labaphilako.

²⁴ “Empeleni umhlaselelani umuntfu lobhujiswako, umuntfu longeke asatisite ngalutfo ngaphandle kwekutincengela umusa kuwe?

²⁵ Angizange ngibakhalele yini bantfu labasenhluphekweni? Umphefumulo wami awuzange ubakhalele yini bantfu labamphofu?

²⁶ Kodvwa nangitsi ngifuna lokuhle, kusuke kufike lokubi; nangitsi ngifuna kukhanya, kusuke kuchamuke bumnyama.

²⁷ Inhlitiyo yami iyaphitsitela ayinako kuthula, emalanga etinhlupheko amelene nami.

²⁸ Ngihamba ngizula ngigcungcile, nginyukubele, ngibe ngingakafuswa lilanga, kute kimi injabulo. Ngiyasukuma emkhambatsini ngikhale, ngicela lusito.

²⁹ Sengigucuke ngaba ngumnakabomphungutja, ngaba ngumngani wetahhukulu.

³⁰ Sikhumba sami sesigucuke saba mnyama, sacecebuka; umtimba wami uyavutsa ngumkhuhlane.

³¹ Lihabhu lami selilungiselelwe kulila, nemntjingozi wami sewulungiselwe umsindvo wekukhala, yebo, umsindvo wekukhala ngimemete.”