Jobe 28 - Siswati 1996 Bible

Kuhlakanipha kwaNkulunkulu lokungachazeki

¹ “Ukhona umgodzi wekutapa isiliva, yebo, ikhona nendzawo lapho kucengisiswa khona igolide.

² Insimbi imbiwa emhlabatsini, nelitfusi lincibilikiswa likhishwe etjeni lalo.

³ Umuntfu uyabucedza bumnyama, uphenyisisa aze afinyelele nasetingonini temhlaba, afunana nelitje lensimbi ebumnyameni lobukhulukati.

⁴ Umba umgodzi loshonako, khashane kabi nalapho kuhlala khona bantfu, lapho kungasahambi khona bantfu; khashane kakhulu nebantfu, ulenga khona ajikite.

⁵ Umhlaba, lapho kuphuma khona kudla, uyaguculwa lapha ngaphansi kube shangatsi ngungemlilo;

⁶ isafire iphuma emadvwaleni awo, nelutfuli lwawo lucuketse tigaca tegolide.

⁷ Kute ngisho nome linye lingce leliwatiko lowo mgudvu lofihlakele, ngisho neliso lalohheya imbala aliwati.

⁸ Tilwane letinkhulu letitigabatisa ngemandla ato atilubeki lunyawo lwato kulowo mgudvu; kute libhubesi lelizulela khona.

⁹ “Umuntfu welula sandla sakhe, abhidlite lidvwala kusuke tinhlase, timphandze tetintsaba tihlale ebaleni.

¹⁰ Umba imihume emadvwaleni, liso lakhe liwabone onkhe ematje laligugu.

¹¹ Uphenyisisa tiyalu tayo yonkhe imifula, avumbulule tintfo letifihlakele atibeke ebaleni.

¹² “Kodvwa kungaze kutfolakale kuphi kuhlakanipha? Kuhlalaphi kucondzisisa kahle tintfo?

¹³ Umuntfu akabucondzisisi bumcoka bako, akutfolakali eveni lalabaphilako.

¹⁴ Kujula nako kuyalandvula kutsi: ‘Akukho lapha kimi,’ nelwandle lutsi: ‘Kute lapha kimi.’

¹⁵ Kungeke kutsengwe ngisho nangalecengiwe igolide, ngisho nentsengo yako ingete yalinganiswa ngesiliva.

¹⁶ Ngeke sekutsengwe ngisho nangegolide yase-Ofiri, nangelitje leliligugu i-oniksi nome emasafire.

¹⁷ Ingeke ilinganiswe ngisho nanegolide nengilazi, futsi ngeke yenaniswe ngisho nangetintfo letiligugu tegolide.

¹⁸ Angisaphatsi-ke ngekhorali nangelitje ijasiphi. Intsengo yekuhlakanipha iphakeme yendlula emarubi.

¹⁹ Ngeke kulinganiswe ngisho nanethophazi yaseKushe, kungeke kutsengwe ngisho nangegolide lecengiwe.

²⁰ “Kantsi vele kona kuhlakanipha kuvelaphi? Kuhlalaphi kucondza tintfo kahle?

²¹ Kufihlakele emehlweni ayo yonkhe intfo lephilako, kuvalelekile ngisho nasemehlweni etinyoni letindiza etulu emoyeni.

²² Imbhubhiso nekufa kutsi: ‘Natsi sive nje emahemuhemu ako lefikile etindlebeni tetfu.’

²³ NguNkulunkulu loyicondza kahle indlela leya kuko, futsi nguye yedvwa lowati lapho kuhlala khona kuhlakanipha.

²⁴ Ngobe yena ubona ekugcineni kwemhlaba, futsi yena ukubona konkhe lokulapha ngaphansi kwemtfunti welilanga.

²⁵ Watsi nakasungula emandla emoya, akala emanti,

²⁶ nakashayela imvula umtsetfo, abhola indlela yemibane yekudvuma kwelitulu,

²⁷ wabuka kuhlakanipha konkhe, wase uyakudvumisa, wakumisa kwaba njalo, wakuvivinya.

²⁸ Wase ukhuluma kumuntfu, watsi: ‘Buka la, kwesaba Nkulunkulu libito lako kuhlakanipha. Kubalekela lokubi loko kukucondza.’ ”