Jobe 29 - Siswati 1996 Bible

Kutikhulumela kwaJobe kwekugcina

¹ Jobe wachubeka nenkhulumo yakhe, watsi:

² “Maye, ngiyatikhumbula tinsuku tami takucala. Ngikhalela lawa malanga, Nkulunkulu asanginakekela.

³ Ngaleso sikhatsi sibane sakhe sasikhanyisa etikwenhloko yami, ngaloko kukhanya kwakhe ngangihamba ekukhanyeni ngisho nasebumnyameni.

⁴ Maye! Leto tikhatsi nami ngisamila, bungani betfu naNkulunkulu busashisa, angibusisa kanye nemuti wami,

⁵ leto tikhatsi Somandla asengakimi, nebantfwabami basesedvute nami,

⁶ lapho indlela yami isacwile elulateni, nelidvwala lisatfululela kimi imifula yemafutsa emncumo!

⁷ “Ngangitsi nangisondzela ngasemasangweni elidolobha, ngitsi nangitsatsa sikhundla sami enkhundleni yelidolobha,

⁸ emajaha enelele kungibona akhweshele eceleni, bese kutsi imisumphe isukume ime ngetinyawo,

⁹ emadvodza lasembili angete akhuluma ambonye imilomo yawo ngetandla tawo,

¹⁰ emavi alabahloniphekile athuliswe, tilwimi tabo tinamatsele elwangeni.

¹¹ Bonkhe lababengivile babekhuluma kahle ngami, nalabo lababengibonile babengincoma,

¹² ngobe ngangisindzisa labamphofu lababekhala bacele lusito kimi, netintsandzane letatite boyise lababengatisita.

¹³ Umuntfu abetsi nase afa angibusise, ngangitijabulisa tinhlitiyo tebafelokati, tihlabele.

¹⁴ Kulunga ngangikwente kwaba yingubo yami yekwembatsa, kungakhetsi muntfu kwakungusona sembatfo sami nesigcoko sami.

¹⁵ Ngangingemehlo etimphumphutse, netinyawo talabatishosha.

¹⁶ Nganginguyise walabeswele, ngangiyitsatsela etulu ngiyihlolisise indzaba yalosihambi eveni.

¹⁷ Ngangiwephula ematinyo alababi, ngisindzise labo lasebababambile ngibahlwitse ematinyweni abo.

¹⁸ “Ngangicabanga ngitsi: ‘Nami ngiyawufela ekhaya lami, emalanga ami manyenti ngangesihlabatsi saselwandle.

¹⁹ Timphandze tami titawutfunguluta tize tifike emantini, ematolo alale emagaleni ami busuku bonkhe.

²⁰ Inkhatimulo yami iyawuhlala iyinsha njalo kimi, nebutjoki bami buhlale bubusha njalo esandleni sami.’

²¹ “Bantfu babengilalela ngekungetsemba lokukhulu, bathule balindzele kweluleka kwami.

²² Ngangitsi nasengikhulumile, kungaphindzi kukhulume muntfu emvakwami, emavi ami abewela ngebunono etindlebeni tabo.

²³ Babengilindzela njengemvula, banatse emavi ami njengemvula yasentfwasahlobo.

²⁴ Ngangitsi nangimamatseka emehlweni abo, bangete bakukholwa kalula loko, kukhanya kwebuso bami kwakuligugu kubo.

²⁵ Kwakungimi labebakhetsela indlela, ngihlala emkhatsini wabo njengesikhulu sabo. Ngangihlala njengenkhosi emkhatsini wemabutfo ayo; nginjengemuntfu longumdvudvuti walabalilako.”