Jobe 27 - Siswati 1996 Bible

Imphendvulo yekugcina yaJobe kubangani bakhe

¹ Jobe wachubeka nenkhulumo yakhe, watsi:

² “Kuphila kwaNkulunkulu, lotsetse lilungelo lami, yena unguSomandla lowente kutsi nginambitse lusizi lwemphefumulo wami,

³ yingci kuphila nakusekhona kimi, nemoya waNkulunkulu usesemakhaleni ami,

⁴ tindzebe tami tingeke tikukhulume lokubi, nelulwimi lwami lungeke luwacale emanga.

⁵ Ngingeke ngivume kutsi loko lenikushoko kuliciniso, ngiyawuze ngife ngingakehlukani nebucotfo bami.

⁶ Ngitawunamatsela kulokulunga kwami, futsi ngingeke ngikuvumele kutsi kusuke kimi. Nembeza wami angeke angisole, yingci nangisaphila.

⁷ “Shangatsi titsa tami tingaba njengalababi, nalabaphambene nami babe njengalabangakalungi.

⁸ Ngobe liyini litsemba lalongamesabi Nkulunkulu, nangabe asasusiwe, naNkulunkulu asatsatsa kuphila kwakhe?

⁹ Nkulunkulu utakuva yini kukhala kwakhe, nasahlaselwa lusizi nenhlupheko?

¹⁰ Uyawutijabulisa yini ngaSomandla? Uyawulibita ngaso sonkhe sikhatsi yini libito laNkulunkulu?

¹¹ “Ngitanifundzisa ngemandla aNkulunkulu; ngingeke ngitifihle tindlela taSomandla.

¹² Nani nonkhe matfupha nikubonile loku. Pho, niwukhulumelani lombhedvo?”

Sofari

¹³ “Nasi-ke siphetfo semuntfu lomubi lasabelwa nguNkulunkulu; lifa lebacindzeteli labalemukela kuSomandla:

¹⁴ Nome bantfwabakhe bangaba banyenti, noko bayawuphelela enkembeni, netitukulwane takhe tingeke tibe nekudla lokwenele.

¹⁵ Sifo siyawuyicotfula insali yakhe, nebafelokati babo bangeke babalilele.

¹⁶ Nome ngabe ubutsisa ticumbi tesiliva kube shangatsi lutfuli, abutsise tembatfo njengeticumbi telibumba,

¹⁷ letimphahla letibutsiswa libibi tiyakwembatfwa ngulabalungile, kutsi labangenacala behlukaniselane lesiliva yakhe.

¹⁸ Indlu layakhako ifanana nendlu yebulembu, yebo, ifanana nelichugwana lelakhiwe ngumlindzi.

¹⁹ Lowo muntfu ulala anjingile, kodvwa angaphindzi abe njalo, nakavula emehlo akhe akhandze sekute lutfo.

²⁰ Kutfutfumela kumgabadzela njengetikhukhula, sivunguvungu simkhukhule sihambe naye ebusuku.

²¹ Umoya wangasemphumalanga uyametfwala uhambe naye; uyamphephula umsuse kuleyo ndzawo yakhe.

²² Lomoya utijikijela etikwakhe ungasenamusa kuye, agijime ashiye inyosi abalekela emandla awo.

²³ Ushaya tandla umhleke lusulu; uyamhhewula umsuse endzaweni yakhe.”